كولیژا پەروەردا جەستەیی و زانستێن وەرزشی ل زانكۆیا دهۆك وۆركشۆپەك لدۆر (پەیرەو و بنەمایێن ڤەكۆلینێن زانستی و تەكنیكێن وێ یێن ئامارێ د بیاڤێن وەرزشی دا) ل رۆژا 13/3/2022 ل ئاڤاهیێ كولیژێ ئەنجام دا.
لدۆر ڤێ وۆركشۆپێ د. ئەحمەد قاسم راگرێ كولیژا پەروەردا جەستەیی و زانستێن وەرزشی گۆت: "ئەڤ وۆركشۆپە لدویڤ راسپاردێن سەرۆكێ زانكۆیێ بوو، بۆ وێ چەندێ كا دێ شێین چ بۆ قوتابیێن ماستەرێ یێن كولیژێ كەین، كو نوكە مە 12 قوتابیێن ماستەرێ هەنە، پشتی دویڤچوون و دانوستاندن لسەر رەوشا وان هاتیە كرن، دیاربوو كو ئەو پێدڤی وۆركشۆپەكێنە دبیاڤێ ڤەكۆلینێن زانستی دا، داکو شیانێن وان بهێنە پێشخستن، لسەر ڤی شەنگستەی ئەڤ وۆركشۆپە هاتیە ئەنجامدان".
راگرێ كولیژا پەروەردا جەستەیی و زانستێن وەرزشی ئەوژی دیاركر كو ل رێکەڤتی ١٥/٣/٢٠٢٢، وۆركشۆپەكا دی هەیە و تمامكەرا ڤی وۆركشۆپی لدۆر ئامارا پێشكەڤتی، كا دێ چ ئامرازێن ئامارێ هێنە بكارئینان ل دەمێ ئەنجامدانا ڤەكۆلینان، كو ئەو ژی یا گرنگە، دا ئارمانجا ڤەكۆلینێ بجهبهێت، كو ئارمانج هەر پێشخستنا شیانێن مامۆستایانە.
وۆركشۆپ ژلایێ د. زرغام جاسم نعێمی ڤە مامۆستایێ كولیژا پەروەردا جەستەیی و زانستێن وەرزشی ل زانكۆیا میسل هاتە پێشكێشكرن و تێدا دیاركر كو ئەڤ بیاڤە بەردەوام پێدڤی پێشخستنێ یە، و گەلەك ئەو بابەتێن گەنگەشێ لسەر دكەین پێدڤی ب پێداچوونێ هەیە، چونكو پێشهاتێن نوی یێن هاتینە د ناڤ بابەتێ ڤەكۆلینان دا، سەرەرایی كو پێكهاتێن ڤەكۆلینێ و پەیرەوێ وێ نیمچە نەگۆرە، بەلێ گوهۆرین د پێرابوونان دا دهێنە دیتن، لەورا ژی باس ل ڤان پێرابوونان و پێشخستنا وان دهێتەکرن و دڤان جورە وۆركشۆپان دا دیتن و نێرین دهێنە پێکگوهارتن و گەلەك بابەتێن گرنگ دهێنە ئاراستەكرن و هەمی مفایی ژێ دبینن، كو دبیاڤێ ڤەكۆلینێن زانستی دا بیاڤێ وەرزشی تایبەتمەندیا خۆ یا هەی، و پتریا وان بابەتان هاتنە گەنگەشە كرن.
مامۆستا نیهاد ئیبراهیم، قوتابیێ دكتۆرایێ یە ل كولیژا پەروەردا جەستەیی و زانستێن وەرزشی لدۆر ڤی وۆركشۆپی كۆت: "وۆركشۆپ لدۆر شێوازێن نوییە، و هندەك حالەتێن تایبەت هاتنە باسكرن، وەكو بكارئینانا ئامارێن نوی، چونكو پێشتر هندەك شێوازێن كلاسیكی هەبوون بتنێ ئەو دهاتنە بكارئینان، كو قوتابیێن خواندنا بلند دێ مفایی ژێ بینین، کو لدویڤ نویترین شێوازێن سەردەمی یێن ڤەكۆلینێن زانستی بچین".
هەژی باسکرنێ یە ئەڤرۆ رێکەڤتی ١٣/٣/٢٠٢٢، رۆژا دووێ بۆ ژ ڤێ وۆركشۆپی و ل رۆژا سێشەمبی ٨ی ئادارێ دەست پێ هاتبوو كرن و روینشتنا ئێكێ ژێ هاتبوو ئەنجامدان، ب پشكداریا سەرجەم مامۆستایێن كولیژا پەروەردا جەستەیی و زانستێن وەرزشی ل زانكۆیا دهۆك و قوتابیێن خواندنا بلند ل ڤێ كولیژێ.