زانكۆیا دهۆك ل رۆژا 11/11/2021 ل ناڤەندا قوتابیان ووركشۆپەك ل دۆر "كۆالیتیا فێربوون و ڤەكۆلینان" ب ئامادەبوونا وان مامۆستایێن پشتی سالا 2010 باوەرناما دكتۆرایێ بدەستڤە ئیناین هاتە ئەنجام دان.
هاریكارێ سەرۆكێ زانكۆیا دهۆك بۆ كاروبارێن زانستی و خاندنا بلند، د. لقمان هادی حسن، د پەیڤەكی دا دیاركر كو ئەو مامۆستایێن ل ڤان دەه سالێن دووماهیێ باوەرناما دكتۆرایێ بدەستڤە ئیناین مە داخازكرینە ڤی ووركشۆپی داكو بیروبۆچوونێن وان ل دۆر تەوەرێن ووركشۆپی بزانین، كو پەنەل دێ ل دۆر سێ تەوەێن سەرەكی بن، ئەو ژی پێشخستنا كۆالیتیا ڤەكۆلینێ، ئەبدێتكرنا سیستەمێ فێركرنێ و مەنهەجان، بەرەف سیستەمەكێ ئەلكترۆنی بۆ برێڤەبرنا زانكۆیێ.
د. لقمان هادی حسن، هەروەسا گۆت "مەرەم ژ داخاز كرنا ڤان مامۆستایان بۆ وێ چەندێ ژی یە ئەم پتر مامۆستایێن خۆ بینینە پێش، چونكو گەلەك مامۆستایێن هەین داناڤا زانكۆیێ دا دبەرزەنە، دڤان چالاكیان دا ئەو بخۆ خۆ بیننە پێش داكو رۆلێ خۆ ل زانكۆیێ پتر بگێرن".
سەرۆكێ زانكۆیا دهۆك، د. داود سلیمان ئەتروشی، د پەیڤەكی دا ئاماژە دا وێ چەندێ كو هەر كارەكێ هاتبیتە كرن ژ بۆ وێ مەبەستێ یە كا دێ چاوا زانكۆیێ پێشئێخین، نێرینا خۆژی ل دۆر پێشخستنا زانكۆیێ د سێ تەوەران دا دیاركر، ئەو ژی پێشخستنا كۆالیتیا خاندنێ، كو دەمێ قوتابی ژ زانكۆیێ دەردچن خودان شیان بن، ئەو دەرچوویی بن بشێن بخۆ دەلیڤێن كاری ببینن، لێ دڤی بیاڤی دا پێدڤیە پێداچوون تێدا بهێتە كرن، ئایا ئەوێن ژ زانكۆیا دهۆك دەردچن ئەم ژێ د رازینە؟ تەوەرێ دووێ ژی پێشخستنا ئاستێ ڤەكۆلینان، كو ڤەكۆلین دوو جۆرن ژبلی ئەوێن زانستی یێن پەتی، پێدڤیە ڤەكۆلین ژبۆ چارەسەریا ئاریشێن ڤی وەلاتی بن، تەوەرێ سیێ ژی چاوا زانكۆ بچیتە دناڤا جڤاكی و خۆ ل ئاریشێن جڤاكی بكەتە خدان، ل دویف دا پەنەلێن ووركشۆپی دەستپێكرن و چەندین مامۆستایێن زانكۆیێ تێدا پشكداری كرن.