ل ژێر چاڤدێریا سەرۆكێ زانكۆیا دهۆك پرۆفیسۆر د. مسلح دهۆكی كولیژا یاسا و زانستێن رامیاری كۆربەندەكێ زانستی ب ناڤێ مافێ هەرێما كوردستانێ د سەرخۆبونێ دا ل رۆژا 31/3/2016 ل سەنتەرێ رەوشەنبیری و جڤاكی یێ زانكۆیا دهۆك گێرا.
د ڤی كۆربەندی دا پرۆفیسۆر د. مسلح دهۆكی د پەیڤەكی دا گۆت مافێ چارەنڤیسی یێ مللەتان گەلەك جاران بێی حەزا وان دهێتە دیاركرن و ئەم كورد ژی بەری نوكە ئێك ژ ڤان مللەتان بووین كو بێی مە مافێ مە یێ چارەنڤیسی د هاتە دیاركرن، ئاماژە دا وێ چەندێ ژی كو نوكە كاودان د گونجای نە ئەم بخو مافێ خۆ یێ چارەنڤیسی دیار بكەین و ریفراندوم دێ زەمینێ بۆ سەرخۆبونێ خۆشتر لێ كەت.
د بابەتێ ئێكێ یێ كۆربەندی دا كو ل دۆر مافێ هەرێما كوردستانێ بوو د سەرخۆبونێ دا ژلایێ سیاسی ڤە و ژلایێ د. سالح مەلا عومەر ڤە هاتە پێشكێش كرن تێدا دیاركر كو نوكە ل رۆژهەلاتا ناڤین گوهورین یا بوویە واقعەك و وەلاتێن زلهێز ژی یێ ڤەكۆلینان دكەت كا ب چ شێوە ڤان گوهورینان قەبیل بكەن، گوت ژی كێشێن سیاسی یێن ناڤخۆی و سەرخۆبون دو تشتێن د ژێك جودانە، هەتا ئەم خۆ بگرین كو مە چ كێشە ل ناڤخۆ نەمینن ژ نوو ئەم بەحسێ سەرخۆبونێ بكەین ل وی دەمی ئەم دێ د شاش بین.
د بابەتێ دووێ دا كو ل دۆر مافێ هەرێما كوردستانێ بوو د سەرخۆبونێ دا ژلایێ دەستوری ڤە و ژلایێ د. ئیبراهیم محەمەد سالح ڤە هاتە پێشكێش كرن تێدا دیاركر كو د مادێ 141 یێ دستورێ عیراقێ دا بەحسێ وێ چەندێ دكەت كو هەر بریار و یاسایەكا هەر ژ سالا 1992 و هەتا 2003 ژ پەرلەمانێ كوردستانێ دەركەفتی و نە دهەڤدژ بن ل گەل دستورێ عیراقێ دێ كار پێ هێتە كرن، لەورا یا گرنگە بریارا پەرلەمانێ كوردستانێ ئەوا ل 4/10/1992 ل دۆر فیدرالیێ هاتیە دان بهێتە دستوری كرن بۆ بابەتێ سەرخوەبوونێ.
د بابەتێ سیێ دا كو ل دۆر مافێ هەرێما كوردستانێ بوو د سەرخۆبونێ دا ژلایێ یاسایێن نێڤدەولەتی ڤە و ژلایێ د. عەبدولفەتاح عەبدولرەزاق هاتە پێشكێش كرن و دیاركر كو راگەهاندنا سەربەخۆیێ نە هند یا ب زەحمەتە بەلێ پاراستنا وێ سەربەخویێ یا ب زەحمەتە لەورا مە وەكو هەرێما كوردستانێ پێدڤی ب دەرڤە یە و خۆشكرنا پەیوەندیا ل گەل وەلاتێن دەرڤە، ئاشكرا ژی كر كو دو رێك هەین بۆ سەرخۆبوونا كوردستانێ یان هەرێما كوردستانێ ژ عیراقێ جودا ببیت و ببیتە وەلاتەكێ سەربەخۆ یان عیراقێ پارچە ببیت بۆ چەند وەلاتان.
ل دیماهیا ڤان بابەتان ژی گەنگەشە ل سەر ناڤەرۆكا وان هاتە كرن و راسپارد هاتنە نڤیسین.