ب دەستڤەئینانا دەستکەفتەکا زانستیا گرنك ب هەماهەنگی دگەل ئەنستوتیەکا ئەمریکی
مايو 12, 2022, 10:12 ص

سەنتەرێ‌ پشكنین و ڤەكۆلینێن كۆرۆنایێ‌ ل زانكۆیا دهۆك ب هەڤكاری دگەل پەیمانگەها سیکریپس بۆ ڤەکۆلینان (The Scripps Research Institute) یا ئەمریكی زنجیرا جینۆم یاگشتی (Whole genome) ب رێكا تەكنیكا (NGS-Illumina) هاتە دەستنیشانکرن بۆ نزێکێ 600 نموونێن كۆرۆنایێ‌ ل پارێزگەها دهۆكێ‌ کۆ هاتینە وەرگرتن دماوێ‌ هەشت هەیڤاندا هەر ژ هەیڤا شەش یا 2021 تا هەیڤا دوو یا 2022.
دڤێ شلۆڤەکرنێ دا نەخشێ نڤشێ کۆرۆنا هاتە دیارکرن ل پارێزگەها دهۆکێ. ئەڤ دەستکەفتە هاتینە بەلاڤكرن د ویبسایتێ‌ (GISAID) یێ‌ تایبەت ب کۆمکرنا هەمی زانیاریێن تایبەت ب كۆرۆنایێ‌ ل جیهانێ. ئەڤ شلۆڤەکرنە دهێنە هژمارتن ئێكەم ل سەر ئاستێ‌ هەرێمێ‌ و عیراقێ‌ ژبە کو هەمی جۆرێن ڤایرۆسێ کۆرۆنایێ هاتینە دەستنیشانکرن‌.
رێڤەبەرێ‌ سەنتەرێ‌ كوڤید 19 یێ‌ پشكنین و ڤەكۆلینێن كۆرۆنایێ‌ ل زانكۆیا دهۆك بەرێز پرۆفیسۆرێ هاریکار دکتۆر جاسم عبدو دیاركر كو ئەنجامێن ڤێ شلۆڤەکرنێ دێ‌ هێنە دیاركرن و گەنگەشەكرن د سیمپۆزیومەكی دا ئەوا دێ‌ هێتە گێران د ٢٢/٦/٢٠٢٢ ل زانكۆیا دهۆك. دڤێ چالاکیێ دا ل سەرانسەری عیراقێ‌ و جیهانێ ڤەکۆلەر و بسپۆرێن دڤی بیاڤی دا دێ پشکداربن.