قوتابیێن زانکۆیا دهۆک وەکو ئێکەم زانکۆ ل سەر ئاستێ هەرێما کوردستانێ و عیراقێ شیان ببنە ئەندام د کۆمەلا کیمیایی یا ئەمریکی American Chemical Society دا، و چاپتەرەکێ تایبەت ب ناڤێ "UoD_ACS International Student" ل کۆمەلا کیمیایی یا ئەمریکی ڤەكەن.
ل دۆر ڤی چەندێ ژی، د. سوهاد عەبدولڕەحمان یاسین، مامۆستا پشكا کیمیا ل کۆلیژا زانست وئەنداما كۆمەلا كیمیایی یا ئەمریكی كو رۆلێ سەرەكی هەبوو د دەستڤە ئینانا ئەڤێ دەستكەفتێ دیاركر: " ئەندامبوونا قوتابیێن پشكا كیمیا ل زانكۆیا دهۆك بۆ دەستثێكا هەیڤا ئەیلۆنا ٢٠٢٢ ڤەدگەریت، كو پشتی هەوڵدانەكا زۆر، بوونە ئەندام ل كۆمەلا كیمیایی یا ئەمریكی. و ئەندامبوونا قۆتابیێن زانکۆیا دهۆک ب ٦ قۆتابیان دەستپێکر، و د نوکە دا نێزیکی ٣٠ قۆتابیان ژ پشكا کیمیا یا کۆلیژا زانست، و پشكا زانست یا کۆلیژا پەروەردا بنیات ئەندامن ."
ژلایێ خۆڤە، ئەسما کەریم، قۆتابیا قۆناغا ٤ ل پشكاکیمیا ل کۆلێژا زانست، حەزا خو بۆ بەشداریکرن ل چالاکیێن زانستی دگەل قۆتابیان دەربڕی و دیار كر: "ئەندام بوونا مه وەكی قوتابیێن زانكۆیا دهۆك ل كۆمەلا كیمیایی یا ئەمریكی دەستکەفتەکێ گەلەكێ مەزنە. هەردیسان ژ بەر چالاکیا مە وەكو قوتابیێن پشکا کیمیا ل کۆلیژا زانست یا زانکۆیا دهۆک، مە شیا د ماوێ سالەکێ دا قەلغانێ دەستخۆشیێ وەربگرین."
هەژی ئاماژە دانێ یە كو ئەڤ ئەندامبوون پێتڤی ب چالاکی و کارێ بەردەوامە ژلایێ قوتابیان ڤە. هەروەسا، كۆمەلا كیمیایی یا ئەمریكی پالپشتییا دارایی یا كار و چالاكیێن
ئەندامێن خو دكەت و سکۆلەرشیپ و دەرفەتێن زانستی یێن جوراوجور بۆ ئەندامێن خۆ دابین دکەت.
راگەهاندنا زانکۆیا دهۆک، 8ـی كانوونا دووێ، 2024
فاطمة محمود
وەرگێران: مێڤان مەحەمەد سالح