راگەهاندنا زانکۆیێ، 13ـی چریا ئێکێ، 2022
سالانە وەرگێڕ ل 30 ئەیلونێ ڕۆژا جیهانی وەرگێڕانێ ساخدکەن، کو ب ڤێ هەلکەڤتێ پەیوەندی ب جەژنا قەشە جیرۆمی ڤە هەی، کو ب پاڕێزەرێ وەرگێڕا دهێتە هژمارتن.
ب هەلکەڤتا رۆژا جیهانی یا وەرگێڕانێ، پشکا وەرگێڕانێ ل کولیژا زمان ل زانکۆیا دهۆک، سیمپوزیۆمەکا دوو رۆژی بۆ مامۆستا و قوتابین پشکێن وەرگێڕانێ یێن زانکۆیێن دهۆک و نەورۆز ل هۆلا سینەمایێ ل سەنتەڕێ قوتابیان ل کەمپا زانکۆیا دهۆک ئەنجامدا. ژبەر ژمارا زۆرا بەشداربوویان ژ مامۆستا و قوتابیێن پشکا وەرگێڕانێ ل هەردوو زانکۆیێن دهۆک و نەورۆز هەمی کۆرسیێن هۆلا سینەمایێ پڕببوون.
ب ئامادەبوونا راگڕا کولیژا زمانان د. نەفیسە ئسماعیل حاجی و سەرۆکێ پشکا وەرگێڕانێ د. شیڤان شلیمۆن تۆما، و مامۆستا و قوتابیێن پشکێن وەرگێڕانێ ل زانکۆیا دهۆک و زانکۆیا نەورۆز، سیمپوزیۆما ب ناڤونیشانێن "ئاراستەیێن نوی د ڤەکۆلینێن وەرگێڕانێ دا" دا ل 11ـی چریا ئێکێ 2022 دەستپێکر.
ل رۆژا ئێکێ دا، چوار مامۆستایێن زانکۆیێن دهۆک و نەورۆز پشکداری د چالاکیێن سیمپوزیۆمێ دا کر، چەندین بابەتێن جودا ل دۆر ڕۆژا جیهانی یا وەرگێڕانێ و مێژوویا وێ هاتنە پێشکێشکرن، و گۆرانکاریێن د پێرابوونێن پراکتیکیێن وەرگێرانێ دا، شێوازێن وانەگۆتنێ د بوارێ وەرگێڕانێ دا ب رێکا بکارئینانا ئینتەرنێتێ، و بکارئینانا ئامیرێن وەرگێرانێ ب هاریکاریا کۆمپیۆتەری و تەکنۆلوجیایا نوی.
جهێ ئاماژێ یە، د ڕۆژا ئێکێ دا ب گۆتارەکا د. شیڤان شلیمۆن تۆما سیمپوزیۆم هاتە ڤەکرن، د گۆتارا خۆ دا راگەهاند "گرنگە ئەم ل ڤێ رۆژێ ساخبکەین و ڕێزێ ل کارێن زمانڤان و وەرگێڕان بگرین، ژبەرکو ڕۆلەکێ بەرچاڤ د لێکگۆهارتنا بیرورایێن نوی زانیاریان دا هەیە، هەروەسا رۆلێ خۆ د بلندکرنا ئاستێ هشیاریا وەرگێڕان دا هەیە و کەلتۆران کۆمدکەت".
سیمپوزیۆم د دووەم ڕۆژ دا، ل 12ـی چریا ئێکێ، ب پشکداریا قوتابیێن پشکێن وەرگێڕانێ ل هەردوو زانکۆیێن دهۆک و نەورۆز، ئیکێ یا بەردەوام بوو و ئەڤ بابەتە بخۆڤە گرتن: وەرگێڕانا دەنگێ و دیتنێ، ژێڕنڤیس، دوبلاژکرن، کۆمێنتاریا دەنگی. سیمپوزیۆمێ گەلەک یا زانیاری بەخش بوو بۆ قوتابیان، بۆ گرنگیپێدانا شیانێن وەرگێڕ و زمانڤانا و وەرگڕتنا تەکنیکا نوی بۆ کارێن داهاتی. هەروەسا چالاکیەکا ژ دەرڤەی پرۆگرامێ فەرمیێ خواندنێ بوو کو دەرفەت بۆ قوتابیان پەیداکر کو وان زانیاریێن ئەکادیمیێن ل پۆلێ دا ب دەستخۆڤە دئینن، ل سەر ئەردێ راستەقینە بکاربینن.
ڕۆژا جیهانی یا وەرگێڕانێ ل هەمی سالان ل سەرانسەری جیهانێ ل 30ـی ئیلۆنێ دهێتە ساخکرن، دگەل وێ چەندێ رێکەڤت بوو کو ل ڕۆژا ئەینیێ بیت، ژ بەر ڤی ئەگەری و چەند ئەگەرێن دی، ساخکرنا ڤێ هەلکەڤتێ هاتە پاشئێخستن بۆ 11 و 12ـی چریا ئێکێ ل جهێ 30ـی ئیلۆنێ هەروەکو پشکا وەرگێڕانێ پلان بۆ دانای.