ل رۆژا 1/6/2021 كۆلیژا ڤێتێرنەری ل زانكۆیا دهۆك كۆنفرانسێ خۆ یێ زانستی یێ دووێ ل ژێر درووشمێ (زانستێن ڤێتێرنەری یێن هەڤچەرخ گەرەنتیە بۆ جڤاكەكێ ساخلەم) ب شێوێ ئونلاین ئەنجام دا و رێورەسمێن دەسپێكرنا كۆنفرانسی ل ئاڤاهیێ كۆلیژێ ب رێڤەچوون.
راگرێ كۆلیژا ڤێتێرنەری ل زانكۆیا دهۆك د. لقمان تەیب دیاركر كو كۆنفرانسێ ئێكێ ل سالا 2014 هاتبوو ئەنجامدان پێدڤی بوو ئەڤ كۆنفرانسە هەر دوو سالان جارەكێ ل سەر ئاستێ كوردستانێ و عیراقێ هاتبا كرن بەلێ ژ بەر چەند ئەگەرێن كەفتینە درێكا گێرانا وی دا چەند جارا هاتە پاشخستن بتایبەت ژی ژبەر پەتەیا كۆرۆنایێ، بەلێ خۆشبەختانە ئەڤرۆ ئەم شیاین ب شێوێ ئونلاین ئەنجام بدەین كو دێ بۆ ماوێ دوو رۆژان یێ بەردەوام بیت.
د. لقمان تەیب هەروەسا دیاركر كو هەتا نێزیكی 40 ڤەكۆلین تێدا د پشكدارن ژ سەرانسەری زانكۆیێن عیراقێ و هەرێما كوردستانێ و بەهرا پتر یا وان ڤەكۆلینان رازیبوون ل سەر هاتیە كرن كو ل رۆژناما زانستی یا پزیشكێن ڤێتێرنەری یا عیراقی بهێنە بەلاڤ كرن.
هاریكارێ سەرۆكێ زانكۆیا دهۆك بۆ كاروبارێن كارگێری و دارایی د. ئەحمەد محەمەد سالح گۆت ئەگەر سامانێ ئاژەلی یێ ساخلەم بیت و بەرهەمەكێ باش بیت گەلەك یا گرنگە ژ بۆ پێشڤەبرنا ئابووریا وەلاتی، ئاماژە دا وێ چەندێ ژی كو كۆلیژا ڤێتێرنەری ل زانكۆیا دهۆك رۆلەكێ گرنگ یی هەی بۆ پێشڤەبرنا سامانێ ئاژەلی ب رێكا چارەسەریێ و پشكنینان، دا باشترین رێكێن چارەسەریێ بۆ سامانێن ئاژەلی بهێنە بهێنە دیتن.
ئەو ڤەكۆلینێن دێ د كۆنفرانسی دا هێنە گەنگەشەكرن دێ پتر فوكسێ ئێخنە سەر دووماهی پێشڤەچوونێن د بیاڤێ زانستێ ڤێتێرنەری دا پەیدابووین و كارتێكرنا وان نەخۆشیێن دگەهنە ئاژەلی و ب رێكا ئاژەلی بۆ مرۆڤان دهێنە ڤەگوهاستن، هەروەسا دێ بەحسێ رێیێن چارەسەریێ ژی هێنە كرن و ئەو ئەنجامێن ژ كۆنفرانسی دەردچن بۆ جهێن پەیوەندیدار ب ڤی بیاڤی ڤە هێنە هنارتن.