ل ژێر درویشمێ (بەرەف پراکتیزکرنا پزیشکی یا پاراستی و پرۆفێشنال)، سەندیکا نوژدارێن کوردستانێ- لقا دهوکێ ب ھەڤكار ی ل گەل كولیژێن پزیشكی ل زانكۆیا دھۆك و زانكۆیا زاخۆ و رێڤەبەریا گشتی یا ساخلەمیا پارێزگەھا دھۆكێ، ئێكەم كۆنفرانسێ زانستی و پیشەیی ل رۆژا پێنج شەمبی رێكەڤتی ١١ـی گولانێ ٢٠٢٣ ل سەنتەرێ كۆنفرانسا ل زانكۆیا دھۆك، ب ئامادەبوونا وەزیرێ ساخلەمیێ ل حکومەتا ھەرێما كوردستانێ د. سامان حسێن بەرزنجی، نوینەرێ وەزیرێ خواندنا بلند و ڤەكۆلینێن زانستی د. محەمەد حسێن كەلاری، پارێزگارێ دھۆكێ د. عەلی تەتەر، ستافێ كارگێریێ و راگر و مامۆستایێن زانكۆیا دھۆك، ئەندامێن پەرلەمانێ ھەرێما كوردستانێ و ئەندامێن سەندیكا پزیشكێن كوردستانێ و سەندیكا نوژدارێن عیراقێ، ھژمارەكا زۆر ژ پزیشكێن دھۆكێ و پارێزگەھێن ھەرێما كوردستانێ و عیراقێ و پزیشك و ڤەكۆلەر ژ دەرڤەی وەلاتی، ئەنجامدا.
كونفرانس بۆ ماوێ دوو رۆژا ١١ تا ١٢ـی گولانێ ڤەكێشا و ل سەر دوو پشكان ھاتە دابەشكرن، پشكا زانستی و پشكا پیشەیی، د پشكا پیشەیی دا، پزیشك و شارەزایێن ساخلەمیێ ژ كوردستانێ و دەرڤەی وەلاتی پشكداری كر بۆ گەنگەشەكرنا چەندین بابەتێن پزیشكی كو دوو روینشتنێن گەنگەشێ بخۆڤەگرت و ھندەك پزیشكان ژ كوردستانێ و وەلاتێن دی پشكداری تێدا كر، بابەتێ روینشتنا ئێكێ ل دۆر كەرتێ ساخلەمیێ و چەوانیا پێشڤەبرنا وی بوو، كو ژ لایێ د. ئاری حەبیب ڤە ھاتە برێڤەبرن ب پشكداریا د. ئەفراسیاب مووسا رێڤەبەرێ گشتیێ ساخلەمیا پارێزگەھا دھۆكێ و د. عەلی سندی وەزیرێ پلاندانانا ھەرێما كوردستانێ یێ بەرێ و د. رەھیل فرەیدون برێكارێ وەزارەتا ساخلەمیێ. د. ئەفراسیاب مووسا ئاماژە ب ئەوێ چەندێ دا كو گوھۆرینا كەرتێ ساخلەمیێ پرۆسەكا ئالۆزە و پێدڤی ب دەم و رەنجەكا مەزنە، پێدڤیە ھێدی بیت و ب پێشئێخستنا سازیێن كەرتێ ساخلەمیێ و نویكرنا دەستھەلاتا كاری دەستپێبكەت. د. عەلی سندی ژ لایێ خۆ ڤە باس ل وێ چەندێ كر كو كۆنفرانس نابنە سەدەمێ گوھۆرینا پێدڤی د كەرتێ ساخلەمیێ دا، لەورا پێدڤیە لژنێن بسپۆر بھێنە دانان بۆ ئەنجامدانا گوھۆرینا و باشتركرنێ د كەرتێ ساخلەمیێ دا ھەروەكو د دەستوورێ عیراقێ دا ھاتی. ئەڤ لژنە تایبەت بن ب چاڤدێریكرنا بەردەوام بۆ پەیداكرنا چارەسەریێن پێدڤی بۆ سازیێن ساخلەمیێ. د روینشتنا دووێ ژی دا گەنگەشا بابەتێن گرێدای فێركرنا پزیشكی ل ھەرێما كوردستانێ و رێكێن پێشئێخستنا وێ ھاتە كرن.
د لایەنێ زانستیێ كۆنفرانسی دا، ھەشت ڤەكۆلینێن زانستی ژ لایێ مامۆستایێن كولیژا پزیشكی ل زانكۆیا دھۆك و پزیشكێن باژێرێ دھۆكێ ھاتنە پێشكێشكرن، كو بۆ ئێكەم جارە ئەڤ جۆرێ ڤەكۆلینان دھێنە ئەنجامدان. دیسان روینشتنەکا تایبەت ھاتە ئەنجامدان و تێدا گەنگەشا نەخۆشیێن گولچیسكا و جۆبارێن میزێ ھاتە كرن و ھندەك پزیشكێن كوردستانێ و عیراقێ تێدا پشكدار بوون.
دەربارەی گرنگیا كۆنفرانسی، د. سامان حسێن بەرزنجی وەزیرێ ساخلەمیێ ل حکومەتا ھەرێما كوردستانێ گۆت "ژبەر وان بابەت و ڤەكۆلینێن زانستیێن نوی یێن كۆنفرانسی بۆ ئێكەم جار پێشكێشكرین، دشیاندایە بێژم كۆنفرانسەكێ ناڤدەولەتیە، ژبەركو ڤەكۆلینێن بۆ جارا ئێكێ ھاتینە پێشكێشكرن د ئاستەكێ بەرزدانە و ب شێوەكێ زانستی و ئەكادیمیێ بەرز د كۆنفرانسێن ناڤدەولەتی دا دھێنە گەنگەشەكرن. ھیڤیخوازین كۆنفرانس راسپاردێن ب مفا بۆ مە پێشكێشبكەت كو كەرتێ ساخلەمیێ پشتبەستنێ ل سەر بكەت بۆ ئەنجامدانا گوھۆرین و باشتركرنێن پێدڤی د سیستەمێ ساخلەمیێ دا".
ژ لایێ خۆ ڤە، د. ئازاد عەبدال سەرۆكێ سەندیكا پزیشكێن كوردستانێ – لقێ دھۆك دیاركر کو نیشاندانا نویترین رێكێن زانستی بۆ چارەسەركرن و كونترۆلكرنا نەخۆشیان و نەھێلانا بكارئینانا خراب بۆ پیشەیا پزیشكی، زێدەباری نیشاندانا خالێن ھێزێ و چارەسەركرنا خالێن لاوازێ د بوارێ پزیشكی دا ئارمانجێن سەرەكیێن كۆنفرانسینە، دیسان ناڤبری گۆت "ئەڤرۆ ئەم ھەمی ژ كوردستانێ و عیراقێ ل ڤێرێ كۆمبووینە بۆ زانینا گرنگترین ڤەكۆلینێن زانستیێن نوی بۆ خزمەتكرنا كارێ پزیشكی و كەرتێ ساخلەمیێ ل دەف مە، ھیڤیخوازین كۆنفرانسێ مە وەكو پێنگاڤەكا كریاری بۆ چاككرنا كارێ پزیشكی ل كوردستانێ ب گشتی و پارێزگەھا دھۆكێ ب تایبەتی بھێتە ھژمارتن".
ھەژی ئاماژەدانێ یە، پتری ٨٠٠ پزیشك و كەسانێن ئەكادیمی پشكداری د ڤی كۆنفرانسی دا كر، كو چەندین چالاكی بخۆڤەگرتن، ژ وان نیشاندانا دوو فیلمێن دوكیۆمێنتاری، كو فیلمێ ئێكێ باس ل پیشەیا پزیشكیێ و رۆلێ پزیشكان د قورتالكرنا ژیانا خەلكی دا دكر، فیلمێ دووێ باس ل دیرۆكا پزیشكیێ ل باژێرێ دھۆكێ دكر و ئێكەم كەسێن ئەڤ پیشە ئەنجامدای. ھەروەسا كۆنفرانسی ھندەك برگێن كەلتۆری ژی ھەبوون كو تێدا تیپێن ھۆنەری نمایشێن ھۆنەری و فۆلكلۆری پێشكێشكرن.
ڕاگەهاندنا زانکۆیا دهۆک؛ ۱٦ی گولان، ۲۰۲۳
فاطمە مەحموود و فرمێسك حەسۆ
وەرگێڕان: ماهر كێستەيى
فۆتۆ: محەمەد عەبدولکەریم و عەلی بانکی