کولیژا پەرستاری ل زانکۆیا دهۆک ب هەڤکاری دگەل رێڤەبەریا گشتی یا ساخلەمیێ ل پارێزگەها دهۆک و زانکۆیێن ساسەری و ڤیتا سالۆتا سان رافائێلێ و رێکخراوا ئایسپۆ یا نەحکوومی یا ئیتالی، کونفرانسەک لدۆر باشترکرنا کوالتیا پرۆگرامێن خواندنێ و کارێ پەرستاریێ ئەنجامدا.
د ڤێ کونفرانسی دا، کو وەزیرێ ساخلەمیێ ل حکوومەتا هەرێما کوردستانێ، بەرپرسێ لیژنا ساخلەمیێ ل پەرلەمانێ عیراقێ، سەرۆکێ زانکۆیا دهۆک، رێڤەبەرێ گشتیێ ساخلەمیا دهۆکێ و تیمێ ئاژانسا ئیتالی بۆ هەڤکاریا گەشەپێدانێ و هژمارەکا پەرلەمانتار و راوێژکار و نۆژدار و بسپۆرێن ئەکادیمی و کاربدەستێن کەرتێن حکوومی و تایبەت و نەحکوومێ، ئەنجامێن ڤێ قۆناغێ یێن ڤی پرۆژێ پێشڤەبرنا پەرستاریێ هاتنە نیشاندان و ریفۆرما د ڤی کەرتی دا دهێتە ئەنجامدان، هاتنە پێشکێشکرن.
ل دەستپێکێ، و ب ئامادەبوونا هژمارەکا زۆرا دەزگەهێن راگەهاندنێ، رێڤەبەرێ گشتیێ ساخلەمیێ ل پارێزگەها دهۆکێ، د. ئەفراسیاب مووسا پەیڤەک پێشکێشکر و تێدا باس ل گرنگی و لایەنێن جودایێن ڤی پرۆژەی کر و ئاماژەدا گرنگیا دروستکرنا پەرستاریەکا سەردەمیانە و مۆدێرن. هەروەسا باس ل هەڤکاریا د ناڤبەرا سازی و کەرتێن جودا کر بۆ سەرئێخستنا ڤی پرۆژەی.
لدویڤدا د. داوود سلێمان ئەترووشی سەرۆکێ زانکۆیا دهۆک پەیڤەک پێشکێشکر و تێدا گۆت: "ئەڤ پرۆژە دگەل دید و پلانێن زانکۆیا دهۆک گەلەک دگونجیت، پێشڤەبرنا کوالتی و ئاستێ دەرچوویێن زانکۆیا دهۆک ژ پێشینەیێن مەنە، ب هەمی شێوەیان دێ هەڤکار بین بۆ پتر پێشڤەبرنا پرۆگرامێن خواندنێ ل کولیژا پەرستاری و پشتەڤانیا سەرئێخستنا ڤی پرۆژەی. ئەڤ باشترکرنا پرۆگرامێن خواندنێ دێ کولیژێن دی ژی ل زانکۆیا دهۆک بخۆڤەگریت".
پاشی نوینەرێ رێکخراوا ئایسپۆ پەیڤەکا ئۆنلاین پێشکێشکر و تێدا باس ل هویرکاریێن ڤی پرۆژەی کر و هەماهەنگیا وان دگەل لایەنێن پشکدار.
ژ لایێ خۆ ڤە، د. سامان بەرزنچی، وەزیرێ ساخلەمیێ ل حکوومەتا هەرێما کوردستانێ، د پەیڤا خۆ دا باس ل پلانا چاکسازیێ د کەرتێن جودا دا و ب تایبەتی د کەرتێ ساخلەمیێ دا و گۆت: "ئەڤ پرۆژە پشتەڤانا پلانا چاکسازیێ یە ئەوا کابینەیا ٩ یا حکوومەتا هەرێما کوردستانێ دەستپێکری، کەرتێ ساخلەمیێ ژی گرنگیەکا مەزن هەیە و ئەنجامدانا چاکسازیێ د ڤی کەرتی دا دێ کاریگەریەکا مەزن هەبیت، ب تایبەتی ژی د بوارێ پەرستاریێ دا، چونکو پەرستار بۆ نەخۆشی نێزیکترینە و پێشڤەبرنا پەرستاریێ دێ خزمەتگوزاریەکا مەزن پێشکێشی وەلاتیان کەت".
د ڤی کونفرانسی دا، ئەوێ ئەڤرۆ ل سەنتەرێ کونفرانسان ل زانکۆیا دهۆک هاتیە سازکرن، ٦ پەنەل هاتنە گێران و هویرکاریێن ڤی پرۆژەی هاتنە گەنگەشەکرن و ب کۆمەکا تێبینیان لدۆر ڤی پرۆژەی، کونفرانس ب دویماهی هات.