ل زانكۆیا دهۆك كۆنفرانسەكێ‌ زانستی یێ‌ نێڤدەولەتی ل دۆر نوژداریا دەڤ و ددانان هاتە گێران
Nov. 3, 2021, 8:52 p.m.

ل ژێر درووشمێ‌ (رۆلێ‌ ڤەكۆلینێن زانستی ل پێشخستنا زانستێ‌ نوژداریا ددانان) هەردوو كۆلیژێن پزیشكیا ددانان ل زانكۆیا دهۆك، و زانكۆیا ئەلعیراقیە و ب هەڤكاری دگەل سەنتەرێ‌ نون یێ‌ ڤەكۆلین و خاندنێن تایبەتمەند، ل رۆژا 3/10/2021 ل هۆلا كۆنفرانسان ل زانكۆیا دهۆك، كۆنفرانسێ‌ نێڤدەولەتی یێ‌ سیێ‌ و هەڤپشك یێ‌ ئێكێ‌ ب ناڤونیشان (پێشهاتێن سەردەمیانە ل زانستێ‌ پزیشكیا ددانان) گێرا و بۆ دوو رۆژان دێ‌ یێ‌ بەردەوام بیت.

 د رێورەسمێن دەسپێكرنا كۆنفرانسی دا پەیڤێن زانكۆیا دهۆك و زانكۆیا ئەلعیراقیە و سەنتەرێ‌ نون هاتنە خاندن تێدا ئارمانج و مەبەستێن كۆنفرانسی هاتنە دیاركرن، ئەو ژی ژبۆ پێشخستنا ڤەكۆلینێن زانستیە وەكو ستوینەكا گرنگە بۆ نیشادانا نویبوونان د ڤەكۆلینێن تایبەتمەند دا ل بوارێ‌ پزیشكیا ددانان و پێشخستنا رێبازا كاری بۆ ڤەكۆلەر و ئەو كەسێن دڤی بیاڤی دا كار دكەن، هەروەكو د پەیڤان دا دیاربووی.  

هەژی گۆتنێ‌ یە دڤی كۆنفرانسی دا دێ‌ 13 تەوەرێن زانستی یێن گرێدایی نوژداریا دەڤ و ددانان هێنە بەحس كرن ئەو ژی (پزیشكیا جوانكاریا ددانان، چاندنا ددانان، نشتەرگەریێن دەڤ و روی و شاكان، پزیشكیا ددانان یا ئاوارێن كەمپان، پزیشكیا ددانان ل سەردەمێ‌ كۆرۆنایێ‌، پزیشكیا پاراستنا ددانان، جهگرێن نەلڤ و لڤوك، كەلاشتنا نەخۆشیێ‌، گرێكێن باش و نەباش، راستكرنا ددانان، پزیشكیا ددانانێن زارۆكان، نەخۆشیێن پدیان، پرۆگرامێ‌ نوژدارێن ددانان یێن نێڤدەولەتی، زانستێن بنەرەتی ل پزیشكیا ددانان)، ب پشكداریا ڤەكۆلەر و مامۆستا و بسپۆرێن ڤی بیاڤی ژ چەند وەلاتێن جودا یێن جیهانی و هەروەسا ژ هەردوو زانكۆیێن دهۆك و ئەلعیراقیە و سەنتەرێ‌ نون یێ‌ ڤەكۆلین و خاندنێن تایبەتمەند.