زانكۆیا دهۆك كۆنفرانسێ‌ زانستیێ‌ جوگرافیێ‌ نێڤدەولەتیێ‌ چوارێ‌ دەستپێکر
March 28, 2022, 8:09 p.m.

    پشكا جوگرافی ل كولیژا زانستێن مرۆڤایەتی و سەنتەرێ‌ بێشكچی بۆ ڤەكۆلینێن مرۆڤایەتی ل زانكۆیا دهۆك، كۆنفرانسێ‌ زانستیێ‌ جوگرافیێ‌ نێڤدەولەتیێ‌ چوارێ‌ لدۆر (پلاندانان و رێڤەبرنا سەرچاوەیان ب نێرینەكا جوگرافی یا هەڤچەرخ) ئەڤرۆ رێکەڤتی 27/3/2022 ل هۆلا كۆنفرانسان دەستپێکر و تا سوباهی دێ یێ بەردەوامبیت.

 

 

    ل رێورەسمێن دەستپێكرنێ‌ دا سەرۆكێ‌ كۆنفرانسی، د. مزگین محەمەد حەسەن، د پەیڤەكی دا ئاماژەدا وێ‌ چەندێ‌ كو ژێدەر و داهات و چەوانیا سەرەدەریكرنێ‌ و رێڤەبرنا وان ب نێرینەكا جوگرافی دێ‌ د ڤی كۆنفرانسی دا هێنە باسكرن، كو گەلەك بسپۆریێن زانستی گرنگیێ‌ ددەنە ڤی بابەتی، لێ‌ د ڤی كۆنفرانسی دا دێ‌ ب نێرینەكا جوگرافی بیت، هەروەسا گۆت: "ئەو ئاریشێن مەترسیێ‌ دئێخنە سەر ئەختەرا ئەردی گەلەكن، بەلێ‌ ئاریشا نەمانا ژێدەرێن سرۆشتی ئێك ژ ئاریشێن هەرە مەزنە ل هەمبەری ژیانێ‌ لسەر ئەردی، ژ بەر هندێ‌ ئەڤ بابەتە هاتیە هەلبژارتن".

 

 

    سەرۆكێ‌ زانكۆیا دهۆك، د. داوود سلێمان ئەترووشی، د پەیڤەكی دا گۆت: "سەرچاوەیێن مرۆڤی و سرۆشتی كاریگەریا خۆ لسەر كوالیتیا ژیانێ هەیە‌، بۆ نوكە و ئایندەی ژی و رێڤەبرنا وان ب شێوەكێ‌ دروست و دارێژكری بۆ ئاڤاكرن و پەرەپێدان و پێشڤەبرنا هەر وەلات و جڤاكەكی ژ كارێن بەراهیێ‌ یە، كو د زانستێ‌ جوگرافی دا دشێن رۆلەكێ‌ بەرچاڤ د نەخشەدانان و پلاندانانا ڤان سەرچاوەیان دا بگێرن".

 

 

    سەرۆکێ زانکۆیا دهۆک هەروەسا گۆت: "ڤەكۆلینێن جوگرافی لدۆر سرۆشت و ئابوور و مرۆڤان زۆر گرنگن، ئەوێن ژ لایێ جوگرافی ڤە گرێدای چارەسەركرنا ئاریشێن ئابووری و ب تایبەت رێڤەبرنا سەرچاوەیێن سرۆشتی و پاراستنا ژینگەهێ‌ و پێشبینیێن جوگرافی و پێشكەڤتنا تەكنیكێن نەخشەیی".

 

 

    ئەڤ كۆنفرانسە هەشت پەنەلان بخۆڤەدگریت، لدۆر بابەتێن پلاندانان و رێڤەبرنا سەرچاوەیان، رێڤەبرن و پلاندانانا سەرچاوەیێن ئاڤێ‌، رێڤەبرن و پلاندانانا سەرچاوەیێن  مرۆڤی، سەرچاوەیێن رووپۆشا ئەردی، رێڤەبرن و پلاندانانا سەرچاوەیێن ئابووری، پەنەلێ‌ دویماهیێ‌ ژی دێ‌ دانوستاندنەك بیت لدۆر ناسناما جوگرافیێ‌، و دەرئەنجام و راسۆاردێن كۆنفرانسی ژی دێ‌ ل رۆژا دووێ‌ یا كۆنفرانسی هێنە پێشكێشكرن.