ل ژێر درووشمێ (رۆلێ ڤەكۆلینێن زانستی ل پێشخستنا زانستێ نوژداریا ددانان) هەردوو كۆلیژێن پزیشكیا ددانان ل زانكۆیا دهۆك، و زانكۆیا ئەلعیراقیە و ب هەڤكاری دگەل سەنتەرێ نون یێ ڤەكۆلین و خاندنێن تایبەتمەند دێ كۆنفرانسێ نێڤدەولەتی یێ سیێ و هەڤپشك یێ ئێكێ ب ناڤونیشان (پێشهاتێن سەردەمیانە ل زانستێ پزیشكیا ددانان) ل هەردوو رۆژێن چارشەمب و پێنج شەمب، سێ و چارێ چریا دووێ 2021 ل هۆلا كۆنفرانسان ل زانكۆیا دهۆك گێرن.
ژ ئارمانجێن گێرانا ڤی كۆنفرانسی هەروەكو د بەرنامێ كۆنفرانسی دا هاتیە بەلاڤكرن:
ـ پێشخستنا ڤەكۆلینێن زانستیە كو ستوینەكا گرنگە بۆ نیشادانا نویبوونان د ڤەكۆلینێن تایبەتمەند دا ل بوارێ پزیشكیا ددانان و پێشخستنا رێبازا كاری بۆ ڤەكۆلەر و ئەو كەسێن دڤی بیاڤی دا كار دكەن.
ـ ئەڤ كۆنفرانسە دێ بیتە ئامرازەك بۆ پێشخستنا لایەنێ زانستی و پیشەیی یێ نوژدارێن ددانان.
ـ لێكگوهورینا سەربۆران و زێدەكرنا زانینێ و شارەزایێن پیشەیی و ڤەكۆلینان د بیاڤێ پزیشكیا ددانان دا.
ـ پێشكێش كرنا چارەسەریێن باشتر بۆ نەخۆشان د بسپۆریێن جودا یێن پزیشكیا دەڤ و ددانان دا ژ وان ژی خزمەتێن پزیشكیا ددانان یێن پێشكێشی كەمپێن ئاواران دهێنەكرن،
ـ هەماهەنگیێ دناڤبەرا كۆلیژێن پزیشكی یێن ددانان و پشكێن زانستی یێن گرێدایی وان و بسپۆریێن دەگمەن د بیاڤێ پزیشكیا ددانان دا دێ خۆرتتر لێكەت.
ـ پێشكێش كرنا شیرەتكاریێن باشتر یێن پزیشكی ل هەمی بسپۆریێن پزیشكیا ددانان.
دڤی كۆنفرانسێ نێڤدەولەتی دا دێ 13 تەوەرێن زانستی یێن گرێدایی نوژداریا دەڤ و ددانان هێنە بەحس كرن، ب پشكداریا چەندین ڤەكۆلەر و مامۆستا و بسپۆرێن ڤی بیاڤی یە ژ چەند وەلاتێن جودا یێن جیهانی و هەروەسا ژ هەردوو زانكۆیێن دهۆك و ئەلعیراقیە و سەنتەرێ نون یێ ڤەكۆلین و خاندنێن تایبەتمەند.