ب چاڤدێریا كۆلیژا په‌روه‌ردا بنیات ل زانكۆیا دهۆك، ده‌زگه‌هێ زه‌كوات یێ ره‌وشه‌نبیری و هزری و هونه‌ری ل رۆژا 14/9/2021 كۆنفرانسێ زانستی یێ نێڤده‌وله‌تی یێ دووێ ل ژێر ناڤێ (خاندنێن زانینی د زانستێن مرۆڤی و كۆمه‌لایه‌تی دا) ل ناڤه‌ندا قوتابیان ل كه‌مپێ زانكۆیا دهۆك گێرا و بۆ دوو رۆژان دێ یێ به‌رده‌وام بیت.
سه‌رۆكێ زانكۆیا دهۆك، د. داود سلێمان ئه‌تروشی، ئه‌میندارێ گشتی یێ كۆنفرانسی د په‌یڤا خۆدا ئاماژه دا وێ چه‌ندێ كو به‌ستنا ڤان جۆره كۆنفرانسان بۆ لێكگوهورینا شاره‌زایان و ئه‌نجامێن ڤه‌كۆلینان ل دۆر لایه‌نێن جودا یێن زانستێن مرۆڤایه‌تی و كۆمه‌لایه‌تی.
گۆت ژی رۆلێ زانستێن مرۆڤایه‌تی و كۆمه‌لایه‌تی ل ڤه‌كرنا هزری و ره‌خنا جڤاكی نا هێنه پشتگوه هاڤێتن، چونكو ئه‌ڤ زانسته ل شرۆڤه‌كرن و تێگه‌هشتنا گرێكێن جڤاكی یێن سه‌رده‌میانه دێ به‌رسینگگرتنا هه‌ڤركیێن جیهانی كه‌ت، ئه‌م دبینین كو پێدڤیه چاڤخشاندنه‌ك ل ئاسویێن ئاینده‌یی یێن زانستێن مرۆڤایه‌تی و كۆمه‌لایه‌تی د كۆنفرانسه‌كێ نشتیمانی دا بهێته كرن، بۆ ڤه‌كرنا ده‌رگه‌هه‌كێ گشتگیر بۆ دانوستاندنێ ل دۆر ئایندێ پرۆسا فێركرنێ.
د په‌یڤه‌كی دا د. وسام احمد سه‌رۆكێ ده‌زگه‌هێ زه‌كوات یێ ره‌وشه‌نبیری و هزری و هونه‌ری و سه‌رۆكێ لژنا به‌رهه‌ڤكارا كۆنفرانسی سوپاسیا زانكۆیا دهۆك كر بۆ گێرانا ڤی كۆنفرانسی دگه‌ل كۆلیژا په‌روه‌ردا بنیات ل زانكۆیا دهۆك، و گۆت ژی گێرانا ڤی كۆنفرانسی گرنگیه‌كا تایبه‌ت یا هه‌ی ژ بۆ پێشڤه‌برنا شیانێن كاركرنێ و بازارێ كاری و بزاڤ بهێنه كرن كو زانستێن مرۆڤی و كۆمه‌لایه‌تی رۆلێ خۆ یێ راسته‌قینه ل ناڤا جڤاكی و سازیێن ئه‌كادیمی بگێریت.
د ڤی كۆنفرانسی دا ڤه‌كۆلین د شه‌ش بیاڤان دا دێ هێنه گه‌نگه‌شه كرن، ئه‌و ژی (ئه‌ده‌بی، یاسایی، زانستێن په‌روه‌رده‌ی، مێژو و جوگرافی، كارگێری و ئابووی و زانستێن ئیسلامی) د شه‌ش په‌نه‌لێن كۆنفرانسی دا و راسپارد و پێشنیار دێ هێنه راگه‌هاندن.