پارێزگارێ دهۆکێ د کۆنفرانسێ جینۆسایدێ دا: "پێدڤیە لدۆر جینۆسایدێ زانکۆ و ناڤەندێن زانستی رۆلەکێ باشتر بگێرن"
مارس 30, 2022, 10:48 م

 

 

   ئەڤرۆ زانکۆیا دهۆک کۆنفرانسێ نیڤدەولەتیێ سێیێ ب ناڤێ (جینۆساید د بیردانکا گەلان دا) ل هۆلا کۆنفرانسان ب ئامادەبوونا پارێزگارێ دهۆک و سەرۆکێ زانکۆیێ و هژمارەکا کەسانێن ئەکادیمی و بسپۆر ژ زانکۆیێن کوردستانی و سەنتەرێن بوارێ جینۆسایدێ و کەسانێن تایبەتمەند د ڤی بواری دا ل هەرێمێ و ل سەرانسەرێ جیهانێ دەستپێکر، کو پتر ژ ٤٠ ڤەکۆلینان ژ لایێ ڤەکۆلەرێن پێنج کێشوەرێن جیهانێ لدۆر جینۆسایدێ دێ هێنە پێشکێشکرن.

 

 

    ل دەستپێکێ و د پەیڤا خۆ دا د. عەلی تەتەر  پارێزگارێ دهۆکێ ندەک تێبینی لدۆر کارێ سازیێن ئەکادیمی پێشکێشکرن و گۆت: "ئەم کورد نەشیاینە مەزلۆمیەتا خۆ نیشا خەلکی بدەین و ب تایبەت د ئاستێ زانکۆیان و خواندنا بلند ڤەکۆلینێن ئەکادیمی دا، هەمی بوارێن ستەما دژی گەلێ کورد ب باشی و پراکتیکی نەکەتینە بەردەست"، هەروەسا تیژک ئێخستە سەر هژمارەکا تاوانێن مەزن یێن دژی زارۆک و پیر و ژنێن کورد هاتینە کرن و چیرۆکێن تراژیدی یین تژی هۆڤایەتی و دیارکر "تا نوکە کەس نەشیایە ب شێوەکێ وەسا ڤەگوهێزیت کو کارتێکرنێ ل رایا جیهانێ بکەت، پێدڤیە زانکۆ و ناڤەندێن زانستی د ڤی بواری دا ب رۆلێ خۆ راببن".

 

 

    سەرۆکێ زانکۆیا دهۆک د. داوود ئەتوروشی جەخت لسەر پەیڤا پارێزگارێ دهۆکێ کر و سۆز دا لدۆر ڤی بابەتی ب رژدی کاربکەن، ئاشکرا ژی کر کو وەزیرێ خواندنا بلند پشتەڤانە بۆ ڤان پرسێن کرنگ، دیار ژی کر کو زانکۆیا دهۆک کار لدۆر بابەتێ جینۆسایدێ کریە و پلان هەنە کو گرنگیەکا مەزنتر د پرۆژەیێن دەستنیشانکری دا ب ڤی بابەتی بدەت.

   

 

    هەروەسا د پەیڤا خۆ دا سەرۆکێ زانکۆیا دهۆک باس گرنگیا ڤان جورە کۆنفرانسان کر و گۆت: "جینۆساید بۆ زانکۆیا دهۆک بابەتەکێ هەرە گرنگە، چونکو گەلێ کوردستانی ئێک ژ وان گەلانە کو پترین هەوێن جینۆسایدێ دژی وی هاتینە ئەنجامدان. بۆ مە کوردان گەلەک گرنگە ئەگەر و ناڤەرۆک و دەرئەنجامێن جینۆسایدان ب شێوەیەکێ زانستی بزانین، داکو وان رێکاران ببینین کو ئەڤ هەوێن دژی گەلێ کورد و گەلێن جودایێن جیهانێ دووبارەنەبنە ڤە و د بیردانکا گەلێن جیهانێ دا زیندی بمینن".

 

 

    کۆنفرانسێ (جینۆساید د بیردانکا گەلان دا) ب سەرپەرشتیا سەنتەرێ بێشکچی یێ ڤەکۆلینێن مرۆڤایەتی و  سەنتەرێ ڤەکۆلینێن جینۆسایدان ل زانکۆیا دهۆک ب هەڤکاری دگەل  سەنتەرێ کوردولوجی ل زانکۆیا سلێمانیێ، دەستەیا کوردستانی بۆ دیراساتێن ئستراتیجی و ڤەکۆلینێن زانستی ل سلێمانیێ، سەنتەرێ ڤەکولینێن زانکۆیا چەرمۆ بۆ تاوانێن ئەنفال و جینۆسایدان و سازییا ئێزدیان بۆ بەرهنگاریا جینۆسایدێ هاتە سازکرن.