كۆلیژا پزیشكی ل زانكۆیا دهۆك ئەڤرۆ 27/4/2016 كۆنفرانسێ خۆ یێ زانستی یێ ئێكێ یێ ئافرەت و زاروكبوونێ ل ژێر درووشمێ (پێكڤە ب ئامادەبونا هندەک کومپانیان وەک کومپانیا ییی كار بكەین ژ بۆ باشتر كرنا ساخلەمیا ئافرەتان) ل هۆلا كۆنفرانسان ئەنجام دا ب ههماهەنگیا كومهك ژ كومپانیا ێن پزیشكى وهك (acino).
راگرا كۆلیژا پزیشكی د. سوزان حسێن ل رێورەسمێن ڤەكرنا كۆنفرانسی دا دیاركر كو دامەزراندنا كۆلیژا پزیشكی ژ بۆ بلندكرنا ئاستێ هشیاریا ساخلەمیا دەڤەرێ بوویە و ب شێوەیەكێ ئەكادیمی و زانستی و ئاڤاكرنا كادر و كەسانێن پزیشكی د هەموو بوارێن پزیشكی دا، نەخاسمە د وارێ نوژداریا نەخۆشیێن ئافرەت و زاروكبوونێ.
د. سوزان حسێن گۆت ژی قەیرانا دارایی ئەوا هەرێما كوردستانێ و عیراق تووش بویێ كارتێكرنەكا مەزن ل هەموو بوارێن ژیانێ كریە، بەلێ ب خەمخۆری و خۆراگریا مامۆستا و ستاف و ڤەگێرێن كۆلیژا پزیشكی و هەستكرن ب بەرپرسایەتیەكا مەزن مە شیایە ئەڤێ ئاستەنگێ دەرباز بكەین و ب هەماهەنگی و هاریكاریا چەند ژ كومپانیێن ساخلەمی و پزیشكی یێن دهۆكێ كۆنفرانسێ خۆ ئەنجام بدەین.
سەرۆكێ زانكۆیا دهۆك پرۆفیسۆر د. مسلح دهۆكی د پەیڤەكی دا گۆت دوهی مە كۆنفرانسێ تایبەت ب پێشخستنا كەرتێ چاندنێ ئەنجام دا و ئەڤرۆ كۆنفرانسی زانستی یێ ئافرەت و زاروكبوونێ، و دیار ژی كر كو گێرانا ڤان هەردو كۆنفرانسان د ئێك دەم دا چونكو هندەك ئارماج هەردوو كۆنفرانسان دگەهیننە ئێك ئەو ژی خزمەتا جڤاكی و پێشخستنا وی یە، ژ بلی شێوێ زانستی و ئەكادیمی و بەشەك ژ ئەركێ زانكۆیێ و مامۆستاێن پزیشكی.
پرۆفیسۆر د. مسلح دهۆكی هەروەسا گۆت ئەز دبینم پێنگاڤەكا مكومە ژ بۆ پێگەهشتن ب نویترین و پێشكەفتی ترین ڤەكۆلینێن زانستی هەروەسا ئالوگوركرن و تێكەلبوونا پەیوەندیان و بیر و بۆچوونان د ڤی بیاڤێ كاریگەر دا، هەروەسا ئەز دبیم ئەڤ بابەتە بەشەكە ژ بنیاتێ ئاڤاكرنا جڤاكەكێ ساخلەم و ئەگەر مەشیا ئاستێ خەلكی بگەهینە خالێن پێشكەفتی د بیاڤێ ساخلەمیا دایكبوونێ و پاراستنا ژیانا دایكێ و تەندروستی یا وێ ئەڤە رامانێ دەت ئەم یێ بنیاتێ جڤاكەكێ ساخلەم و دروست بنەجه دكەین، ئانكو ئەم یێ هەر ژ بونا زاروكان هزر ل پاراستنا ژیانا دایكێ و ساخلەمیا وێ دكەین.
سەرۆكێ زانكۆیا دهۆك ئاماژە دا وێ چەندێ ژی كو زانكۆیا دهۆك ب ئەنجامدانا ڤی كۆنفرانسی یا سەر بلندە لەورا ئەم چاڤەرێینە بۆ كۆنفرانسەكێ سەركەفتی و ڤەكۆلینێن كۆنفرانسی جهێ خوبگرن و ببنە پالدەرەك بۆ باشتر كرنا ژیانا دایكێ و زانستێ زاروك بوونی و چاوانیا مفا وەرگرتن ژ تەكنەلۆژیایێ و ڤەكۆلینێن پیشكەفتی.
د. كەریم عەبدول نوونەرێ وەزیرێ خواندنا بلند و ڤەكۆلینێن زانستی د پەیڤەكی دا گۆت گومان د وێ چەندێ دا نینە كو خزمەتگوزاریێن ساخلەمی دەمێ ل وەلاتەكی د هێنە بەردەست كرن ئەڤە پیڤەرەكێ گرنگە بۆ خزمەت كرنا وەلاتیان ل وی وەلاتی، ئەو ژی دیاركر كو وەزارەتا خواندنا بلند و ڤەكۆلینێن زانستی گرنگی دایە لایەنێ پزیشكی و نوكە ل هەرێما كوردستانێ سێ كۆلیژێن پزیشكی یێن گشتی و چار كۆلیژێن پزیشكی یێن ددانان و سێ یێن دەرمانسازی و دوو یێن پەرستاری ل زانكۆیێن هەرێمێ یێن هەین، ژ بلی چەندین پشكێن ساخلەمی و پزیشكی ل پەیمانگەهێن تەكنیكی یێن هەرێمێ.
ئەڤ كۆنفرانسە دێ بۆ دەمێ دو روژا ڤەكێشیت و تێدا چەندین بابەتێن گرێدایی نەخۆشیێن ئافرەت و زاروك بونێ هێنە گەنگەشە كرن.