ب مەرەما پتر هایداربوونێ ل دۆر پرۆژە و بەرنامێن هەڤپشک د ناڤبەرا زانکۆیا دهۆک و وەلاتێ ئەمریکا دا و بهێزترکرنا هەڤکاری و هەماهەنگیێ، ئەڤرۆ رێکەڤتی ١٧ـی چریا ئێکێ ٢٠٢٣، مارک سترۆ، قونسلێ گشتیێ ئەمریکا ل هەولێرێ گەهشتە زانکۆیا دهۆک و ژ لایێ د. داود سلێمان ئەتروشی ڤە، سەرۆکێ زانکۆیا دهۆک هاتە پێشوازیکرن.
د روینشتنەکێ دا ل کوژیێ ئەمریکی ل زانکۆیا دهۆک، و ب ئامادەبوونا تیمەکێ قونسلخانەیا گشتی یا ئەمریکی ل هەولێرێ، هەروەسا ستافێ نڤیسینگەها پەیوەندیێن ناڤدەولەتی ل زانکۆیا دهۆک، سەرۆکێ زانکۆیا دهۆک ب گەرمی پێشوازیا شاندێ مێڤان کر و کار و پرۆژێن زانکۆیا دهۆک بۆ دانە نیاسین و باس ل پەیوەندیێن ناڤدەولەتیێن فراوان یێن زانکۆیا دهۆک کر، کو زانکۆیا دهۆک د ڤی بواری دا وەکو پێشەنگ ل دەڤەرێ دهێتە نیاسین. هەروەسا د. رەند حەمۆدی رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک باس ل هژمارەکا پرۆژێن زانکۆیا دهۆک ل گەل وەلاتێ ئەمریکا کر، کو تا راددەکێ گەلەک باش سەرکەڤتینە.
ژ لایێ خۆ ڤە، قونسلێ گشتیێ ئەمریکا پەسنا کار پرۆژێن سەرکەڤتی یێن زانکۆیا دهۆک کر و دیارکر کو کوژیێ ئەمریکی ل زانکۆیا دهۆک چالاکانە کاردکەت و ئەزمۆنەکا سەرکەڤتی تۆمارکریە و دەستخۆشی ل رێڤەبەرێ وێ مەحمود چاچان جمعە کر بۆ کار و چالاکیێن د چارچۆڤێ ڤی کوژی دا ئەنجامداین.
ل دویڤ دا شاندێ قونسلیا گشتی یا ئەمریکی ل هەولێرێ روینشتنەک ل گەل هژمارەکا خۆبەخشێن د چارچۆڤێ کوژیێ ئەمریکی دا کاردکەن ئەنجامدا و تێدا دەستخۆشی ل وان کر بۆ کار و خزمەتێن وان، هەروەسا سۆپاسنامەیێن رێزلێنانێ پێشکێشی وان کرن.
راگەهاندنا زانکۆیا دهۆک؛ ١٧ـی چریا ئێکێ ٢٠٢٣
وەرگێران: فاطمة محمود و مێڤان محمد صالح
فۆتۆ: عەلی بانکی