د راگەهاندنەکێ دا سەرۆكێ زانكۆیا دهۆک، د. داود سلێمان ئەتروشی، سەرەدانا شاندێ وەزارەتا خواندنا بلند و ڤەکۆلینێن زانستی بۆ وەلاتێن ئەلمانیا و بەلجیكا ل ئەوروپا، ب سەرەدانەکا بەرهەمدار و پڕی دەستکەڤت سالۆخدا.
شاندێ ناڤبری ل ٢٤ـێ تا ٢٩ـێ ئیلۆنێ ٢٠٢٣ سەرەدانەک بۆ دەستەیا ئەلمانی یا لێكگوھۆریا ئەكادیمی DAAD ل وەلاتێ ئەلمانیا و چەندین سازیێن ئەکادیمی ل باژیرێن جودا ل ئەلمانیا و بەلجیکا کر، کو پێکهاتبوو ژ راوێژكارێ وەزیرێ خواندنا بلند، و رێڤەبەرێ گشتی یێ شاند و پەیوەندیێن رەوشەنبیری ل وەزارەتێ و سەرۆكێن زانكۆیا دھۆك، زانكۆیا سەلاحەدین، زانكۆیا پۆلیتەكنیكیا سلێمانی، زانكۆیا پۆلیتەكنیكا دھۆك.
شاندێ ناڤبری سەرەدانا چەندین سازیێن حكومی و ئەكادیمی ل وەلاتێ ئەلمانیا ژ وان ل باژێرێن "فرانكفۆرت، شتوتگارت، بۆن، كۆلن و ئاخن" کر. ئێک ژ ئارمانجێن سەرەدانێ جەختكرن بوو ل سەر بەردەوامیدانا پالپشتیا دەستەیا ئەلمانی یا لێكگوھۆریا ئەكادیمی DAAD بۆ زانكۆیێن ھەرێما كوردستانێ و ئەنجامدانا ھەماھەنگیا زێدەتر ل سەر پرۆژێن ھەڤپشك ل ناڤبەرا زانكۆیێن ھەرێمێ و دەستەیا ئەلمانی یا لێكگوھۆریا ئەكادیمی.
سەرۆكێ زانكۆیا دهۆک دەربارەی ئەنجامێن ڤێ سەرەدانی دیارکر كر کو پلانێن داهاتی د بیاڤێ پرۆژە وچالاكیێن جودا دا هاتینە دانان و راگەهاند "پێدڤیە کار بۆ ناڤدەولەتیکرنا زانکۆیێن هەرێما کوردستانێ بهێتەکرن، دا كو ل سەر ئاستێ جیهانی پێشبكەڤین و پێشبركێیا زانكویێن جیهانی بكەین، نە ب تنێ زانکۆیێن لۆکال بین". سەرۆكێ زانكۆیا دهۆك ئەوژی دیارکر "سیاسەتێن تایبەت ب مەبەستا زێدەكرنا لێكتێگەهشتنێ و پەیوەندیكرنێ وناڤدەولەتیكرنا زانكۆیێن هەرێما کوردستانێ ژ لایێ وەزارەتا خواندنا بلند ڤە هاتینە دارێژتن".
ژ لایەکێ دی ڤە،د. داود ئەتروشی دیارکر کو دەلیڤەێین زۆر دێ ل بەر دەست بن بۆ چوونا ستافێ كارگێری و ئەكادیمی و قوتابیێن بەکالۆریۆس و خواندنا بلند بۆ دەرڤە ب مەرەما مفاوەرگرتنا ئەکادیمی و زانستی، کو كو مەرەمەکا ڤێ سەرەدانێ پەیداكرنا ئاشنابوونەکا زێدەتر بوو ل گەل DAAD بۆ بەرفرەهكرنا بوارێن هاریكاریا وێ ل گەل زانكۆیێن هەرێما کوردستانێ.
هەر د سەرەدانێ دا، شاندێ هەرێما كوردستانێ سەرەدانا فەرمانگەها بلند یا متمانەبەخشینا ئەكادیمی ل باژێرێ بۆن كر و دانوستاندن ل دۆر چەوانییا هاریكاریا ڤێ فەرمانگەهێ بۆ هەرێما كوردستانێ هاتە کرن. ل دۆر ڤێ یەکێ، د. داود ئەتروشی دیارکر "د نوكە دا ل هەرێما كوردستانێ ژی فەرمانگەها متمانەبەخشینا نیشتیمانی هاتیە دامەزراندن و ژ لایێ سەرۆكێ حكومەتێ ڤە دهێتە سەرپەرشتیکرن".
دیسان سەرۆكی زانكۆیا دهۆك خویا كر کو دەستخۆشی ل زانكۆیا دهۆك هاتە كرن ژبەركو زانكۆیەكا چالاكە و گەلەك پرۆژە و بەرنامەیان ب پالپشتییا لایەنێن ئەوروپی ئەنجامددەت. د ڤی بواریدا ناڤبری گۆت "مە داخوازا پشتەڤانیا وان، هەروەسا داخوازا ئەندامەتیا گرۆپێن وان كر. هەرچەندە ئەڤ پرۆسە یا ب ساناهی نینە، بەلێ پێنگاڤەكا باش ل سەر ئاستێن سیاسی هاتنە هاڤێتن، هەژی گوتنێ یە كو ل ئەلمانیا و ل بەلجیكا ب بەردەوامی ناڤێ زانكۆیا دهۆك د هاتە گۆتن كو یا چالاك و خەمخۆرە د بوارێن هەڤكاری و پرۆژان دا. ئەڤ چەندە دبیتە ئەگەر، ئەم وەكو زانكۆیا دهۆك، لێگەریانا دەلیڤێن پتر بکەین، داكو زانكۆیا دهۆك گەشەكرنەكا بهیزتر ب خۆ ڤە ببینیت". پاشی سەرۆکێ زانکۆیا دهۆک داخواز ژ ستافێن زانكۆیا دهۆك کر بۆ سالا نوی یا خواندنێ زێدەتر بەرێ خو بدەنە وان دەلیڤێن هەین یێن ماددی و مەعنەوی بۆ كارێن مەزنتر. ژبەرکو زانکۆیا دهۆک رێککەڤتنامێن لێكتێگەهشتنێ ل گەل لایەنێن ناڤخۆیی و ناڤدەولەتی هەنە و ب گرنگ زانی مفا ژێ بهێتە وەرگرتن.
ژ لایەكێ دی ڤە، سەرۆكێ زانكۆیا دهۆك دیار كر كو ژمارەكا پرۆژا هاتینە ئەنجامدان و چەندین ژ وان ژ ستافێ زانكۆیێ دەستپێكر بوون و هندەك ژی نڤیسینگەها پەیوەندیێن ناڤدەولەتی پێ رابوویە. سەرۆكێ زانكۆیێ ل دۆر ڤێ یەکێ راگەهاند "ئەم دێ هەوەكا هشیاركرنێ ئەنجامدەین بۆ دیاركرنا وان دەلیڤێن هەین ژ لایێ ئێكەتیا ئەوروپی و ئیراسمۆس ڤە و ل ئەلمانیا ب تایبەتی"، و پێشنیار كر كو درەچوویێن زانكۆیا دهۆك و زانكۆیێن دی یێن هەرێمێ ئەوێن كو حەزا بەردەوامیدانێ ب خواندنا خۆ هەبیت یان پشکداری كۆرس و راهێنان و بەرنامێن خواندنێ ببیت ل وەلاتێن دەرڤە، سەرەدانا وێبسایتێن ڤان فەرمانگەھـ سازیێن ئەكادیمی بكەن و ل وێرێ دێ ب سەدان دەلیڤا بینن بۆ چوونا ڤان وەلاتان، چ بۆ بدەستڤەئینانا باوەرنامێن پیشەیی یان ژی ئەكادیمی.
ل دوماهیێ، سەرۆكێ زانكۆیا دهۆك، ب ناڤێ زانكۆیا دهۆك سوپاسییا سازییا DAAD كر بۆ پشتەڤانیا وێ یا بەردەوام بۆ زانكۆیا دهۆك، كو ئەڤە زێدەتری ٢٠ سالە ژ ژیێ زانكۆیێ DAAD یا هاریكار و پشتەڤانە، و سێ پشکێن زانستیێن زانكۆیێ ب هەڤكارییا ڤێ سازیێ کاردکەن. هەروەسا سوپاسیا كۆمسیۆنا ئەوروپی كر بۆ بەردەوامیدانا هاریكاریا وان و پالپشتییا وان یا دارایی بۆ زانكۆیا دهۆك ب رێكا بەرنامێ ئیراسمۆس ب هەمی خەلەكێن خۆ ڤە، كو ب دەهان پرۆژە هاتینە رێكخستن و ئەڤ هاریكاریە پالدەر بووینە زانكۆیا دهۆك بگەهیتە ئاستێن ناڤدەولەتی.