قونسلخانا گشتیا یۆنانی ل هەولێرێ نامەکا فەرمی ئاراستەى وەزارەتا خواندنا بلند و ڤەکۆلینێن زانستی کر و تێدا دەستخۆشیێن گەرم ئاراستەى وەزارەتا خواندنا بلند و ڤەکۆلینێن زانستی کر بۆ وان دەستکەڤتێن هەری باشێن ب رێکا سیستەمێ بەرز یێ زانین و فێرکرنێ و ڤەکۆلینان ل زانکۆیێن حکومی یێن هەرێما کوردستانێ بدەستڤەهاتین.

هەر دڤێ نامێ دا، ئاماژە ب وێ یەکێ هاتە کرن کو ژبەر کوالێتیا باش یا ئاستێ خواندن و ڤەکۆلینان ل زانکۆیێن حکومیێن هەرێما کوردستانێ، وەلاتێ یۆنانێ ب دلخۆشی ڤە بریاردا دانپێدانەکا فەرمی ب باوەرنامێن دەرچوویێن زانکۆیێن حکومی یێن هەرێما کوردستانێ و زانکۆیا ئەمریکی یا سلێمانیێ بکەت. ئەڤە پشتی پرۆسێسا نرخاندن و هەلسەنگاندنێ ئەوا ژ لایێ سەنتەرێ هێلێنیک یێ ئەکادیمیێ ناڤدەولەتیێ تایبەت ب دانپێدانا پێزانینان (DOATAP) ڤە هاتیە ئەنجامدان، کو تێدا دیاربوویە کوالێتیا خواندنێ ل زانکۆیێن حکومەتا هەرێمێ ل ئاستێ پێدڤیە ل دویڤ پیڤەرێن دەستنیشانکری ژ لایێ سەنتەرێ ناڤبری ڤە.

ژ لایەکێ دی ڤە، باس ل گرنگیا ڤێ بریارێ هاتە کرن بۆ بهێزکرنا پەیوەندیێن ئەکادیمی د ناڤبەرا وەلاتێ یۆنان و حکومەتا هەرێما کوردستانێ دا، کو مەرەم پێ پێشڤەبرنا رێکێن داهێنانێ یە بۆ چارەسەرکرنا هەڤرکیێن سەردەمانە و هەروەسا بۆ بهێزکرنا پەیوەندیان د بوارێ خواندن و ڤەکۆلینێن ئەکادیمی و زانستی دا.

ل دوماهیێ، قونسلخانا گشتیا یۆنانی ل هەولێرێ پیرۆزباهیێن گەرم ئاراستەی وان زانکۆیان دکەت ئەوێن دانپێدان ب باوەرنامێن وان یێن ئەکادیمی ژ لایێ وەلاتێ یۆنان ڤە هاتیەکرن، کو ئەڤ پێنگاڤە دەستپێکەکا باشە بۆ بهێزکرنا پەیوەندیان د بەرژەوەندیا قوتابی و ستافێ ئەکادیمی دا.

ل دویڤ ڤێ دانپێدانێ، هەمی دەرچوویێن زانکۆیێن حکومی یێن هەرێما کوردستانێ، ئەوێن دانپێدان ب باوەرنامێن وان هاتیە کرن، ماف هەیە ب رێکا ڤی لینکی ل خوارێ پێشکێشی خواندنا ماستەرێ بکەن (١٥٠ کورسی) ب مەرەما تمامکرنا خواندنا خۆ ل زانکۆیێن حکومی ل وەلاتێ یۆنان کو ئەڤ زانکۆیە ل سەرانسەری ئۆروپا باوەرپێکرینە.

https://masters.minedu.gov.gr/masters/index/en

راگەهاندنا زانکۆیا دهۆک؛ ١٣ـی نیسان ٢٠٢٣

فرمێسک حەسۆ