ب دەستپێشخەریا سەرۆکاتیا زانکۆیا دهۆک و ب هاریکاریا وەزارەتا خواندنا بلند و ڤەکۆلینێن زانستی، ئەڤرۆ رێکەڤتی ٨/٦/٢٠٢٢ وەزارەتا پەروەردێ بریاردا کو ئێدی دەرچوویێن پشکا خواندنێن ئاشتیێ و مافێ مرۆڤی، دشێن ببنە مامۆستایێن بابەتێن کۆمەلایەتی ل قوتابخانەیێن هەرێما کوردستانێ وەک وانەبێژ ئەگەر میلاک کێم ببیت، یانژی هەکە دەلیڤێن دامەزراندنێ هەبن ماف هەیە وەکو مامۆستایێن وان بابەتان بهێنە دامەزراندن.
ئەڤ بریارا وەزارەتا پەروەردێ ژ کۆمبوونەکا سەرۆکێ زانکۆیا دهۆک د. داود سلێمان ئەتروشی دگەل نوینەرێن قوتابی و دەرچوویێن پشکا خواندنێن ئاشتیێ و مافێ مرۆڤی ل کولیژا زانستێن مرۆڤایەتی ل زانکۆیا دهۆک دەستپێکر، دەمێ سەرۆکێ زانکۆیا دهۆک ل ماوێ بۆری پێشوازیا وان کری و گوهداریا گازندەیێن وان کری کو سەرەرای هەبوونا گەلەک بابەتێن گرێدای بسپۆریا وان ل قوتابخانەیان، رێنمایێن کارگێری نینن کو ببنە وانەبێژ، و ژ لایێ خۆ ڤە سەرۆکێ زانکۆیا دهۆک سۆز دایی ب رژدی دویڤچوونا ڤی بابەتی بهێتە کرن.
پشتی سەرۆکاتیا زانکۆیا دهۆک ب ئاوایەکێ فەرمی ئەڤ گازندە گەهاندیە وەزارەتا خواندنا بلند و ڤەکۆلینێن زانستی و ب بەردەوامی دویڤچوون کری، وان ژی ژ لایێ خۆ ڤە ب ئاوایەکێ فەرمی ئەڤ بابەتە بۆ وەزارەتا پەروەردێ ئاراستەکری، ئەڤرۆ مزگینیەک بۆ قوتابیێن پشکا ناڤبری هات و ئێدی ئەڤ مافە ب نڤیسارەکا فەرمی پێ هاتە دان.