د دەستپێشخەریەكا پێشەنگ دا، كۆلیژا دەرمانسازی ل زانكۆیا دھۆك پرۆژەیەكێ ریسایكلكرنێ جێبەجێكر كو روینێ بكارھاتی بۆ سابوینەكا ژینگەھ دوست ڤەدگوھێزیت، ئەڤ چەندە ژی پەرەپێدانا زانین پێگەھشتنا ژینگەھێ ل دەف قوتابیا دكەت، ئەڤ دەستپێشخەریە ب سەرپەرشتیا د. سوعاد ئەلقەس و مامۆستایا بەرازیلی د. دانییلی سوزیت بیرسیكی و ب پشكداریا ٢٥ قوتابیا ژ قوناغا سێیێ ل تاقیگەھێن كۆلیژێ ھاتە ئەنجامدان.
ئارمانجا ڤی پرۆژەی، رەوشەنبیركرنا قوتابیا بوو ل دۆر ئەنجامدانێن جیھانی بۆ بەرھەمئینانا سابوینێ ژ روینێ بۆ دروستكرنا خوارنێ دھێتە بكارئینان، دیسان ھاندانا چارەسەریێن ئابووری و ژینگەھ دوست. ئەوژی ب رێكا ریسایكلكرنا روینێ خوارنێ ل دشوینا ھاڤێتنا وی، ئەڤ پرۆژە نە ب تنێ پەرەپێدانا ژیانا بەردەوام دكەت، بەلكو شیانا دروستكرنا سابوینێ ب بوھایێن گونجای ل مالێن خۆ ب تاكێن جڤاكی ددەت.
زێدەباری ڤێ چەندێ، كاریگەریا پرۆژەی بەرەڤ خیڤەتگەھێن پەنابەر و ئاوارەیان دچێت، كو ئاكنجیێن وان ل سەر چەوانیا بەرھەمئینانا ئەڤی جۆرێ سابوینا ژینگەھ دوست دھێنە فێركرن، كو د ئەنجام دا خەرجیێن وان كێمتر لێدھێن. دەربارەی ڤی پرۆژەی د. سوعاد ئەلقەس جەخت ل سەر ئارمانجێن پرۆژەی كر و ئاماژە ب سەركەڤتنا جێبەجێكرنا وی د دەمێ بۆری دا دا.
ھەژی ئاماژەدانێ یە، پرۆسێسا بەرھەمئینانا سابوینێ ژ روینێ بكارھاتی ب رێكا تێكەلكرنا روینێ بكارھاتی ل گەل ھایدروكسیدێ سودیومی دھێتە ئەنجامدان، كو مادەیەكێ كیمیایی یێ بەردەستە، ئەڤەژی ل دویڤ رێبازەكا زانستی یا پشتبەستنكری ل سەر ئاستێ جیھانێ بۆ بەرھەمئینانا بەرھەمێن ژینگەھ دوست و ب بھایەكێ نزم.
راگەھاندنا زانكۆیا دھۆك؛ ٢٢ـی چریا ئێكێ ٢٠٢٣
فاطمة محمود
وەرگێران: ماھر كێستەیی
فۆتۆ: كەمال