ل رێکەفتی ٢٧ـی چریا دووێ، ٢٠٢٤، ل هۆلا پێشمەرگە ل ناڤەندا قوتابیان، سەنتەرێ بێشکچی بۆ ڤەکۆلینێن مرۆڤایەتی ل زانكۆیا دهۆك و ب هەڤکاری و هەماهەنگی یا پشکا مێژوویێ ل کۆلیژا زانستێن مرۆڤایەتی و پشکا مێژویێ ل کۆلیژا پەروەردا بنیات، دیدارا "سەلاحەدین ئەیووبی، د ناڤبەرا دانانا دەولەتا کوردی و رولێ دیرۆکێ دا"، ب ئامادەبوونا د. داوود سلێمان ئەتروشی، سەرۆکێ زانکۆیا دهۆک، و د.عەلی تەتەر، پارێزگارێ دهۆکێ و هژمارەکا ماموستایێن تایبەتمەند و ۆسریءی زانکۆیێ ئەنجامدا.

ل دەستپێكێ، د.عەلی تەتەر، پارێزگارێ دهۆکێ د پەیڤەکێ دا باس ل رۆل و پێگەهێ سەلاحەدین ئەیوبی کر د دیرۆکێ دا، و گۆت كو سەلاحەدین ئەیوبی ژ بنەمالەکا کوردی بوویە ئەم شانازیێ پێ دکەین. گۆت ژی سەلاحەدین ئەیوبی نەبتنێ سەرکردەکێ کورد بوویە بەلکۆ سەرکردەکێ جیهانی بوویە ، د سەردەمێ خو دا شیایە چەندین کارێن مەزن بجهبینیت و تا نها د دیارن وەکو دروستکرنا کەلها و قوتابخانان.

ل دویڤ دا، د. محمد سالح زێباری پەیڤەك پێشكێشكر ل دۆر پەیوەندیێن دەولەتا ئەیووبی ل گەل سەلجوقیێن ئاسیا بچویک ل سەردەمێ سولتان سەلاحەدینی (١١٧٤-١١٨٩ز) . و تێدا دیاركر كو سەلاحەدین ئەیووبی ل چارێکا دوماهیا سەدێ دوازدێ زایینی د ناڤ جیهانا موسولمانان دا سەرکردێ ئێکێ و بێ رکابەر بوو. وباس كر ژی كو سەلاحەدین ئەیووبی پەیوەندیێن دبلوماسیێ یێن باش هەبوون د هەمی لایەنان دا ل دەڤەرێ ب تایبەت دگەل سەلجوقیێن ئاسیا بچویک.

د پەنەلەکێ دی دا، د. حکیم احمد مام بکر، ماموستایێ زانکۆیا سەلاحەدین باس ل رەهەندێ مرۆڤایەتی ل ژیاننامە و رەفتارێن سەلاحەدین ئەیووبی کر و گۆت ئەو تشتێ سەلاحەدین ئەیووبی جودا دکەت ژ سەرکردێن دی ئەوە كو سەلاحەدین ئەیووبی سەرکردەکێ جیهانی بوو، گۆت ژی سەلاحەدین ئەیووبی شیا ئاشتی یا چڤاکی د ناڤبەرا هەمی نەتەوەیێن جودا جودا دا دروس بکەت ،

د. زاهیدا محمد طە، د پەنەلەکی دی دا باس ل سوارچاکی یا سەلاحەدین ئەیوبی کر و گۆت سەلاحەدین ئەیووبی د گەلەک بیاڤێن جودا جودا دا شارازاییەکا باش د هونەرێ چەنگی دا هەبۆو. ئەڤ هۆکارە بوونە هۆکارێت سەرکەفتنێن وی.

پاشی، د.کەرەڤان محمد ئەحمد، ماموستایێ زانکۆیێ د پەنەلێ دوماهیێ دا ب ناڤێ سەلاحەدین ئەیووبی د ناڤبەرا دانانا دەولەتا کوردی و ژیوارێ مێژوویی دا، باس ل هۆکارێن دروستنەکرنا دەولەتا کوردی ژ لایێ سەلاحەدین ئەیووبی ڤە و جوداهی یا هزر و بیرێن وی سەر دەمی و نۆکە كر.

و ل دۆماهیا ڤێ دیدارێ، و پشتی هەمی پەیڤداران نامێن خو گەهاندینە ئامادەبوویان، دانوستاندنێن چالاك د ناڤبەرا ئامادەبوویان دا ب رێڤەچوون و خەلاتێن بەژداربوونێ ب سەر پەیڤداران دا هاتنە دابەشکرن .

بۆ دیتنا دیمەن و گۆتارا پارێزگارێ دهۆک، لینکێ ل خوارێ کلیک بکە:

https://youtu.be/UntlkGZ0D7U?si=3A8CvsBfWOcHVvLX

راگەهاندنا زانكۆیا دهۆك،٢٧ـی چریا دووێ، ٢٠٢٤

نيبارێ حاجی

فۆتۆ: عەلی بانكی، هەرمان جانگیر