به‌شێن نافخۆ

زانكۆیا دهۆك كومەلگەهێن پشكێن ناڤخۆیی یێن كچان بناڤێ‌ دوو شەهیدێن ئافرەت بناڤكرن
April 29, 2019, 11:35 a.m.

ل ژێر چاڤدێریا پرۆفیسۆر د. مصلح دهۆكی سەرۆكێ زانكۆیا دهۆك رێڤەبەریا پشكێن ناڤخۆیی ل زانكۆیێ‌ رێورەسمەك ب هەلكەفتا بناڤكرنا كومەلگەهێن پشكێن ناڤخۆیی یێن كچان ل زانكۆیێ‌ ب ناڤێ‌ (شەهید شیفا گەردی) و (شەهید كوردستان سالح) ل رۆژا 25/2/2019 ئەنجام دا. 

د رێورەسمان دا كومەلگەهێ‌ پشكێن ناڤخۆیی یێن كچان ل كەمپێ‌ زانكۆیێ‌ ب ناڤێ‌ شەهید شیفا گەردی ڤەكرن و هەروەسا كومەلگەهێن دیتر یێن پشكێن ناڤخۆیێن كچان ل دەرڤەی كەمپێ‌ زانكۆیێ‌ ب ناڤێ‌ شەهید كوردستان سالح بناڤكرن.

د پەیڤەكی دا ل رێورەسمێن ڤەكرنێ‌ سەرۆكێ‌ زانكۆیا دهۆك پ. د. مصلح دهۆكی گۆت شەهید كوردستان سالح زاخۆیی ئەو كچا 16 سالی كو قوتابیا پۆلا دووێ یا خانەیا مامۆستایان بوو ل دهۆكێ، ل رۆژا 16ی نیسانا سالا 1974 دەمێ ژ خواندنێ‌ د زڤریە ڤە و پەرتووكێن وێ ل گەل دا بوون، بەرامبەر ئامادەیا كاوە ل دهۆكێ، مرۆڤ كوژێن بەعسیا ئەڤ ستێرا گەش شەهید كرن، كو بابێ كوردستانێ ژی، سالح حامد زاخۆیی ل سالا 1964 ل باژێرێ‌ میسل، ژبەر هەلویستێ وی یێ كوردایەتی هاتبوو سێدارەدان، هەروەسا شەهید شیفا گەردی ژی ل رۆژا 25 ی شوباتا سالا 2017 دەمێ‌ رۆمالكرنا شەرێ‌ ئازادكرنا میسل ژ دەستێن تیرورستێن داعش هاتیە شەهید كرن.

گۆت ژی زانكۆیا دهۆك دوو كومەلگەهێن پشكێن ناڤخۆیی یێن كچان ب ناڤێ‌ شەهیدێن ئافرەت بناڤكرن، وەكو رێزگرتن بۆ گیانێ‌ پاكێ‌ ڤان هەردوو شەهیدان و هەروەسا سمبولەك بیت بۆ هەمی شەهیدێن كوردستانێ‌، چونكو د بزاڤا رزگاری خوازا كوردی دا و ل خەباتا چیایی و ل سەردەمێن نوی ژی ئافرەتا كورد یێ‌ سەلماندی كو خوادن شیان و ئیرادە و هزرو بیرێن نەتەوەی نە، سال بۆ سالێ‌ جهێ‌ خۆ پتر ل داناڤ هەمی كاران دا دیار دكەن و شین دەستێن وان د ئاشكرانە. 

دایكا شەهید شیفا گەردی د كورتە پەیڤەكی دا سوپاسیا سەرۆكاتیا زانكۆیا دهۆك كر بۆ ڤێ‌ بناڤكرنێ‌، هەروەسا برایێ‌ شەهید كوردستان سالح ژی دەست خۆشی ل زانكۆیا دهۆك كر كو خیشكا وان یا شەهید ل بیر ئینایە و كومەلگەهەكا پشكێن ناڤخۆیی ب ناڤێ‌ وێ‌ بناڤكرینە. 

ل دووماهیا رێورەسمان ژی دوو لوگو وەكو رێزگرتن ژلایێ‌ سەرۆكێ‌ زانكۆیا دهۆك ڤە هاتنە پێشكێش كرن بۆ مالباتێن ڤان هەردوو شەهیدێن ئافرەت.