دەربارەی سەنتەرێ راهێنانا پێداگوجى و پەرەپێدانا ئەکادیمى
دەربارەی سەنتەری
سەنتەرێ ڕاهێنانا پێداگۆجی و پەرەپێدانا ئەكادیمی ل زانكۆیا دهۆك، ب بڕیارا وەزاری یا ژمارە (١٧٢٢) ل ڕێكەفتی ٢ی تشرینا ئێكێ یا ساڵا ٢٠١٩ێ هاتیە دامەزراندن، كو تایبەتە ب گەشەپێدانا ئەكادیمی و ڕاهێنانا پێداگۆجی. سەنتەر راستەوخۆ ل ژێر چاڤدێری و سەرپەرشتیا نڤێسینگەها هاریكارێ سەرۆكێ زانكۆیێ بۆ كاروبارێن زانستی و خواندنا بلند كار دكەت.
ب ڕێكا پێشكێشكرنا كۆمەكا بەرفرەهـ ژ پڕۆگرامێن ڕاهێنانا ئەكادیمی و تەكنیكی، وۆركشۆپ، سمینار، پڕۆگرامێن بەخشینا باوەرنامان، و چالاكیێن گەشەپێدانا پیشەیی، سەنتەر خزمەتا زانكۆیێ، سازیێن ئەكادیمی و حكومی یێن دەڤەرێ، ڕێكخراوێن نەحكومی، و جڤاكێن دەوروبەر ل دەڤەرێ دكەت. پڕۆگرامێن سەنتەری ژ لایێ ئەكادیمی و مامۆستا و پسپۆرێن خودان شیان ل زانكۆیا دهۆك، هەروەسا شارەزایێن سازیێن دەڤەرێ و نیڤدەولەتی دهێنە پێشكێشكرن.
پڕۆگرامێن ڕاهێنانێ یێن سەنتەری ب شێوەیەكی هاتینە دارشتن كو شێوازێن وانەگۆتنێ بهێز بكەن و كوالتیا خواندنا بالا بلند بكەن ب ڕێكا پێشخستنا شێوازێن سەردەمیانە وەك: فێربوونا قوتابی-ناڤەند، شیانێن دیجیتاڵی، ئاڤاكرنا شیانێن پیشەیی، كارامەییێن تەكنیكی، پراكتیكێن ل سەر بنەمایێ ڤەكۆلینێ، و خۆهەلسەنگاندنا ڕەخنەیی، د هەمان دەم دا د گونجای بن دگەل چوارچۆڤەیێن نێڤدەولەتی، ژوان ژی پڕۆسێسا بۆلۆنیا.
ب پێشكێشكرنا گەشەپێدانا پیشەیی یا ڕێكخستی و ل سەر بنەمایێ پراكتیكی، سەنتەر شیانێن مامۆستایێن خواندنا بلند بهێز دكەت دا كو ببنە پەروەردەكارێن داهێنەر، بەرپرسیار، و كاریگەر كو پشكداریێ بكەن د بلندكرنا ستانداردێن پەروەردەیی ل ناڤا زانكۆیێ و دەرڤەی زانكۆیێ ژی. هەروەسا، سەنتەر زانین و كارامەییێن پێدڤی دابین دكەت دا كو ب شێوەیەكێ كاریگەر بەرسڤا داخوازیێن بەردەوام یێن خواندنا بلند و بازارێ كاری یێ ئەڤرو بدەن.
ئارمانجێن پەیامێ
پێشكەشكرنا پڕۆگرامێن ڕاهێنانا پێداگۆجی و شێوازێن وانەگۆتنێ ب كوالتیەكا بلند: بۆ مامۆستایێن زانكۆیا دهۆك، هەروەسا ماموستایێن ناڤەندێن دی یێن ئەكادیمی یێن دەڤەرێ.
دارشتن و پێشكەشكرنا خۆلێن ڕاهێنانا تەكنیكی، وۆركشۆپێن گەشەپێدانا پیشەیی، و پڕۆگرامێن بلندكرنا شیانان: كو دبنە ئەگەرێ بهێزكرنا شیان و كارامەییێن ئەكادیمی، تەكنیكی و پیشەیی.
ڕێكخستنا سمینار، وۆركشۆپ، كۆنفرانس و چالاكیێن ئەكادیمی: یێن كو دبنە هاندەر بۆ ئالوگوركرنا زانینێ، داهێنان، هەڤكاری و فێربوونا بەردەوام.
پێشکێشکرنا پرۆگرامێن ڕاهێنانێ، وۆرکشۆپ و سیمیناران بۆ سازیێن ناڤخۆیی، ڕێکخراوێن نەحکومی و جڤاکێن دەوروبەر، کو شیانێن تەکنیکی و کارگێری بهێز دێخن و و پشتەڤانیا پەرەپێدانا بەردەوام دکەن.
