ب ڕێنمایێ وئامادەبوونا سەروک مەسعود بارزانی، وپالپشتی وئامادەبوونا بەرێز مەسرور بارزانی، سەرۆکێ حکومەتا هەرێما کوردستانێ، زانکۆیا دهۆک دەست ب رێورەسمێن پێنجەمین کۆنفرانسێ زانستیێ ناڤدەولەتیێ جینۆسایدا گەلێ کورد کر.

بەرێز سەروک بارزانی پەیڤەک پێشکێشکر د کونفرانسیدا. د. یاسین کریم، سەروکێ کونفرانسی، و د. داود ئەتروشی، سەروکێ زانکویا دهوک، پەیڤێت جودا پێشکێشکرن.

د کونفرانسیدا نوینەرێت سەروکێ عیراقا فیدرال وسەروک وەزیران، وسیاسەتمەدار وڤەکولەر وئەکادیمی ئامادەبوون.

گفتوگۆ چەندین تەوەورێن سەرەکی بخۆڤەگرتن، ژ وان ژی:

• بەلگەکرنا جینوسایدێ: بەلگەیێن پزیشکیا دادی، گۆرێن بکۆم، و پاراستنا بیردانکا گشتی.
• زیانێن مروڤی: ترۆما (برینێن دەرونی)، بیردانکا د ناڤبەرا نڤشان دا، و ساڕێژبوون د ناڤ رزگاربوی و خێزانێن زەرەرمەند دا.
• تاوان ودادپەروەری: رەهەندێن یاسایی، دەرونی، و زانستی یێن لێپرسین و دادپەروەریا ڤەگوهێز.
• رۆلێ زانستێ پزیشکیا داد یا مۆدێرن د نیاسینا قوربانیان و تاوانباران دا.
• گرنگیا راگەهاندنێ و کارێ چالاکڤانان د پاراستنا بیردانکێ و ب دەستڤەئینانا دانپێدانا ناڤدەولەتی دا.
• رێکێن یاسایی و سیاسی یێن پێدڤی بۆ مسۆگەرکرنا دادپەروەری و لێپرسینێ.

پشتی دوو روژان ژ کەنگەشەیان، کۆنفرانس ب رێورەسمێن دوماهیێ ب دوماهی هات، راسپاردەیێن کۆنفرانسى هاتنە خواندن. ژ راسپاردەیێن فەرمی:

• دامەزراندنا سەنتەرەکێ نشتیمانی بۆ دۆکیومێنتکرنا تاوانێن جینۆسایدێ.
• تێکەلکرنا پزیشکیا داد د پرۆگرامێن خواندنا بلند دا.
• پشتەڤانیا داراییکرنا ڤەکۆلینێن بەراوردکاری ل سەر جینۆسایدا کوردان.
• دانانا پلانەکا ڤەکۆلینێ یا هەڤپشک د ناڤبەرا حکومەتا فیدرال و هەرێما کوردستانێ دا ل سەر جینۆسایدێ.
• ڤەکرنا خواندنێن بلند یێن تایبەتمەند د بوارێ پزیشکیا داد دا.
• دروستکرنا ئەرشیفەکێ دیجیتاڵ یێ نشتیمانی بۆ هەمی تۆمارێن جینۆسایدێ. (هاتە پێشنیاركرن ژ لایێ سەرۆكێ زانكۆیا دهۆك ڤه)
• پشتەڤانیکرن ل راپۆرتەکا سالانە ژ زانکۆیا دهۆک ل سەر ڤەکۆلینێن جینۆسایدێ.
• پێکینانا لژنەکا یاسایی بۆ بزاڤکرنێ بۆ ب دەستڤەئینانا دانپێدانا ناڤدەولەتی ب جینۆسایدێ.
• دەرکرنا یاسایەکا فیدرال کو ب فەرمی دانپێدانێ ب جینۆسایدا گەلێ کورد بکەت.
• مسۆگەرکرنا هەمی مافێن یاسایی و دارایی یێن رزگاربوی و خێزانێن وان.
• تێکەلکرنا دیرۆکا جینۆسایدێ د پرۆگرامێن خواندنێ یێن نشتیمانی دا.
• دامەزراندنا مۆزەخانەکا نشتیمانی بۆ جینۆسایدا گەلێ کورد.
• دەستنیشانکرنا رۆژەکا نشتیمانی یا فەرمی بۆ بیرئینانا جینۆسایدێ.
• بهێزکرنا رۆلێ راگەهاندنێ د بەلاڤکرنا هشیاریێ دا ل سەر دۆزا جینۆسایدێ.
• پێشکێشکرنا پشتەڤانیا دەروونی و جڤاکی یا تەمام بۆ قوربانی و خێزانێن وان.
• دامەزراندنا سندوقەکا نشتیمانی بۆ پشتەڤانیکرن ل هەڤگرتنا جڤاکی بۆ خێزانێن قوربانیان.

پاشی، د. فەلاح حەسەن. بەرپرسێ رێكخراوێن نەحكومی ل هەریما كوردستانێ، كو ئێك ژ ئامادەبوویێن رێورەسمێن بدوماهیكئینانێ بوو، راسپاردەیێن تایبەت پێشكێشكرن و تەكەزی ل وی چەندی كر كو سەنتەر و ڤەكۆلینین جینۆسایدی بهینە ئێكخستن دا كو كاریگەریەكا مەزنتر بخۆڤەبگرن.