سەنتەرێ خواندنێن ئاشتیێ وچارەسەرکرنا ململانێ ل زانکویا دهوک و ب هەڤکاری دگەل (BWA) و ب پشتەڤانیا(LWF -Iraq ) وب پشتگریا ACT و ELCA ، رابو ب جێبەجێکرنا دەستپێشخەریان ژ پروژێ خو یێ لژێر ناڤ و نیشان (رێبازا لسەر بنەمایێ مافان دەرباری توندوتيژيا رەگەزى و هەڤگرتنا جڤاکى دناڤبەرا ئاواران و خەلکێ خو جهى)

ئێک ژ چالاکیێن پروژەی

- ئەنجامدانا سەرەدانەکا جڤاکى بو شوینوارێن وجهێن پیروزێن یێن هەر سێ ئایینان (موسلمان، مەسیحى و ئێزیدى) ئارمانج ژ ڤێ دەستپێشخەریێ بهێزكرنا پێكڤەژيانێ دناڤبەرا ئاینان .

ڤیستەڤالا "فۆلکلوری بۆ پێکڤە ژیانێ" ل سێمێلێ ئەنجامدا

سەنتەرێ خواندنێن ئاشتیێ و چارەسەركرنا ململانێ ل زانكۆیا دهۆک ب ھەڤكاریا کۆمەلا ئافرەتین بەغداد و ب پشتەڤانیا ئێکەتیا لوثەرى یا جیهانى و پشتگیریا ACT و ELCA، ڤیستەڤالا "فۆلكلوری بۆ پێكڤە ژیانێ" ب ئامادەبوونا ھاریكارێ سەرۆكێ زانكۆیێ بۆ كاروبارێن قوتابیا د. نەبەز ئیبراھیم محەمەد و ھژمارەكا مامۆستایێن زانكۆیا دھۆك و مێھڤانێن دەرڤەی زانكۆیێ ژ خەلكێ دەڤەرێ و ئاوارە و پەنابەرا، ل ھولا رەوشەنبیری و ھونەری ل قەزا سێمێلێ ئەنجامدا. ئەڤ ڤیستەڤالە د چوارچوڤێ پرۆژێ "رێبازا بنەمادار ل سەر مافا دەربارەی توندوتیژیا رەگەزی و ھەڤگرتنا جڤاكی د ناڤبەرا ئاوارە و خەلكێ خۆجھ دا" ھاتیە ئەنجامدان.

پەیڤا دەستپێكێ ژ لایێ د. خەلیل مستەفا رێڤەبەرێ سەنتەرێ خواندنێن ئاشتی و چارەسەرکرنا ململانێ ڤە ھاتە پێشكێشكرن، د پەیڤا خۆدا ناڤبری باس ل كار و چالاكیێن سەنتەرێ خواندنێن ئاشتیێ و چارەسەركرنا ململانێ كر یێن د بەرژەوەندیا گەنجا ژ جڤاكێ دەڤەرێ و ئاوارەیان دا ھاتینە ئەنجامدان. ل دویڤ دا د. نەبەز ئیبراھیم محەمەد باس ل گرنگیا ڤان جورە چالاكیا كر كو خزمەتا گەنجێن دەڤەرا سێمێلێ و ئاوارەیان دكەت و دیاركر كو زانكۆیا دھۆك بەردەوام پشتەڤانیا وان پرۆژا دكەت یێن د خزمەتا جڤاكی دا.

ل دویڤ دا پانێلەك ھاتە ئەنجامدان و ژ لایێ د. خدر دوملی ڤە ھاتە برێڤەبرن ب پشكداریا كەسایەتیێن جڤاكی ل قەزا سێمێلێ كو پێكھاتبوون ژ عنتەر كەلو قاسم، عصام عوبەید شەریف، عمانوێل داود، پشكدارێن پانێلی باس ل مێژوویا پێكڤەژیانێ ل قەزا سێمێلێ كر.

ل دوماهیێ ھندەك برگێن جۆراوجور هاتنە پێشکێشکرن ژ وان شانویەک ل دۆر فۆلکلور و کەلەپورێ کوردی، دیسان چەندین ستران ھاتنە پێشكێشكرن ل گەل ژەنینا پارچە موزیكێ ژ لایێ تیپا مشەختی یا هونەری. ل دویڤ دا باوەرنامێن رێزلێنانێ پێشکێشی رێکخراوێن پشكدار و ستافێ رێكخەرێ ڤیستەڤالێ ھاتنەكرن