شانگەھا كاری ل زانكۆیا دھۆك نێزیكی ١٠٠ دەلیڤێن کاری بوو گەنجان رەخساندن

رۆژا چارشەمبی رێكەڤتی ١٥ـی چریا دووێ ٢٠٢٣، ب ئامادەبوونا ھاریكارێ سەرۆكێ زانكۆیا دھۆك بۆ كاروبارێن قوتابیا د. نەبەز ئیبراھیم محەمەد و نوینەرێن ھژمارەكا كۆمپانیا، پێشانگەھا دەلیڤێن كاری ل سەنتەرێ وەرزش و لاوان ل قەزا سێمێلێ ھاتە ڤەكرن نێزیكی ١٠٠ دەلیڤێن کاری بوو گەنجان ھاتنە رەخساندن.

ئەڤ پێشانگەھە د چوارچوڤێ پرۆژێ "رێبازا بنەمادار ل سەر مافا دەربارەی توندوتیژیا رەگەزی و ھەڤگرتنا جڤاكی د ناڤبەرا ئاوارە و خەلكێ خۆجھ دا" ب ھەڤكاریا سەنتەرێ خواندنێن ئاشتیێ و چارەسەریا ململانێ یێ زانكۆیا دھۆك ل گەل کۆمەلا ئافرەتین بەغداد و پشتەڤانیا ئێکەتیا لوثەرى یا جیهانى و پشتگیریا ACT و ELCA، بۆ گەنجێن دەڤەرا سێمێلێ و ئاوارەیا ھاتیە رێكخستن.

هاریکارێ سەرۆکێ زانکۆیێ بۆ کاروبارێن قوتابیا د. نەبەز ئیبراھیم دیاركر كو زانكۆیا دھۆك ب ئەرک دبینیت خزمەتا گەنجێن پارێزگەها دهوکێ و دەورابەران بکەت و سوپاسیا رێكخراوێن ھەڤكار و كۆمپانیێن پشكدار د پێشانگەھێ دا كر.

دیسان سەنتەرێ ئاشتیێ و چارەسەرکرنا ململانێ ل زانكۆیا دھۆك، د. خەلیل مستەفا، دیاركر كو زانکۆیا دھۆك ب گرنگ دبینیت، ئێدی ژ ناڤ كەمپا زانکۆیێ بدەرکەڤیت و دناڤ چڤاکی دا كاربكەت داكو بشێت کارێگەریا ئێکسەر پەیدا بکەت، ھەروەسا ناڤبری گۆت "ئەڤروکە ئەم ب ڤی ئەرکی رابووینە بۆ هندێ هەڤپشکی و ھەڤكاریێ دناڤبەرا تەخێن جڤاکی دا پەیدابکەین، زێدەباری ڤێ چەندێ کو ئەڤرو ئەم شیاینە ب رێکا ڤان کومپانیا دەلیفێن کاری بۆ خەلکێ سێمێلێ دابین بکەن.

راگەھاندنا زانكۆیا دھۆك؛ ١٦ـی چریا دووێ ٢٠٢٣