لابۆرەكا كومپیوتەری ژ لایێ بەرنامێ ئیراسموس موندوس و ب پشتەڤانیا زانكۆیا لایبزیك یا ئەلمانی ڤە ل ئاڤاهیێ پەرتوكخانا ناڤەندی ل كەمپێ زانكۆیا دهۆك هاتبوو چێكرن ل رۆژا 12/10/2017 ژ لایێ سەرۆكێ زانكۆیا دهۆك ڤە هاتە ڤەكرن.
د رێورەسمێن ڤەكرنێ دا هاریكارێن سەرۆكێ زانكۆیێ و راگرێن كۆلیژان و چەند مامۆستایێن زانكۆیێ بەرهەڤ ببون، د. سەباح ئیبراهیم وەیس هاریكارێ سەرۆكێ زانكۆیا دهۆك بۆ كاروبارێن زانستی و خواندنا بلند دیاركر كو ئەڤ لابۆرە بۆ سیستەمێ (E-Learning) كو د ناڤبەرا شەش زانكۆیان دایە، سێ ژ وان زانكۆیێن ئورۆپی نە ئێك یا ئەلمانی و ئێك ژی یا یونانی و یا دیتر ژی یا پورتۆگالی یە، ژ هەرێما كوردستانێ ژی زانكۆیێن دهۆك و سەلاحەدین و پولیتەكنیكا دهۆك دێ د پشكدار بن.
ئەڤ سیستەمە بۆ پەیوەندیێ یە ل ناڤبەرا مامۆستایێن ڤان زانكۆیان ل گەل قوتابیێن وان ب تایبەت بۆ خواندنا بلند و شێوازێ تاقیكرنان كو سیستەمەكێ پێشكەفتیە دهێتە بكار ئینان داكو مامۆستا و قوتابی د پەیوەندیێ دا بن.
زانكۆیا دهۆك پشكدارە د بەرنامێ ئیراسموس موندوس یێ ئێكەتیا ئورۆپی بۆ پشتەڤانیا زانكۆیێن پشكدار، 70% ژ ڤی بەرنامەی بۆ پشتەڤانیا بهێزكرنا شیانێن مامۆستایانە و ڤەكرنا خولان و 30% بۆ ڤەكرنا لابۆر و جهێن خواندنێ یە.