زانكۆیا دهۆک – ٦ـی ئیلۆنا ٢٠٢٥ـێ، نڤیسینگەها راگەهاندنا زانکۆیێ | ل زانکۆیا دهۆک، چالاکیێن خۆلەکا فێرکرنێ یا تایبەت ب ناڤێ "پاکێجا زانین و وەرشێن کاری" ب سەرکەڤتیانە ب دوماهی هاتن. ئەڤ خۆلە ب هەماهەنگی د ناڤبەرا كوژیێ ئەمریکی ل زانکۆیێ و ئەکادیمیا I.M. هاتبوو رێکخستن و ئارمانج ژێ دانا زانیاریێن بنەرەتی یێن ژیانێ بوو بۆ كۆمەكا گەنجێن ژیێ ١١ هەتا ١٦ سالیێ.

ناڤەرۆکا خۆلێ، کو ژ رۆژا ٢٤ـی تەباخێ دەستپێکر هەتا ٣١ـی تەباخێ بەردەوام بووژ چەندین بابەتێن گرنگ و پراکتیکی پێکهاتبوو، وەكی بنەمایێن کارەبێ، ئاڤ و سۆلینان، کومپیوتەرێ، هەروەسا کارێن دارتاشیێ و ئاسنگەریێ، ل گەل هندەک زانیاریێن گشتی یێن ب مفا. ئەڤ بابەتە هاتبوونە هەلبژارتن دا پشكدار شارەزاییەكا سەرەتایی ل سەر کارێن رۆژانە یێن گرنگ بدەستخۆڤەبینن.

خۆلێ رەنگڤەدانەکا باش بخۆڤەدیت، و دەهـ کەس مفاداربوون. ڤێ چەندێ رێخۆشکر کو راهێنەر بشێن پتر گرنگیێ ب هەر فێرخوازەکی بدەن.

د رێورەسمەکێ دا ل رۆژا دوماهییا خولێ، ٣١ـی تەباخێ و ب ئامادەبوونا رێڤەبەرێ کوژیێ ئەمریکی، د. زیرەک یوسف حەسەن، باوەرنامەیێن پشکداریێ ل سەر پشكداران دا هاتنە دابەشکرن. باوەرنامە ژ لایێ رێزدار د. نزار ئەمین، رێڤەبەرێ پەیوەندیێن ناڤدەولەتی ل زانکۆیا دهۆک، و ئەندازیار رێبەر عەبدوللا محەمەد، رێڤەبەرێ ئەکادیمیا I.M. ڤە هاتنە پێشکێشکرن. ژ هەژی گۆتنێ یە کە ئەڤ خۆلە ژ هەڤکاریا ئەندازیار رێبەر عەبدوللا و راهێنەر شاناز عوسمان حسێن و رێکخەر نارین شوکری حسێن بوو.

ئەڤ دەستپێشخەریە رەنگڤەدانا پابەندبوونا زانکۆیا دهۆکە ب بلندکرنا ئاستێ زانینێ یێ تەخا گەنجان وجڤاکێ ژدەرڤەی زانکۆیێ.

ئەڤ چالاکیە وەک پێنگاڤەکا گرنگ دهێتە دیتن بۆ بهێزکرنا شیانێن پراکتیکی یێن تڤشێ نوی و ئامادەکرنا وان بۆ داهاتی.

ڤێرە کلیک بکە بۆ دیتنا وێنەیان

نڤیسینگەها راگەهاندنا زانکۆیێ، ٦ـی ئیلۆنا ٢٠٢٥ـێ
راپۆرت ژ لایێ: فاطمە محمود علی