زانکۆیا دهۆك، ٢٧ـی ئیلۆنا ٢٠٢٦ | راگەهاندنا زانکۆیا دهۆك (UNPO) — زانکۆیا دهۆك و زانکۆیا نەینەوا پێنگاڤەکا دی بەرەڤ جێبەجێکرنا وێ یاداشتناما لێکتێگەهشتنێ هاڤێت یا کو ل ١٧ـی کانوونا ئێکێ ٢٠٢٤ هاتبوو ئیمزاکرن. ئەڤ چەندە ژی ب سەرەدانا شاندەکێ ئاست بلندێ زانکۆیا نەینەوا بۆ زانکۆیا دهۆك ب مەبەستا گەنگەشەکرنا بوارێن کریاری یێن هەڤکاریا ئەکادیمی، زانستی و دامەزراوەیی بڕێڤەچوو.

ئەڤ شاندە ب سەرۆکاتیا د. ئوسامە ئسماعیل ئەلمەشهەدانی، سەرۆکێ زانکۆیا نەینەوا، و پشکداریا راگر، جێگرێن راگران و بەرپرسێن پشکێن زانستی و کارگێڕی پێکهاتبوو. شاند ل سەنتەرێ رەوشەنبیری و جڤاکی یێ زانکۆیا دهۆك ژ لایێ سەرۆکێ زانکۆیا دهۆك، د. داود سلێمان ئەتروشی، و هاریکارێن سەرۆکێ زانکۆیێ و راگر و بەرپرسێن هەڤتا یێن زانکۆیا دهۆك ڤە هاتنە پێشوازیکرن.

ژ رێککەڤتنێ بەرەڤ جێبەجێکرنێ
ئەڤ کۆمبوونا کو ل ٢٤ـی ئیلۆنا ٢٠٢٦ هاتە ئەنجامدان، ل سەر بنەمایێ وێ یاداشتناما لێکتێگەهشتنێ یە کو هەردوو زانکۆیان د کانوونا ئێکێ یا ٢٠٢٤ـێ دا ئیمزاکربوو، کو تێدا چوارچۆڤەیەك بۆ هەڤکاریێ د بوارێ ئالۆگۆڕکرنا شارەزایێن زانستی، ڤەکۆلینێن هەڤپشك، گەشەپێدانا پرۆگرامێن ئەکادیمی و ئاڤاکرنا شیانێن مامۆستا و قوتابیان هاتبوو دانان.

ل دەستپێکا کۆمبوونێ، د. داود بخێرهاتنەکا گەرم ل شاندی کر و دیارکر کو کۆمبوونا ئەڤرۆ نیشانا رژدیا هەردوو زانکۆیانە ل سەر ڤەگوهاستنا هەڤپشکیا خۆ ژ رێککەڤتنەکا دامەزراوەیی بەرەڤ هەڤکاریەکا ئەکادیمی یا کریاری (جێبەجێکرنێ).

ژ لایێ خۆ ڤە، د. ئەلمەشهەدانی کەیفخۆشیا خۆ بۆ ڤێ هەڤپشکیێ دەربڕی و گرنگیا ڤێ هەڤکاریێ بلند نرخاند و جەخت ل سەر پاراستن و بلندکرنا رەسەناتیا زانستی و ستانداردێن ئەکادیمی د ڤێ هەڤکاریێ دا کر.

ئاسۆیێن نوی بۆ هەڤکاریا ئەکادیمی یا هەڤپشك
د کۆمبوونێ دا، د. داود پشتەڤانیا خۆ یا تەمام بۆ بەرفرەهکرنا هەڤکاریێ د ناڤبەرا هەردوو دامەزراوەیان دا دیار کر. نوینەرێن هەردوو زانکۆیان بیروبۆچوونێن خۆ پێشکێشکرن و ئەو بوار دەستنیشانکرن کو تێدا یاداشتناما لێکتێگەهشتنێ دشێت ببیتە چالاکیێن هەڤپشك.

د گەنگەشەیان دا باس ل پلانێن ئەنجامدانا کۆنفرانسێن قوتابیان یێن داهاتی، وۆرکشۆپ و چالاکیێن د بوارێ یاسا و خواندنا فیدرالیزمێ دا، ڤەکۆلینێن گرێدایی ژیریا دەستکرد، و پڕۆژەیێن شیاندن و پشتەڤانیا ئافرەتێ هاتە کرن.

هەروەسا هەردوو زانکۆیان دەلیڤەیێن ئالۆگۆڕکرنا شارەزایێن ئەکادیمی و گەشەپێدانا شیانێن مامۆستا و قوتابیان گەنگەشەکرن، ل سەر بنەمایێ وان ئارمانجێن د یاداشتناما سالا ٢٠٢٤ـێ دا هاتینە جێگیرکرن.

شنگال و ئامادەکرنا ستافێ ئەکادیمی بۆ پێدڤیێن پاشەڕۆژێ یێن خواندنا بلند
پشکەکا گرنگ یا کۆمبوونێ تیشك ئێخستە سەر پلانێن پاشەڕۆژێ یێن زانکۆیا نەینەوا بۆ ڤەکرنا زانکۆیەکێ ل شنگالێ. هەردوو لایەنان گەنگەشە ل سەر پێدڤیێن ئەکادیمی و دامەزراوەیی یێن دەستپێشخەریەکا ب ڤی رەنگی و گرنگیا ئامادەکرنا ستافەکێ ئەکادیمی یێ لێهاتی کر.

ئەڤ گەنگەشەیە رەنگڤەدانا ئێك ژ ئارمانجێن سەرەکی یێن یاداشتناما لێکتێگەهشتنێ یا سالا ٢٠٢٤ـێ بوو — کو هەڤکاریا ناڤبەرا هەردوو زانکۆیان نە بتنێ بۆ چالاکیێن هەڤپشكە، بەلکو بۆ بهێزکرنا شیانێن ئەکادیمی و بەرسڤدانا پێدڤیێن پەروەردەیی یێن سەرهەلددەن ژی یە.

زانکۆیا دهۆك تیشکێ دئێخیتە سەر پەیمانگەها IPP و کلینیکا شنگال
د چوارچۆڤێ گەنگەشەیێن ل سەر شنگالێ دا، زانکۆیا دهۆك تیشك ئێخستە سەر کارێن پەیمانگەها چارەسەریا دەروونی و تراومایێ (IPP) و کلینیکا شنگال یا سەر ب وێ ڤە، ژبەر هەبوونا ئەزموون و ئامادەبوونا پەیمانگەهێ ل وێ دەڤەرێ.

ئامادەبوونا کلینیکێ ل دەڤەرێ وەك بابەتەکێ گرێدایی ب هەڤکاریا پاشەڕۆژێ ڤە هاتە گەنگەشەکرن، ب تایبەتی د بوارێن پەیوەندیدار ب چارەسەریا دەروونی، تراومایێ، پشتەڤانیا دەروونی-جڤاکی، راهێنانا ئەکادیمی، و ئاڤاکرنا شیانان ڤە.

ئاڤاکردن ل سەر هەڤپشکیا سالا ٢٠٢٤
برنا ڤان ئارمانجان بەرەڤ جێبەجێکرنێ هەروەسا پشتەڤانیێ ل پێشینەیێن پلانا ستراتیژی یا زانکۆیا دهۆك (٢٠٢٣-٢٠٣٨) دکەت، ب تایبەتی بهێزکرنا پەیوەندیێن دامەزراوەیی، پێشڤەبرنا ڤەکۆلینێن کاریگەر، بەرزکرنا ستانداردێن پەروەردەیی، و بەرفرەهکرنا هەڤکاریا ئەکادیمی.

ڤێرە كلیك بكە بۆ دیتنا وێنەیان

راگەهاندنا زانکۆیا دهۆك، ٢٧ـی ئیلۆنا ٢٠٢٦
راپۆرت: فاطمە محمود عەلی
وێنە: محەمەد ع. تاهر