زانکۆیا دهۆك، ٢٧ـی ئیلۆنا ٢٠٢٦ | نڤیسینگەها راگەهاندنا زانکۆیێ (UNPO) — گۆڤارا زانین یا زانست و ئەندازیاریێ (ZJSE)، کو ژ لایێ زانکۆیا دهۆك ڤە دهێتە بەلاڤکرن، ل رێکەڤتی ١٠ـی ئیلۆنا ٢٠٢٦ ب فەرمی هاتە پەسەندکرن بۆ پشکداریکرن د ڕێبەرێ گۆڤارێن ڤەکری دا (DOAJ). ئەڤ چەندە پێنگاڤەکا گرنگە د بەرەڤپێشچوونا گۆڤارێ و بزاڤێن زانکۆیێ دا بۆ بهێزکرنا بەرچاڤکرن و ب بدەستڤەگەهشتنا ڤەکۆلینێن وێ یێن زانستی.

ڕێبەرێ (DOAJ)، کو بنگەهێ وێ ل وەلاتێ دانیمارکە، ڕێبەرەکێ ناڤدەولەتیە گۆڤارێن ئەکادیمی یێن ڤەکری بخۆڤەدگریت و پشتەڤانیا دیتن و ڤەدیتنا ڤەکۆلینێن ئەکادیمی دکەت. زێدەکرنا ZJSE بۆ ناڤ ڤی ڕێبەری، ئامادەبوونا گۆڤارێ د ناڤ جڤاکێ ڤەکۆلینێن ڤەکری یێن جیهانی دا بەرفرەهتر دکەت و دەلیڤەیەکا باشتر ددەت بۆ دیتنا وان کارێن ب رێیا ڤێ گۆڤارێ دهێنە بەلاڤکرن.

بهێزکرنا ڤەکۆلینێن ڤەکری و ب کوالێتی

گۆڤارا زانین یا زانست و ئەندازیاریێ (ZJSE) ل سالا ٢٠٢٤ وەك گۆڤارەکا ناڤدەولەتی، ڤەکری و هەلسەنگاندی ژ لایێ هەڤتایان ڤە هاتیە دامەزراندن، کو هەر سێ هەیڤان جارەكێ ژ لایێ زانکۆیا دهۆک ڤە دهێتە بەلاڤکرن. گۆڤار پلاتفۆرمەکا ئەکادیمی بۆ ڤەکۆلینێن ب کوالێتیا بلند د بوارێ زانست و ئەندازیاریێ دا دابین دکەت، هەڤدەم پشتەڤانیا ڤەکۆلینێن هەمەجۆر و ئالوگۆڕکرنا زانیاریان دکەت. ZJSE پێگیرە ب پێشڤەبرنا بەردەوام یا پراکتیکێن سەرنڤێسەری و بەلاڤکرنێ ب رێیا تیمەکا کارا ژ سەرنڤێسەر و ستافێ ئەکادیمی، دیارکرنا بوارێن ڤەکۆلینێ ب رۆنی، و سیستەمەکێ بەلاڤکرنێ یێ ب تەمامی ئەلکترۆنی. هەمی ئەو ڤەکۆلینێن دهێنە پێشکێشکرن د پرۆسەیا پشکنینا دەستپاکیێ (Plagiarism) و ناڤەڕۆکا ژیریا دەستکرد دا دەرباز دبن، د دەمەکێ دا کو سیاسەتێن سەرنڤێسەری یێن گۆڤارێ جەختێ ل سەر ئەخلاقیاتێن ڤەکۆلینێ، کوالێتیا ئەکادیمی و پێگیربوون ب ستانداردێن ناڤدەولەتی دکەن.

پشکداریکرنا گۆڤارێ د (DOAJ) دا ژ لایێ مۆدێلێ بەلاڤکرنا ڤەکری، ژمارەیێن (ISSN) یێن کارپێکری، زانکۆیا دهۆك وەك بەلاڤکەر، سیاسەتێن رۆن یێن مافێ کۆپیکرنێ و مۆلەتپێدانێ، و پرۆسەیا هەلسەنگاندنا ڤەشارتی یا هەردوو لایەنان ڤە (Double-blind peer-review) پشتەڤانی لێ هاتیە کرن. ئەرشیفێ وێ هەمی ژمارەیێن بەلاڤکری بخۆڤەدگریت، کو ڤەکۆلین بوارێن زانستێن سروشتی و ژیانێ، کیمیا و زانستێ کەرەستەیان، زانستێن ژینگەهێ و چاندنێ، زانستێ کۆمپیوتەری و تەکنۆلۆژیایا زانیاریان، ژیرییا دەستکرد و زانستێ داتایان، ئەندازیاریا شارستانی و پێکهاتەیی، ئەندازیاریا میکانیکی و وزەیێ، ئەندازیاریا کارەبا و ئەلکترۆنی، ئەندازیاریا تەلارسازی و خواندنێن شارسازی، و بوارێن هەمەجۆر یێن پەیوەندیدار بخۆڤەدگرن.

پێنگاڤەك بەرەڤ پێش بۆ ئەرکێ ڤەکۆلینێ یێ زانکۆیا دهۆك
پشکداریکرن د DOAJ دا زێدەتر پشتەڤانیا پابەندبوونا زانکۆیا دهۆك ب پێشەنگبوونا ڤەکۆلینان، بەرچاڤبوونا ناڤدەولەتی، و هەڤکاریا ئەکادیمی دکەت. هەروەسا گۆڤار کار دکەت بۆ ب دەستڤەئینانا باوەریپێکرنا سکۆپەس (Scopus)، ب مەرەما بەرفرەهکرنا گەهشتنا وێ یا جیهانی و کاریگەریا وان ڤەکۆلینێن ژ لایێ زانکۆیێ ڤە دهێنە بەلاڤکرن.

زانکۆیا دهۆك پیرۆزباهیێ ل د. ئەحمەد بەهیج یاسین، سەرنڤێسەرێ گۆڤارا ZJSE، دگەل دەستەیا سەرنڤێسەران، نڤیسەر، هەلسەنگینەر، و هەمی پشکدارێن گۆڤارێ دکەت بۆ ڤی دەستکەڤتی.

بۆ دیتنا گۆڤارا زانین یا زانست و ئەندازیاریێ دا:
لینکێ گۆڤارا زانین یا زانست و ئەندازیاریێ

نڤیسینگەها راگەهاندنا زانكۆیێ، ٢٧ـی ئیلۆنا ٢٠٢٦
راپۆرت: فاطمە مەحمود عەلی

پەیڤێن سەرەكی: گۆڤارا زانین یا زانست و ئەندازیاریێ، DOAJ، ڤەکۆلینێن زانکۆیا دهۆك، گۆڤارا ڤەکری، ڤەکۆلینا زانستی.