زانکۆیا دهۆك، ١٠ـی چریا ئێکێ ٢٠٢٦ | نڤیسینگەها راگەهاندنا زانکۆیێ (UNPO) — زانکۆیا دهۆك و فیدراسیۆنا ژنێن دیاسپۆرایا کوردستانێ یاداشتنامەکا لێکتێگەهشتنێ ئیمزا کرن بۆ بهێزکرنا هەڤکاریێ پشتەڤانیکرنا ئافرەتێن کوردستانێ دا، پێشڤەبرنا یەکسانیا جێندەری، و بەرفرەهکرنا دەلیڤەیان بۆ پشکداریا ئەکادیمی و جڤاکی.

ب مەرەما ئیمزاكرنا ڤێ یاداشتنامێ و ڤەکرنا دەرگەهێن نوی یێن هەڤکاریێ، ئەڤرۆ رێكەڤتی ١٠ـی چریا ئێکێ ٢٠٢٦، شاندەکێ فیدراسیۆنا ژنێن دیاسپۆرایا کوردستانێ كو پێكهاتبوو ژ خانم شیرین زەکی جندی، سەرۆكا فیدراسیۆنێ و خانم بەهرە حەمەڕەش،

بەرپرسا نڤیسینگەها فیدراسیۆنێ ل هەولیرێ سەرەدانا زانکۆیا دهۆك کر و ژ لایێ د. نەزار ئەمین محەمەد، رێڤەبەرێ پەیوەندیێن ناڤدەولەتی، و د. دلین سەردار زوهدی، رێڤەبەرا سەنتەرێ خواندنێن یەکسانیا جێندەری ڤە هاتنە پێشوازیکرن.

ئەڤ فیدراسیۆنە کو ل سالا ٢٠٢٣ ل فینلەندا هاتیە دامەزراندن، رێکخراوەکا نەتەوەیی یە نوینەرایەتیا ئافرەتێن کوردستانێ ل جیهانێ دکەت. ئارمانجا فیدراسیۆنێ ئێکخستنا دەنگێ ئافرەتان و خزمەتکرنا وانە ل دیاسپۆرایێ و هەر چوار پارچەیێن کوردستانێ، دگەل

پشتەڤانیکرنا پشکداریا وان د ژیانا جڤاکی و کەلتووری دا.

یاداشتنامەیا لێکتێگەهشتنێ چوارچۆڤەیەکێ هەڤکاریێ د ناڤبەرا زانکۆیێ و فیدراسیۆنێ دا دادڕێژیت د بوارێن گرێدایی بهێزکرنا ئافرەتان، یەکسانیا جێندەری، پشکداریا کەلتۆری، ئالۆگۆڕیا ئەکادیمی، و گەشەپێدانا شیانان. ئەڤە دبیته‌ بنەمایەك بۆ هەردوو دامەزراوەیان دا کو دەستپێشخەریێن هەڤپشك ئەنجام بدەن، شارەزاییان ئالۆگۆڕ بکەن، و پەیوەندیان د ناڤبەرا دامەزراوەیێن ئەکادیمی و جڤاکێن کورد ل دیاسپۆرایێ دا

بهێزتر بکەن.

د گەنگەشەیان دا، د. نەزار ئەمین کەیفخۆشیا خۆ دەربڕی و دیارکر کو زانكۆیا دهۆك ئیكەمین زانكۆیە کو ب فەرمی ئەڤ فیدراسیۆنە رێکەڤتنێ دگەل گرێددەت. هەڤدەم، د. دلین سەردار رۆلێ سەنتەری د هوشیارکرنا جڤاکی و گەهاندنا پرسێن جێندەری دا بەرچاڤ کر، و خانم بەهرە حەمەڕەش ژی ژ لایێ خۆ ڤە گرنگیا هەڤکاریێ دگەل زانکۆیان ژبۆ گەهشتن ب جڤاکێ ئەکادیمی و بهێزکرنا پەیوەندیان دگەل ئافرەتان بلند نرخاند.

وەك ئێکەمین پێنگاڤا کریاری یا ڤێ هەڤپشکیێ بۆ جێبەجێکرنا رێککەڤتنێ، بڕیارە ب هەماهەنگیا هەردوو لایەنان کۆنفرانسەك ل باژێڕێ لەندەن ل دۆر "پرسا ئافرەتا کورد" بهێتە سازکرن، کو پێشبینی دهێتە کرن چەندین زانکۆیێن دی یێن کوردستانێ ژی پشکداریێ تێدا بکەن.

ئەڤ هەڤپشکیە پابەندبوونا زانکۆیا دهۆك ب یەکسانیا جێندەری، پشکداریا جڤاکی، هەڤکاریا ناڤدەولەتی و گەشەپێدانا گشتگیر نیشان ددەت. ب ئاڤاکرنا پران د ناڤبەرا ئەکادیمیا و رێکخراوێن دیاسپۆرایێ دا، زانکۆیا دهۆك بەردەوامە د پشتەڤانیکرنا

ئالۆگۆڕیا زانیاریان و دەستپێشخەریێن هەڤکار کو پشکداریێ د بهێزکرنا ئافرەتان و گەشەپێدانا بەرفرەهتر یا جڤاکی دا دکەن.

ڤێرە كلیك بكە بۆ دیتنا رووماڵا میدیایی

نڤیسینگەها راگەهاندنا زانکۆیێ، ١٠ـی چریا ئێکێ ٢٠٢٦
راپۆرت: فاطمە محمود عەلی

وێنە: محەمەد ع. تاهر

پەیڤێن سەرەکی: زانکۆیا دهۆك، فیدراسیۆنا ژنێن دیاسپۆرایا کوردستانێ، پشتەڤانیکرنا ئافرەتان، یەکسانیا جێندەری، هەڤکاریا ئەکادیمی و ناڤدەولەتی.