زانكۆیا دۆرتموند یا تەکنیکی – ٩ـی كانوونا ئێکێ ٢٠٢٥ | نڤیسینگەها راگەهاندنا زانکۆیێ (UNPO) – زانكۆیا دهۆک (UOD)، ب نوینەراتیا د. بەشیر ئەحمەد محەمەد سەعید، سەرۆکێ پشکا پلاندانانا جهی (Spatial Planning) ل کۆلیژا پلانسازیا شار و هەرێمان، پشکداری د كۆمبوونا سالانە یا تۆڕا SPRING دا کر یا کو ل ٢٠-٢١ـی چریا دووێ ٢٠٢٥ ل زانکۆیا دۆرتموند یا تەکنیکی هاتیە ئەنجامدان. كۆمبوونێ زانکۆیێن هەڤپشک ژ سەرتاسەری تۆڕا SPRING (پلاندانانا جهی بۆ هەرێمان د ئابووریێن گەشەسەندیدا) کۆمکرن ژبۆ گەنگەشەکرنا پێشهاتێن پرۆگرامی، هەڤکاریا پاشەڕۆژێ، و ئاراستەیێن ستراتیژی.

پێشهاتێن پرۆگرامێ ماستەرێ د پلاندانانا جهی دا ل زانكۆیا دهۆک
د دەمێ كۆمبوونێ دا، د. بەشیر ئەحمەد محەمەد سەعید، سەرۆکێ پشکا پلاندانانا جهی و رێکخەرێ پرۆگرامێ زانكۆیا دهۆک بۆ هەڤکاریا ئەکادیمی یا گرێدای ب SPRING ڤە دگەل زانكۆیا دۆرتموند، پێشکەڤنێن دوماهیێ یێن پرۆگرامێ ماستەرا زانستێن پلاندانانا جهی ل زانكۆیا دهۆک دیارکرن. ژ دەمێ دەستپێکرنا خۆلا ئێکێ ل سالا ٢٠٢١، پرۆگرامی ب سەرکەڤتیانە دوو خۆل دەرئێخستینە، و چاڤەڕێ دهێتە کرن خۆلا سێیێ د سالا بهێت دا بهێتە وەرگرتن، ئەڤە ژی قۆناغەکا گرنگە د پێگەهشتنا پرۆگرامی دا.

سەرەرای راوەستیانا ل دەڤەرێ یا بەردەوامیدانا خواندنا بلند د سالێن ٢٠٢٣-٢٠٢٤ و ٢٠٢٤-٢٠٢٥ دا، لێ پێشکەڤتنێن ئەرێنی دیاردبن. پشتی دەرچوونا نامەیەکا پشتەڤانیێ ژ زانكۆیا دۆرتموند یا تەکنیکی بۆ وەزارەتا خواندنا بلند و ڤەکۆلینێن زانستی ل هەرێما کوردستانێ ب رێکا زانكۆیا دهۆک، نۆکە پێشبینی دهێتە کرن کو وەرگرتنا قوتابیێن خواندنا بلند ل مەها شوات/ئادارا ٢٠٢٦ دەستپێبکەت ل گەل دوپاتکرنا وەرگرتنا سالانە و سەربەخۆ ژ لایێ سەرۆکاتیا زانكۆیا دهۆک ڤە.

هەروەسا زانكۆیا دهۆک داخوازیەكا فەرمی ئاراستەی پرۆفیسۆرێن زانکۆیێن هەڤپشک یێن SPRING کر ژبۆ پشکداریکرن د چالاکیێن وانەگۆتنێ و پرۆگرامێن خواندنا بلند دا ل سەرانسەری تۆڕێ، ب مەرەما بهێزکرنا هەڤکاریا ناڤدەولەتی و بلندکرنا کوالێتیا ئاڵوگۆڕیا ئەکادیمی.

پشکداریا تایبەت یا دهۆکێ د تۆڕا SPRING دا
د كۆمبوونێ دا تەکەزی ل سەر پەیامەکا سەرەکی هاتە کرن کو ڕۆلێ تایبەت و بابەتی یێ دهۆکێ د تۆڕێ دا دیار دکەت. پرۆگرامێ ماستەرا زانكۆیا دهۆک گرنگیێ ددەتە پلاندانانا جهی ل دەڤەرێن تووشی قەیرانان و فشارێن سەقایی بووین، کو ژلایێ ئاڵنگاریێن واقعی ڤە دهێنە دیارکرن وەک:

• پێلا هاتنا پەنابەر و ئاوارەیان.
• هشکەسالی و کێم ئاڤی.
• ناکۆکیێن ل سەر ژێدەران.
• تێکچوونا ژینگەهێ و گۆڕانکاریێن سەقایی.

پێشنیاز بۆ مێڤانداریکرنا كۆمبوونا SPRING ل سالا ٢٠٢٧
د دەمێ گەنگەشەیان دا، د. بەشیر پێشنیاز کر کو كۆمبوونا سالانە یا SPRING یا سالا ٢٠٢٧ ل دهۆکێ بهێتە ئەنجامدان. ئەڤ پێشنیازە ب گەرمی ژ لایێ زانکۆیێن هەڤپشک ڤە هاتە پێشوازیکرن. (دهێتە زانین كۆمبوونا ٢٠٢٦ ل سازیەكا هەڤپشک هاتیە دەستنیشانکرن).

دەربارەی پرۆگرامێ ماستەرا نێڤدەولەتی یا SPRING
پرۆگرامێ SPRING (پلاندانانا جهی بۆ هەرێمان د ئابووریێن گەشەسەندیدا) پرۆگرامەکێ ماستەرا هەڤپشکە بۆ ماوێ دوو سالان کو گرنگیێ ددەتە پلاندانان و رێڤەبرنا گەشەپێدانا هەرێمی یا هەڤگرتی. قوتابی سالا ئێکێ یا خواندنێ ل زانکۆیا دۆرتموند تەمام دکەن، و پاشان سالا دووێ ل ئێک ژ زانکۆیێن هەڤپشک ل:

• غانا
• تەنزانیا
• فلیپین
• بەرازیک
• چیلی

پرۆگرام باوەرنامەیا M.Sc. یا هەڤپشک د پلاندانان و رێڤەبرنا گەشەپێدانا هەرێمی دا ددەت، کو ژ لایێ زانکۆیا دورتموند و زانکۆیا هەڤپشک یا پەیوەندیدار ڤە دەردكەڤیت.
د ناڤ تۆڕا SPRING دا، زانكۆیا دهۆک وەک زانکۆیەکا هەڤپشکا ئەکادیمی و ستراتیژی پشکداریێ دکەت، رۆلێ زانكۆیا دهۆک ل سەر ئاڵوگۆڕیا ئەکادیمی، دیالۆگا پرۆگرامێ خواندنێ، رێڤەبرنا تۆڕێ، و پشکداریا بابەتی ب تایبەتی د بارودۆخێن قەیران و فشارێن سەقایی دا چڕ دبیت. د هەمان دەم دا، زانكۆیا دهۆک ب شێوەیەکێ سەربەخۆ پرۆگرامێ ماستەرێ د پلاندانانا جهی دا پێشکێشدکەت، کو ل گەل ستانداردێن جیهانی و رێنمایێن نیشتیمانی گونجایە.

گونجان دگەل دیتنا ستراتیژی یا زانكۆیا دهۆک
پشکداریا کارا یا زانكۆیا دهۆک د تۆڕا SPRING دا پشتەڤانیێ ل پلانا ستراتیژی یا زانکۆیێ (٢٠٢٣-٢٠٣٨) دکەت، ب تایبەتی خالێن وێ یێن:

• هەڤکاریا ئەکادیمی یا ناڤدەولەتی.
• پێشئێخستنا شیانان و نایابیا ئەکادیمی.
• دیاربوونا جیهانی و هەڤبەندیێن ستراتیژی.
• ڤەکۆلینێن كرداری (Applied research) د بارودۆخێن قەیران و سەقایی دا.

ب رێکا پشکداریێن خۆ، زانكۆیا دهۆک ناڤودەنگێ خۆ وەک پێشەنگەکێ هەرێمی د گەشەپێدانا دۆمدار، ناڤدەولەتیکرن، و پەروەردا نویخوازانە یا پلاندانانا جهی دا بهێزدکەت.

بۆ پێزانینێن زێدەتر ل سەر دەستپێشخەریێن ستراتیژی و هەڤکاریێن ئەکادیمی یێن زانكۆیا دهۆک، سەرەدانا "دیارترین چالاکیێن زانكۆیا دهۆک" بکەن.

بۆ دیتنا وێنەیان ڤێرە کلیک بکە

نڤیسینگەها راگەهاندنا زانکۆیێ – ٩ـی كانوونا ئێكی، ٢٠٢٥
راپۆرت ژ لایێ: فاطمه محمود علي، ئەلەند کەمال عوسمان

پەیڤێن سەرەکی

• تۆڕا SPRING
• زانكۆیا دورتموند یا تەکنیکی
• زانكۆیا دهۆک
• پلاندانانا جهکی
• هەڤکاریا ئەکادیمی یا نێڤدەولەتی
• پلاندانانا گەشەپێدانا هەرێمی