زانکۆیا دهۆك – ٣ـی چریا ئێکێ، ٢٠٢٦| نڤسینگه‌ها راگەهاندنا زانکۆیێ (UNPO) کۆلیژا پلانسازیا شار و هەرێمان ل زانکۆیا دهۆك، ب هەڤکاری دگەل ڕێکخراوا VNG International، سیمینارەکا ئاست بلند برێڤەبر. د ئەڤێ سیمینارێ دا ژمارەکا بەرپرس و رێڤەبەرێن حکومی پشكداربوون، ژ وان ژی: قایمقامێ دهۆکێ رێزدار (بریندار حەیدەر عەبدوللا)، سەرۆکێ سەندیکا ئەندازیاران ل دهۆکێ رێزدار (عەلی نعمەت)، سەرۆکێ ژوورا بازرگانیا دهوکێ رێزدار(شکری جەمیل)، رێڤەبەرێ رێڤەبەریا ئاڤا دهوکێ رێزدار (بشار حاجی)، نوێنەرێن رێڤەبەریێن ئاڤێ، ئەندازیارێن رێڤەبەریێن پەیوەندیدار، دگەل مامۆستا و قوتابیێن کۆلیژێ.

پەیڤێن ڤەکرنێ و دەستپێکا سیمینارێ

سیمینار ب پەیڤا بخێرهاتنێ ژ لایێ م. سەمير هاشم موحیەددین هاریکارێ راگرێ کۆلیژێ دەستپێکر کو ئاماژە دا ب رۆلێ زانکویێ و ب تایبەتی کولیژا پلانسازیا شار و هەرێمان د گەل سازیێن حکومی بو بابەتێن گرێدایی ب پلانسازی و خزمەتگوزاریا باژێری، پاشان خانم ڕەوشەن ئەتروشی، سەرپەرشتا VNG International ل عیراقێ ڕۆلێ ستراتیژی یێ ڕێکخراوێ د هەڤکاریا بەردەوام دگەل زانکۆیێ و رێڤەبەریێن حکومی دا دیارکر.

سیمینار ل ژێر ناڤونیشانێ «ڕەوشا ئاڤێ ل دهۆکێ: ئاستەنگ، دەرفەت، و ئاراستەیێ کەرتێ گشتی»

هاتە پێشکێشکرن ژ لایێ ژمارەکا رێڤەبەرێن رێڤەبەریێن ئاڤێ ل پارێزگەها دهوکێ.

تەوەرێن سەرەکی یێن سیمینارێ:

• هەلسەنگاندنا ژێدەرێن ئاڤێ و کێمکرنا مەترسیێن لافاوان: ئەندازیار هێژا عەبولواحد، ڕێڤەبەرێ ئاڤدێریێ ل پارێزگەها دهۆکێ، ئاستێ ژێدەرێن ئاڤێ و پێشهاتێن لافاوێن ساڵێن بۆری پێشکێشکرن، دگەل دیاركرنا پلانێن کرداری بۆ کێمکرنا مەترسیێن لافاوا ڕووبارێ هشکەروو.
• ئاڤا ڤەخوارنێ و ئاستێ بکارئینانێ: ئەندازیار خەلات فەتاح، ڕێڤەبەرێ ئاڤا دەوروبەران ل پارێزگەها دهوکێ، تەكەزی کرە سەر ئاڤا سەرئەردی، پڕۆژەیێن چالاك، بیرێن ئاڤێ، و بکارئینانا ئاڤێ ل سەر ئاستێ پارێزگەهێ.
• ژێرخانا شارستانی: ئەندازیار یونس جانۆ، رێڤەبەرێ ئاڤ و سۆلینان ل پارێزگەها دهۆکێ، شیکارکرن بۆ سیستەمێ تۆڕا ئاڤەڕۆیا باژێڕی و ئەو ئاستەنگێن تەکنیکی یێن کو ڕووبەڕووی سیستەمی دبن کر.

ئارمانجا ستراتیجی

وەکی پشەك ژ رێکەڤتنا دگەل باژێرڤانیا ڕیدەن (Rheden) یا هۆلەندی، باژێرێ دهۆکێ "جڤاتا گەشەپێدانا دۆمدار" (SDB) ل سەر بنەمایێ مۆدێلا سیانی (Triple Helix) - هەڤکاریا حكومەت، زانکۆ، و کەرتێ تایبەت دامەزراندیە. ئەڤ جڤاتە ب شێوەیەکێ فەرمی وەك دەستەیەكاا ڕاوێژکاری یا بەردەوام بۆ سەرۆکاتیا باژێرڤانیا دهۆکێ هاتینە دەستنیشانکرن، کو ئەندامێن وێ پێکهاتینە ژ: سەرۆکێ باژێرڤانیا دهۆکێ، سەرۆکێ ژوورا بازرگانی، و نوێنەرەکێ زانکۆیا دهۆکێ.

ئەڤ سیمینارە هاتە ڕێکخستن وەك پشكەك ژ هەوڵێن جڤاتێ بۆ چاڤدێریکرن و هەڵسەنگاندنا ڕەوشا كارگێری یا دابینکەرێن خزمەتگوزاریێن گشتی د کەرتێ ئاڤێ دا، ب ئارمانجا دیارکرنا ئاستەنگان و ڤەکۆلینێ د دەرفەتێن هەیی دا.

گونجاندن دگەل پلانا ستراتیژی یا زانكۆیا دهۆك (2023-2038): ئەڤ سیمینارە ب ڕاستەوخۆ پشتەڤانیا پلانا ستراتیژى یا زانکۆیێ دکەت ب تایبەتى خالێن:

• مۆدێلا سیانی (Triple Helix): پاشڤەبرنا ستوینا ستراتیژی یا زانکۆیا دهۆکێ یە بۆ هەڤکاریا دناڤبەرا زانکۆ، حكومەت، و کەرتێ تایبەت دا، ب ڕێیا چالاککرنا مەیدانی یا "جڤاتا گەشەپێدانا دۆمدار" (SDB) دگەل سەرۆکاتیا باژێرڤانیا دهۆکێ، ژوورا بازرگانی، و هەڤپشکان وەک ڕێکخراوا VNG International و شارەوانیا ڕیدەن (Rheden).
• خزمەتا جڤاکی و ڕاوێژکاریا گشتی یا کرداری: بهێزکرنا ڕۆلێ زانکۆیا دهۆکێ یە وەک دەزگەهەکێ جڤاکی یێ چالاك کو هەڵسەنگاندنێ بۆ خزمەتگوزاریێن گشتی یێن باژێڕڤانیێ دکەت، ڤەكۆلینێن زانستی پێشکێشدکەت، و ڕاوێژا ڕاستەوخۆ دەدەتە رێڤەبەریێن حکومی ل سەر ئاستەنگێن ژێرخانێ.
• دۆمداریا ژینگەهی و خۆگونجاندن: گونجاندنە دگەل كریارێن زانکۆیێ بەرەڤ ئارمانجێن گەشەپێدانا دۆمدار یێن نەتەوەیێن ئێکگرتی (SDGs)—ب تایبەتی ئارمانجا ٦ (ئاڤا پاقژ و پاقژکرن) و ئارمانجا ١١ (باژێڕ و کۆمەلگەهێن دۆمدار)—ب ڕێیا ئامادەکرنا پلانان بۆ کێمکرنا مەترسیێن لافاوا ڕووبارێ هشکەروو، ئاسایشا ئاڤا سەرئەردێ، و ژێرخانا ئاڤەڕۆیان.
• گرێدانا ئەکادیمیایێ دگەل حوکمڕانیا کەرتێ گشتی: بدەستڤەئینانا پەیوەندیەکا ڕاستەوخۆیە دناڤبەرا خواندنا پۆلان و ڤەكۆلینێن ئەکادیمی دگەل پرۆسەیا بڕیارورگرتنا حکومی، ب ڕێیا ڕەخساندنا دەرفەتێ بۆ مامۆستا و قوتابیان دا کو دگەل رێڤەبەر و ئەندازیارێن ئاست بلند یێن کەرتێ گشتی د دیالوگێ دا بن.

نڤیسینگه‌ها راگەهاندنا زانکۆیێ – ٣ـی چریا ئێکێ ٢٠٢٦ـێ

سەرنڤیسەر: فاطمە محمود عەلی
ئامادەکرن:ئەلند كەمال عوسمان
وێنەگرتن: ئەحمەد موستەفا حسێن

بۆ دیتنا وێنەیێن ئەڤى چالاكیێ ل ڤێرێ كلیك بكە

پەیڤێن سەرەکی:

• ڕێڤەبرنا ئاڤێ
• گەشەپێدانا دۆمدار
• کەرتێ گشتی
• ژێرخانا شارستانی
• کێمکرنا مەترسیێن لافاوان