بۆ مۆدێرنکرن و پێشڤەبرنا سیستەمێ برێڤەبرنێ د ناڤ سازیێن حکوومی دا و ئاسانکرنا رێڤەبرنێ و پتر رێکخستن و زەلالیێ و زوی ئاگەهداربوون لسەر هەر کێشە و گرفتەکێ و نەهێلانا ڤەقەتیانێ د ناڤبەرا سازیان دا، زانکۆیا دهۆک ب هەڤکاری دگەل رێکخراوا VNG یا هۆلەندی و ب پشتەڤانیا ئێکەتیا ئۆروپی و ب ئامادەبوونا جێگرێ پارێزگارێ دهۆکێ ماجد سەید سالح، قۆناغا ئێکێ ژ پرۆگرامێ پەیرەوکرنا سیستەمێ پێزانینێن جیۆگرافی GIS ل رێڤەبەریێن حکوومی یێن پارێزگەها دهۆکێ دەستپێکر.

د پرۆژێ GIS دا، کو د چارچۆڤێ پرۆگرامێ (مەسار) دایە، سێرڤەرەکێ سەرەکی دێ ل کارگێریا پارێزگەها دهۆکێ بیت و هەر رێڤەبەریەک دێ بەردەوام پێزانین و داتایان ل رێڤەبەریا خۆ کەتە د ڤی پرۆگرامی دا و هەمی داتا و پێزانین دێ هێنە رێکخستن و بەردەستکرن، ئەڤە ژی دێ بیتە ئەگەر کو کارگێریا پارێزگەهێ هەمی پێزانیێن گرێدای هەمی سەکتەران هەبن و د هەر گرفتەکێ دا بریارێن بلەز و لۆجیکی بدەت.

ئەڤ پرۆگرامە، ئەوێ ژ لایێ کولیژا پلاندانانێ ل زانکۆیا دهۆک دهێتە برێڤەبرن، ژ دوو قۆناغا پێکدهێت، ئەوژی راهێنان و دۆمداری. د. دلشاد عەبدولجەبار، راگرێ کولیژا پلاندانانا جهەکی ل زانکۆیا دهۆک خویاکر "قۆناغا ئێکێ ژ ڤی پرۆژەی راهێنانا کادرەکی یە بۆ رێڤەبرنا ڤی سیستەمی، کو ماوێ وێ سێ هەیڤن و حەفتیانە دوو رۆژان خولا راهێنانێ بۆ ئەندازیار و تەکنیککارێن ١٤ رێڤەبەریێ حکوومی یێن خزمەتگوزاری دێ هێتە ئەنجامدان. پشتی پێگەهاندن و ئاشناکرنا پشکدارێن خولێ لدۆر ڤی سیستەمی، قۆناغا دووێ دێ دەستپێکەت و ماوێ وێ سالەکە، د ڤێ قۆناغێ دا پرۆژێ GIS دێ هێتە بجهئینان و زانکۆیا دهۆک دێ ب ئەرکێ سەرپەرشتی و راوێژکاریێ رابیت".

هەژی ئاماژێ یە کارگێریا پارێزگەها دهۆکێ سەنتەرەک ب ناڤێ GIS دامەزراندیە و ئەرکێ وێ دێ بجهئینانا ڤی پرۆژەی بیت و زانکۆیا دهۆک و رێكخراوا VNG یا هولندی هەڤکارین سەرەکی نه بجهئینانا ڤی پرۆژەی، ئەڤە ژی لدویڤ دید و بۆچوون و پلانێن نوی یێن زانکۆیا دهۆک، ب تایبەتی گرنگیا نێزیکبوونا زانکۆیێ ژ جڤاکی و پێشکێشکرنا خزمەتێن د بوارێ زانینێ و ڤەکۆلینان دا بۆ کەرتێن جودا.