سەرۆكێ زانكۆیا دهۆك ل ئاهەنگا دەرچوونا گەرا دووێ وسیێ یا قوتابیێن ئەندازیاریا بایۆمیدیكال: "سالا بهێت خواندنا ماستەرێ بۆ ڤی پرۆگرامی دێ ل زانكۆیا THM هێتە ڤەكرن"
زانكۆیا دھۆك ئاھەنگا دەرچوونێ بۆ گەرا دووێ و سیێ ژ قوتابیێن پشكا ئەندازیاریا بایۆمیدیكال یا كۆلیژا ئەندازیاری ل ١٠ـێ چریا ئێكێ ٢٠٢٤ ل سەنتەرێ كۆنفرانسان ل زانكۆیا دھۆك گێرا، ئاھەنگا دەرچوونێ بۆ ھەڤپشكیا ئەكادیمی یا بێ وێنە یا دناڤبەرا زانكۆیا دھۆك و زانكۆیا زانستێن كرداری یا ئەلمانی THM دزڤریت. دەرچوویێن پشكا ئەندازیاریا بایۆمیدیكال باوەرنامەكا ھەڤپشك ژ زانكۆیا دھۆك و زانكۆیا زانستێن پراكتیكی یا ئەلمانی THM بدەستڤەئینا، كو تایبەتمەندی و جیاوازیەكێ ددەتە سەركەڤتنا ڤی پرۆگرامێ ھەڤكاریێ.
ئاھەنگ ب ئامادەبوونا سەرۆكێ زانكۆیا دھۆك، د. داود سلێمان ئەتروشی و ھاریكارێ سەرۆكێ زانكۆیێ بۆ كاروبارێن زانستی، د. لوقمان ھادی و جێگرێ پارێزگەرێ دھۆكێ، ماجد سهید سالح و راوێژكارێ وەزارەتا خواندنا بلند و ڤەكۆلینێن زانستی یا ھەرێما كوردستانێ، د. سەباح وەیسی، و راگرێ كۆلیژا ئەندازیاری، د. جێمس حسدو ھیدو، و راگر وهاریكارێ راگرێ كۆلیژا ئەندازیاری ل زانكۆیا THM، زێدەباری قوتابیێن دەرچووی و خێزانێن وان و مێھڤانێن دەرڤەی زانكۆیێ.
پەیڤا دەستپێكێ ژ لایێ سەرۆكێ زانكۆیا دھۆك، د. داوود ئەتروشی ڤە ھاتە پێشكێشكرن، كو تێدا پیرۆزباھی ل قوتابیێن دەرچووی كر و تەكەز ل سەر گرنگیا ھەڤپشكیا د ناڤبەرا زانكۆیا دھۆك و زانكۆیا زانستێن كرداری یا ئەلمانی THM كر و گوت "ھەڤپشكیا د ناڤبەرا زانكۆیا دھۆك و زانكۆیا زانستێن كرداری یا ئەلمانی THM دەستپێشخەریەكا پیشەنگە د زانكۆیا مەدا، كو دەلیڤەیەكا جیاواز بۆ قوتابیێن مە دابیندكەت، بۆ بدەستڤەئینانا باوەرناما بەكالۆریۆسا ھەڤپشك، ئەڤەژی دەستكەڤتەكە رەنگڤەدانا جیاوازیا ئەكادیمی و ھەڤكاریا ناڤدەولەتی دكەت"، دیسان ناڤبری گوت "ئەندازیاریا بایۆمیدیكال بوارەكە كو پەیوەندیێ د ناڤبەرا داھێنانا زانستی و ساخلەمیا مرۆڤی دا دكەت، دیسان چارەسەریا ئاستەنگێن سەردەمێ مە دكەت."
ل دویڤ دا، وەك پشكەك ژ ئاھەنگا دەرچوونێ كۆربەندەكێ زانستی ھاتە ئەنجامدان ب ناڤۆنیشانێ "تەكنیكێن نوی د ئەندازیاریا بایۆمیدیكال دا" كو زنجیرەیەكا بابەتا ژ لایێ شارەزایێن ئەڤی بیاڤی ھاتنە پێشكێشكرن، كو د. توماس شانزری، راگرێ كۆلیژا ئەندازیاری ل زانكۆیا THM باس ل گرنگیا ئەندازیاریا بایۆمیدیكال كر كو بەرەڤ زێدەبوونێ یە، دیسان د. مارتن فیبیتش، جێگیرێ راگرێ كۆلیژا ئەندازیاری ل زانكۆیا THM باس ل رەوشا نوكە یا ئەندازیاریا بایۆمیدیكال كر، ھەروەسا د. یاسر ئەحمەد فازل، سەرۆكێ پشكا ئەندازیاریا بایۆمیدیكال ل كۆلیژا ئەندازیاری ل زانكۆیا دھۆك، نیشاندانەك دەربارەی سەركەڤتن و ئاستەنگێن پرۆگرامێ ھەڤپشك كر، زێدەباری ئەڤێ چەندێ ئێك ژ قوتابیێن دەرچووی پۆختەكی دەربارەی چیرۆكێن سەركەڤتنێ یێن دەرچووی و قوتابیێن پشكا ئەندازیاریا بایۆمیدیكال ل كۆلیژا ئەندازیاری ل زانكۆیا دھۆك نيشاندا. ھەروەسا، پارچە ڤیدیۆیەك یا قوتابیێن پشكا ئەندازیاریا بایۆمیدیكال هاتە نیشاندان، كو تێدا قوتابیان پشكداریا چیرۆكێن سەركەڤتنا خۆ دكرن پشتی دابینكرنا كاری بۆ وان د بوارێ چاڤدێریا ساخلەمی دا، ئەڤ چەندە ژی كاریگەریا ئەرێنی یا پرۆگرامی نیشانددەت.
خالا سەرەكی د ئاھەنگێ دا، نویكرنا رێككەڤتنا ھەڤپشكیێ بوو د ناڤبەرا زانكۆیا دھۆك و زانكۆیا THM، كو گەرەنتیا بەردەوامبوونا پرۆگرامێ باوەرناما ھەڤپشك ل پشكا ئەندازیاریا بایۆمیدیكال بۆ پێنج سالێن دی ھاتەكرن، ئیمزا ل سەر رێككەڤتنێ د ناڤبەرا راگرێ كۆلیژا ئەندازیاری یا زانكۆیا THM و كۆلیژا ئەندازیاری یا زانكۆیا دھۆك هاتە كرن، ئەڤەژی ئێكەم ھەڤكاریە ژ ڤی جۆری ل ھەرێما كوردستانێ و عیراقێ.
ل دویماھیێ باوەرنامە ل سەر قوتابیێن دەرچووی ھاتنە دابەشكرن، ل دویڤ داخوازیا ھاریكارێ سەرۆكێ زانكۆیا دھۆك بۆ كاروبارێن زانستی، د. لوقمان ھادی. سەرۆكێ زانكۆیا دھۆك، د. داوود ئەتروشی پسەند ل سەر تمامكرنا ھەمی پێدڤیێن ئەكادیمی ب سەركەڤتیانە ژ لایێ قوتابیان ڤە كر بۆ گەرا دووێ ژ دەرچوویێن سالا ٢٠٢٢ – ٢٠٢٣ كو ١٥ قوتابی بوون و گەرا سیێ ژ دەرچوویێن سالا ٢٠٢٣ – ٢٠٢٤ كو ١٨ قوتابی بوون باوەرنامێن خۆ وەرگرتن.
پشكا ئەندازاریا بایۆمیدیكال ل كۆلیژا ئەندازیاری یا زانكۆیا دھۆك ل سالا ٢٠١٨ ب رێكا رێككەڤتنا د ناڤبەرا زانكۆیا دھۆك و زانكۆیا زانستێن پراكتیكی یا ئەلمانی THM ھاتیە دامەزراندن، د نوكە دا نزیکی ٧٠ قوتابی ل پشكا ئەندازیاریا بایۆمیدیكال دخوینن، كو پشكەك ژ پێدڤیێن باوەرناما وان، تمامكرنا ماوەیێ شەش ھەیڤێن مەشقدانێ یە ل وەلاتێ ئەلمانیا، ئەڤ مەشقدانە یا كو ل زانكۆیا زانستێن کرداری یا ئەلمانی THM یان ژی كۆمپانیێن ئامیرێن پزیشكی ل ئەلمانیا دھێتە ئەنجامدان، شارەزایی یا زانستی یا بھادار د بوارێ ئەندازیاریا بایۆمیدیكال ب قوتابیان دبەخشیت.
بۆ دیتنا پەخشێ زیندی یێ ئاهەنگا دەرچوونێ سەرەدانا لینكێ ل خوارێ بكەن:
بۆ دیتنا وێنان سەردانا لینكی ل خوارێ بكەن:
راگەھاندنا زانكۆیا دھۆك؛ ١١ـی چریا ئێكێ ٢٠٢٤
فاطمة محمود
وەرگێران: ماھر طاھر كێستەیی
فۆتۆ: محەمەد عەبدولكەریم و عەلی بانكی