لدۆر خەرجکرنا دەرمالەیێن قوتابیان، رێڤەبەرێ‌ ژمێریاری ل زانكۆیا دهۆك مەروان محەمەد سالح فندی راگەهاند کو زانکۆیا دهۆک هەمی بەرهەڤیێن بەلاڤکرنا ڤان دەرمالەیان کرینە و داتا بۆ گەنجینا دهۆکێ هاتینە رەوانەکرن و ئەو چاڤەرێی کەنجینێ نە کو کارێ خۆ بدویماهی بینیت و دەست ب دابەشکرنێ بهێتەکرن.

مەروان فندی ئەوژی دیاركر كو ل زانكۆیا دهۆك 23 هزار قوتابیان هەنە و پتر ژ 16 هزار قوتابیان، ئەوێن ب رێكا زانكۆلاین هاتینە وەرگرتن، دێ‌ ژ وەرگرتنا دەرمالان مفاداربن، کو ئەوژی 11356 قوتابیێن دەرەكینە و دێ‌ دەرمالێ‌ وان 60 هزار دینار بن، و 5199 قوتابیێن ناڤخۆیی، کو دێ‌ دەرمالێ‌ 40 هزار دیناران وەرگرن، ئانكو 16555 قوتابیێن زانكۆیا دهۆك دێ‌ ژ ڤی دەرمالەی مفاداربن، گۆت ژی لدویڤ رێنمایان قوتابیێن ئێڤاران و پارالێل ئەڤ دەرمالە ژێ‌ ناگرن، كو نێزیکی 6000 قوتابیانە.

رێڤەبەرێ‌ ژمێریاری ل زانكۆیا دهۆك ئەو ژی دیاركر كو بۆ بەلاڤكرنا دەرمالان پشتبەستن ل سەر نڤیسارا وەزارەتا دارایی یا ژمارە (1121) ل رێكەڤتی 3/2/2022 و نڤیسارا وەزارەتا خواندنا بلند یا ژمارە (2301) ل رێكەڤتی 6/2/2022 كریە، و دەرمالە ژ 1/1/2022 دێ‌ هێنە هژمارتن.