ب هەلکەڤتا سالڤەگەرا ٣١ێ یا سەرهلدانا گەلێ کوردستانێ، گەرمترین پیرۆزباهیان ئاراستەی هەمی خەلکێ کوردستانێ و پێشمەرگێ قەهرەمان دکەین. سەرهلدانا سالا ١٩٩١ێ، ژ مەزنترین سەرکەڤتنێن گەل و سەرکردایەتیا کوردستانێ بوویە، چنینا بەرهەمێ خەبات و شۆرەش و بەرخودانێن سالان بوویە، پێدڤیەکا دیرۆکی بوویە کو لسەر دەستێ پێشمەرگە و خەلکێ کوردستانێ هاتیە بجهئینان. 

    پشتی هەوێن ئەنفال و کیمیاباران و تەعریب و راگوهاستنان، بەرەیێ کوردستانێ ل سالا ١٩٨٨ێ ب سەرکردایەتیا سەرۆک مەسعوود بارزانی هاتە دامەزراندن. پشتی ٣ سالێن پلاندانانێ و دارێژتنا دەلیڤەیێن بەرپاکرنا سەرهلدانێ ب رێبەریا سەرۆک بارزانی و پشکداریا لایەنێن د ناڤ بەرەیێ کوردستانێ دا، ل ٥ی ئادارا سالا ١٩٩١ێ، سەرهلدانێ ل رانیا یا دەروازێ سەرهلدانێ دەستپێکر، پاشی وەکو باهۆزەکا ئازادی و رزگاریێ، هەمی کەل و چەپەرێن سەختێن دکتاتۆران تێکشکاندن و باشوورێ کوردستانێ ژ حوکمرانیا بەعسیان پاقژکر. 

    سەرهلدان بوویەرەکا پیرۆزە د دیرۆکا کوردستانێ دا، رویدانەکا گەلەک بوهادارە، سەرهلدانێ کورد کرنە ژمارەکا گەلەک گرنگ د هەڤکێشێن سیاسیێن هەرێمی و جیهانێ دا. هەروەسا بۆ دەستپێکەک کو ئەڤ مللەتە بەرەڤ ئازادیێ بچیت و چاڤێن وی بەرەڤ رۆناهیێ برن. سەرهلدانێ ئەم ب جیهانێ پتر داینە نیاسین و جیهان ب مە پتر دا نیاسین. 

    سەرەرای هندێ کو سەرهلدان شۆرەشەکا جەماوەری و چەکداری بوو و ئارمانجا وێ ئازادی و رزگاری بوو، سەرهلدانێ شۆرەشەکا رەوشەنبیری و مەعریفی ل کوردستانێ بەرپاکر. ئێک ژ دەستکەڤتێن سەرهلدانێ، دانانا زانکۆیا دهۆک بوو، کو سالەکێ پشتی سەرهلدانێ هاتە دامەزراندن. پشتی زانکۆیا دهۆک ژی، چەندین زانکۆ و پەیمانگەهـ ل سەرانسەری کوردستانێ هاتنە دامەزراندن و بوونە ئەگەر کو چاڤێن ڤی مللەتی پتر ڤەببن و هێدی هێدی نێزیکی عەقلیەت و پێشڤەچوونێن جیهانا سەردەم ببن. 

    خویایە سەرهلدان بەری هەر تشتەکی، بەرهەمێ ئێکرێزیا خەلکێ کوردستانێ و هێزێن سیاسی بوویە. ئەڤە ژی وانەیەکێ نیشانی مە ددەت کا دەمێ ئەم ئێکگرتی بین ئەم چەند بهێزترین. لەورا دخوازین هەمی رێک بهێنە بکارئینان بۆ ئێکگرتن و پتر رێکخستنا مالا کوردی. 

    ل دویماهیێ، سەرێ خۆ بۆ شەهیدێن کوردستانێ دچەمینین و دەستێ خۆ بۆ پێشمەرگێ قەهرەمان لسەر سینگێ خۆ دادنین. هەر پاراستی و پێشکەڤتی بیت کوردستان، هەر بلند بیت ئالایێ کوردستانێ و هەر سەرفەراز و شاناز بیت گەلێ کوردستانێ.

د. داوود سلێمان ئەترووشی

سەرۆکێ زانکۆیا دهۆک

٥/٣/٢٠٢٢