ئەکادیمیا هواوی، وەکو پەیمانگەهەکا تەکنۆلۆژی، بۆ مامۆستا و قوتابیێن زانکۆیێ و خەلکێ پارێزگەهێ ل زانکۆیا دهۆک هاتە ڤەکرن. ڤەکرنا ڤێ ئەکادیمیێ د رێورەسمەکی دابوو، کو ئەڤرۆ رێکەفتی ١/٣/٢٠٢٢ ل ئاڤاهیێ پەرتووکاخانا ناڤەندی هاتە سازکرن و تێدا د. لوقمان هادی حەسەن، هاریکارێ سەرۆکێ زانکۆیا دهۆک بۆ کاروبارێن زانستی و د. رافد خەفاجی، جێگرێ رێڤەبەرێ کومپانیا هواوی ل عیراقێ و جەمال نۆری، رێڤەبەرێ پەیوەندیێن ڤێ کومپانیێ و د. ئسماعیل ئەمین، رێکخەرێ پەیوەندیێن زانکۆیا دهۆک و کومپانیا هواوی و هژمارەکا بسپۆرێن تەکنۆلۆژیا پێزانینان ل زانکۆیا دهۆک ئامادەبوون.

دهێتە زانین ئەکادیمیا هواوی بزاڤێن ڤەدیتن و پێشڤەبرنا کەسانێن ژیر و شارەزا د بوارێن جودایێن تەکنۆلۆژیایێ دا ئەنجامددەت، لەورا ئەکادیمیا هواوی ل زانکۆیا دهۆک ڤەکر داکو قوتابی و مامۆستا و کەسانێن خودان شیان و بەهرەمەند د تەکنۆلۆژیایێ دا، بشێن پشکداری خول و تاقیکرنێن جودایێن ڤێ ئەکادیمیایێ ببن و باوەرنامەیێن باوەرپێکری بدەستخۆڤە بینن.

ئەکادیمیا ناڤبری پێشوەخت ل زانکۆیا سەڵاحەدین هاتیە دامەزراندن و سالانە پێشبرکییێن زانستی بۆ قوتابیێن زانکۆیان دهێنە ئەنجامدان وسەرکەڤتیێن ئەزموونێن وان ژلایێ کومپانیا هواوی ڤە دهێنە خەلاتکرن.

دیسان هەر ئێکی شیانێن پێشڤەبرن و پێشخستنا تەکنۆلۆژیایێ هەبن، دشیاندایە کاری دگەل ڤێ کومپانیا جیهانی بکەت، کو سالانە ئەڤ کومپانیە ٤٠٪ ژ داهاتیێ خۆ ل پێشئێخستنا تەکنۆلۆژیایێ دمەزێخیت.