ب مەرەما پتر هەماهەنگی و پەیوەندیێ و ئەنجامدانا بەرنامە و پرۆژەیێن هەڤپشک، ئەڤرۆ د. داوود سلێمان ئەترووشی سەرۆکێ زانکۆیا دهۆک و د. ناڤم سلێمان جاکسی سەرۆکێ زانکۆیا زاخۆ روینشتنەک ل سەرۆکاتیا زانکۆیا دهۆک ئەنجامدا. د ڤێ روینشتنێ دا و ب ئامادەبوونا د. لوقمان هادی حەسەن، هاریکارێ سەرۆکێ زانکۆیا دهۆک بۆ کاروبارێن زانستی و د. ئەحمەد محەمەد سالح، هاریکارێ سەرۆکێ زانکۆیا دهۆک بۆ کاروبارێن کارگێری، جەخت لسەر پتر هەماهەنگی و کارێن هەڤپشک د ناڤبەرا زانکۆیا دهۆک و زانکۆیا زاخۆ دا هاتەکرن.

د. داوود ئەترووشی باس ل گرنگیا بەرنامە و پرۆژێن هەڤپشک د بوارێن زانستی، کارگێری و قوتابیان دا کر و ئاماژەدا ئارمانجێن هەڤپشکێن زانکۆیێن دهۆک و زاخۆ و گۆت: "ئەم تمامکەرێن ئێکین، گرنگە پەیوەندیێن مە هێشتا خورتتر ببن، فەر دبینین کو د پاشەرۆژێ دا مە کۆمبوونێن فراوانتر هەبن و لدۆر پێداوستییا بازارێ کاری، پشکێن زانستیێن جودا ل هەردوو زانکۆیان رێکبێخین بۆ هندێ بسپۆری دگەل بێداویستیێن جڤاکی و بازارێ کاری بگونجن، بۆ بجهئینانا ڤێ ئارمانجێ ژی، ئەم پێدڤی ڤەکۆلینێن هەڤپشکین".

ژ لایێ خۆ ڤە سەرۆکێ زانکۆیا زاخۆ هەڤبۆچوون بوو و ئاماژە ب رۆلێ زانکۆیا دهۆک دا و گۆت: "زانکۆیا دهۆک، زانکۆیا دایکە ل پارێزگەها دهۆکێ و ئەم هەست ب ژێیاتیێ بۆ دکەین و رۆلەکێ مەزن د پێگەهاندنا کادرێ ئەکادیمی و کارگێری دا گێرایە. فەر دبینین پتر گرنگیێ بدەینە کارێ هەڤپشک بۆ پتر خزمەتکرنا جڤاکی د بوار و بسپۆریێن جودا دا".

ژ لایێ خۆ ڤە د. لوقمان هادی، هاریکارێ سەرۆکێ زانکۆیا دهۆک باس ل پێشڤەچوونێن د بوارێ زانستی ل پارێزگەهێ کر و بیرهاتنەکا هەڤپشک بۆ سەرۆکێ زانکۆیا زاخۆ ڤەگێرا و گۆت: "ل بیرا منە ل سالا ١٩٩٣یێ بۆ جارا ئێکێ مە کومپیۆتەرەکێ ب سیستەمێ MS-DOS بۆ کولیژا چاندنێ بدەستڤەئینا، ل وی سەردەمی وەکو دەستکەڤتەکێ گەلەک مەزن دهاتە تەماشاکرن، نوکە ژی و ب سوپاسی ڤە، زانکۆیا دهۆک د بوارێ بکارئینانا تەکنۆلۆژیایێ دا بەردەوام پێشدکەڤیت".

دیسان د. ئەحمەد محەمەد سالح هاریکارێ سەرۆکێ زانکۆیێ جەخت لسەر هەڤپشکیێ د بوارێ بجهئینانا سیستەمێن نوی دا ل هەردوو زانکۆیا کر و گۆت: "دشیاندایە زانکۆیێن دهۆک و زاخۆ دبوارێن جودا دا سیستەم و پرۆژێن هەڤپشک بجهبینن، وەکو تەکنۆلۆژیایا پەرتووکخانەیان و سیستەمێن تۆمارکرنا قوتابیان، ئەڤ هەڤپشکیە دێ مەزاختیان کێمتر لێکەت و دێ تەکنۆلۆژیایێن ستاندارد د زانکۆیێن مە دا پەیداکەت".