د چارچۆڤێ پرۆگرامێ (بهێزکرن و هاندانا پابەندبوونێ ب سەروەریا یاسایایێ د ناڤ سازیێن خواندنا بلند دا) دیدارا زانکۆیان یا سالا ٢٠٢٢ ل هۆتێلا شیراتۆن ل هەولێرێ هاتە ئەنجامدان. د ڤێ دیدارێ دا، ئەوا رێکخراوا چاڤێ زانکۆیێ CZO و ب پشتەڤانیا سندۆقا ئەمریکی بۆ دیمۆکراسیێ NED ئەنجامدای، نوینەرێن سەرۆکاتیا هەرێما کوردستانێ و حکوومەتا هەرێما کوردستانێ و وەزارەتا خواندنا بلند نوینەرێن زانکۆیا دهۆک و هژمارەکا پەرلەمانتار و مامۆستا و قوتابیێن زانکۆیێ، نوینەرێن رێکخراوێن قوتابیان، رێکخراوێن جڤاکێ مەدەنی یێن تایبەتمەند د بوارێ پەروەردێ دا و هژمارەکا شارەزا و بسپۆران پشکداربوون.

د. لوقمان هادی حەسەن، هاریکارێ سەرۆکێ زانکۆیا دهۆک و نوینەرێ زانکۆیا دهۆک، ئەڤ دیدارە ب دیدارەکا گرنگ پەسنکر و گۆت: "راپۆرتا ئەڤرۆ هاتیە پێشکێشکرن گەلەک لایەنێن هەژی گرنگیپێدانێ دانە دیارکرن، د ڤێ راپۆرتێ دا گللەیی لدۆر بجهئینانا یاسا و رێنماییێن برێڤەبرنا خواندنا بلند و مەرجێن دەستنیشانکرنا کەسان بۆ پۆستێن جودا هەبوون، جهێ خۆشحالیێ یە کو مە ل زانکۆیا دهۆک ئەڤ یاسا و مەرج و رێنماییە تا راددەیەکێ گەلەک باش بجهئیناینە". هەروەسا د. لوقمان هادی خویاکر کو ئێک ژ بابەتێن ڤێ دیدارێ، بۆلۆنا پرۆسێس بۆ و دا زانین: "تا راددەیەکێ باش بۆلۆنا پرۆسێس هاتیە پەیرەوکرن، دێ هەمی بزاڤان کەین کو ئەڤ پرۆسێسە ل سەرتاسەری زانکۆیا دهۆک بهێتە بجهئینان".

د. دلشاد عەبدولجەبار حەلیم، راگرێ کولیژا پلاندانانا جهەکی، کو ب ناڤێ زانکۆیا دهۆک د ڤێ دیدارێ دا پشکداربوو، باس ل یاسا و رێنماییێن دەستنیشانکرنا کەسان بۆ پۆستێن جودا ل زانکۆیان کر، کو د ڤێ دیدارێ دا هاتیە گەنگەشەکرن و راگەهاند: "گوهۆرینا پۆستا بۆ نویکرنێ و پتر پێشڤەبرنێیە، هەروەسا پێدڤیە ماوە و مەرج د پۆستان دا لبەرچاڤ بهێنە وەرگرتن". هەروەسا لدۆر بۆلۆنا پرۆسێس، کو د ڤێ دیدارێ دا دانوستاندن لدۆر هاتنەکرن، د. دلشادی گۆت: "وەزارەتێ ئەڤ پرۆسێسا بۆلۆنا یا پەسەندکری، نوکە نێزیکی ٥٠٪ ئەڤ پرۆسێسە ل کوردستانێ هاتیە بجهئینان، هیڤیا مە ئەوە کو سالا بهێت ئەم ل زانکۆیا دهۆک بشێین ل هەمی پشک و کولیژێن مایی ڤێ پرۆسێسێ پەیرەوبکەین".