ئەڤرۆ رێکەڤتی 3/2/2022 و ل ناڤەندا قوتابیان ل زانكۆیا دهۆك، سمینارەک ب ناڤێ (سیاسەتا گشتی یا کابینەیا ٩ یا حکوومەتا هەرێما کوردستانێ: دەرفەت و ئاستەنگ) ژ لایێ د. جوتیار عادل، پەیڤدارێ‌ حكوومەتا هەرێما كوردستانێ ڤە،‌ بۆ قوتابی و مامۆستایێن كولیژا زانستێن سیاسی ل زانکۆیا دهۆک هاتە پێشکێشکرن و دەرفەت و ئاستەنگێن د رێكا كابینەیا ٩ یا حكوومەتا هەرێمێ دا‌ باسكرن.

 ل دەستپێکێ پەیڤدارێ حکوومەتێ باس ل وان بابەتا کر ئەوێن حكوومەتا هەرێما كوردستانێ‌ ب رژدی كار لسەر كری و ئەو ئەنجامێن باشێن هاتینە پێش، هەروەسا ئاماژەدا پەیوەندیێن حكوومەتا هەرێمێ‌ دگەل بەغدا، دیسان پەیوەندیێن نێڤدەولەتی. ژ لایەکێ دی ڤە ئاماژەدا بابەتێ پێشكێشكرنا خزمەتگوزاریان و خۆشكرنا بارێ‌ دارایی یێ‌ وەلاتیان، لدویماهیێ ژی بابەتێ‌ ئازادیا رادەربرینی ب رێكێن یاسایی و رێکخستنا میدیایێ ل هەرێما کوردستانێ ئازراند.

د تەوەرکێ دییێ سمینارێ دا، د. جۆتیار عادلی باس ل سیاسەتا حکوومەتا هەرێمێ بەرامبەر گەنجا کر و گۆت: "كابینەیا ٩ یا حكوومەتا هەرێما كوردستانێ‌ ب رژدی كار لسەر وێ‌ ئێكێ‌ كریە کو دەلیڤێن كاری پتر بۆ گەنج و كەسێن ژێهاتی پەیدابكەت، ب رێکا لبەرچاڤكرنا لایەنێ‌ نیشتمانی و پەروەری، نەکو لایەنێ‌ سیاسی".

 هەروەسا پەیڤدارێ حکوومەتا هەرێمێ گرنگی دا بابەتێ چاكسازیێ د بیاڤێ‌ مووچەی دا و دیارکر کو ب هزاران دوو مووچە و سێ‌ مووچە هاتینە بڕین و پێداچوون و چاكسازی د گرێبەستێن كۆمپانیا دا هاتینە ئەنجامدان. ئەو یەکە ژی باسکر کو حکوومەتێ کارەکێ باش لدۆر رێکخستنا باجێ و نەهێلانا سستیێ د خڕڤەکرنا داهاتی دا هاتیەکرن.

 ل دویماهیێ مامۆستا و قوتابیێن ئامادەبووی دانوستاندنێن فراوان دگەل پەیڤدارێ حکوومەتا هەرێمێ ئەنجامدان و د بوارێن جودایێن کارێ حکوومەتا هەرێمێ دا پرسیارێن خۆ ئاراستەکرن، پەیڤدارێ حکوومەتێ ژی بەرسڤا پرسیارێن ئامادەبوویان دا و دانوستاندن لدۆر پۆچوونێن وان ئەنجامدان.