فەستیڤالا ھۆنەرێن جوان، گەشتا زانكۆیا دھۆك بەرەڤ ھونەر و داھێنانێ

زانكۆیا دھۆك ب سەركەڤتیانە چالاكیێن فەستیڤالا ھونەرێن جوان ب دویماھی ئینان، یاكو ژ لایێ كولیژا ھونەرێن جوان ڤە ب پشكداریكرنەكا كارا ژ قوتابی و مامۆستایێن كولیژێ و ھونەرمەندێن دەڤەرێ و ب ئامادەبوونا جەماوەرەكێ زۆر ژ ھونەرمەند و ھونەر دوست و رەخنەگرێن ھونەری ل رۆژێن 14 تا 16ـی گولانێ 2024 ل جھێن جودا ل ناڤ و دەرڤەی كەمپا زانكۆیێ ھاتیە ئەنجامدان.

د رۆژا ئێكێ یا فەستیڤالێ دا شانوگەریا "جولانك" ژ نڤێسین و دەرھێنانا د. محمد سەبری و زارڤەكرنا قوتابیێن كۆلیژا ھونەرێن جوان ھاتە نیشاندان، دیسان پیشانگەھەك بۆ كومەكا جۆراوجۆر ژ تابلویێن ھونەری ژ كارێن قوتابیا بەرامبەر ئامادەبوویا ھاتە ڤەكرن، كو جەماوەرەكێ زۆر بۆ تەماشەكرنا شانویێ و ل دویڤدا گەریان ل ناڤ پیشانگەھێ ئامادەبوون بۆ دیتنا كارێن داھێنەرانە یێن قوتابیێن كولیژا ھونەرێن جوان.

دیسان ل سپێدەھیا رۆژا دووێ یا فەستیڤالێ دا روینشتنەكا شرۆڤەكرنا رەخنەیی ژ لایێ چەندین رەخنەگرێن ھونەری و مامۆستایێن كولیژێ ڤە ھاتە ئەنجامدان، روینشتن ژ لایێ مامۆستا سیار تەمەر ڤە ھاتە برێڤەبرن، كو گەنگەشێن ھویر دەربارەی بابەت و تەكنیكێن ھونەری و دەرھێنان و بەرھەمئینانا شانویا "جولانك" ھاتنە ئەنجامدان ب پشكداریكرنا ئامادەبوویا ژ ھونەر دوست و بسپۆرێن ھونەری، دیسان د ئێڤارا ھەمان رۆژ دا ب ئامادەبوونا جەماوەرەكێ زۆر شانوگەریا "دادگەھا شاھ ماران" ژ نڤێسینا ھەلكەت ئدریس و دەرھێنانا تاھا عەبدولعەزیز ڤە ل ھۆلا محەمەد عارف جزیری ھاتە نیشاندان.

رۆژا سیێ و دویماھیێ یا فەستیڤالا ھونەرێن جوان بۆ روینشتنەكا شرۆڤەكرنا رەخنەیی بۆ شانوگەریا "دادگەھا شاھ ماران" ھاتبوو تەرخانكرن، كو ژ لایێ د. مێھڤان حسێن ڤە ھاتە برێڤەبرن، ب پشكداری و گەنگەشە و لێكگوھۆرینا بۆچوون و ھزر و دیتنێن پشكدارێن روینشتنێ ژ ھونەرمەند و رەخنەگر و مامۆستایا ژ لایەكیڤە و پشكداریكرنا چالاك یا ئامادەبوویا ژ لایەكێ دیڤە.

فەستیڤالا ھونەرێن جوان ل زانكۆیا دھۆك ب گەشتەكا ھونەری و داھێنانێ یا جیاواز دھێتە ھژمارتن، كو شێوەیێن ھونەری یێن جیاواز بخۆڤەدگرتن، دیسان دەلیڤەك بوو، بۆ ڤەدیتنا بەھرە و داھێنانێن قوتابیێن كولیژا ھونەرێن جوان. فەستیڤالێ شوین تبلێن رەوشەنبیری یێن گرنگ ل زانكۆیا دھۆك و باژێرێ دھۆكێ ھێلاینە، دیسان فەستیڤال پشكداریكرنەكا كارا بوو د پەرەپێدانا پێگەھاندنا ھونەری و بەلاڤكرنا رەوشەنبیریا ھونەری دناڤبەرا قوتابیێن زانكۆیا دھو ك جەماوەرێ ھونەری.

ھەژی ئاماژەدانێ یە، زانكۆیا دھوك یا رژدە ل سەر پالپشتیكرنا چالاكیێن رەوشەنبیری و كەلتووری و بەردەوام ھەولا ددەت بۆ ب دەستڤەئینانا دەلیڤێن نوی یە د پاشەرۆژێ دا بۆ بەردەوامیدان ب چاڤدێریا بەھرەیێن ھونەری و پەرەپێدانا لێكگوھۆرینا كەلتووری.

بۆ داونلۆدکرنا وێنێن ب کوالتیا بلند، ئەڤی لینکێ ل خوارێ کلیک بکە:

https://drive.google.com/drive/folders/14a3DTm41gZ1fi9rW23uD5qY2UuJD11GY

راگەھاندنا زانكۆیا دھۆك؛ شەمبی 18ـی گولانێ 2024

نڤێسین: عسمەت خابوور و ماهر طاهر كێستەیی

فۆتۆ: محەمەد عەبدولكەریم، عەلی بانكی، ھەرمان جانگیر