زانكۆیا دهۆك، ١١ـی تەباخا ٢٠٢٥ـێ، نڤیسینگەها راگەهاندنا زانکۆیێ | کۆلیژا پلانسازیا شار و هەرێمان ل زانکویا دهۆک رادگەهینیت کو دێ مێهڤانداریا بەرنامێ لیكگوهۆرینێ یێ ناڤدەولەتیێ "ئەكیوپانكتورا شارسازی" (Urban Acupuncture) ٢٠٢٥ ل دهۆکێ کەت.

ناڤ و نیشانێ سەرەکى یێ بەرنامەی: "ساخلەمکرنا رێڕەوێ رووباری: ئەكیوپانكتورا شارسازی وەکو پالدەرەک بۆ گرێدانا کەسک و ژیانا گشتی ل دهۆکێ"

ئەڤ لێكگوهۆرینەدێ بۆ ماوێ دوو هەیڤان بەردەوام بیت، ژ ١٥ـی ئیلۆنا ٢٠٢٥ـێ هەتا ١٥ـی چریا دووێ یا ٢٠٢٥، ب پالپشتیا دارایی یا تەمام. دێ شەش ڤەکۆلەر، قوتابیێن دکتورایێ، و قوتابیێن ماستەرێ ژ وەلاتێن ئەلمانیا، لوبنان، و مسرێ تێدا پشکدار بن.

ئارمانجا ڤێ هەڤکاریا ناڤدەولەتى ئەوە کو رێڕەوێ رووبارێ دهۆکێ ژ نوی ڤە بهێتە هزرکرن ب رێکا بکارئینانا هزرا نویخوازا "ئەكیوپانكتورا شارسازی"، کو شێوازەکە ژ پلاندانانێ ئارمانجا وی ئەنجامدانا دەستێوەردانێن بچویک و بلەزن بۆ گەشەكرنا باژێری ل سەر ئاستەکێ بەرفرەهـ.

ئارمانجێن بەرنامەی:

• ڤەژاندنا کەڤالێن پشتگوھ هاڤێتی یێن رووباری و گوهۆرینا وان بۆ جھێن گشتی یێن بەردەست و گونجای.
• پالدانا گرێدانا کەسک و گەشەپێدانا باژێرى یا ژینگەهپارێز و دۆمدار.
• بهێزکرنا هەڤکاریا دناڤبەرا پسپۆریێن جودا د چارچۆڤەكێ ڤەکۆلینێ یێ کرداری دا.

بەرنامێ "ئەكیوپانكتورا شارسازی" یا ٢٠٢٥ نیشاندەرا پێگیریا بەردەواما کۆلیژێ و زانكۆیێ یە بۆ گەشەپێدانا باژێرى یا دۆمدار، ئالۆگۆریا ئەکادیمی یا ناڤدەولەتى، و ڤەکۆلینێن ل سەر بنەمایێ جڤاکی.

نڤیسینگەها راگەهاندنا زانکۆیێ، ١١ـی تەباخا ٢٠٢٥ـێ