ئەڤرۆ رێکەڤتی ٢٠٢٢/٢/١٦، و ب هەلکەڤتێن رۆژا جیهانیا ئافرەتێن د بوارێ زانستی کاردکەن و هەروەسا رۆژا جیهانیا تێشتخوارنا ئافرەتان، پشکا کیمیا ل کولیژا زانست یا زانکۆیا دهۆک، و ب هەڤکاری دگەل ئێکەتیا نیڤدەولەتیا کیمیایا خوری و پراکتیکی IUPAC، پێشانگەهەکا پۆستەرێن زانستێ کیمیایێ ڤەکر، دگەل برێڤەبرنا نەریتێ جیهانیێ تێشتخوارنێ، ئەوێ ل وەلاتێن جودایێن جیهانێ دهێتە ئەنجامدان.

دهێتە زانین کو رێکخراوا نەتەوێن ئێکگرتی رۆژا ١١ی شوباتێ کریە رۆژا جیهانیا ئافرەتێن د بوارێن زانستێ دا کاردکەن، و رۆژا ١٦ی شوباتێ، رۆژا تێشتخوارنا جیهانیە بۆ ئافرەتان، کو ئەڤ هەردوو هەلکەڤتە دگەل هەڤ دهێتە تێکەلکرن، بۆ وێ یەکێ کو ئافرەتێن د بوارێ زانستی دا کاردکەن بهێنە پشتەڤانیکرن و رڤشتێ نوی یێ ئافرەتان بهێنە هاندان کو د ڤی بواری دا کاربکەن.

د ڤێ چالاکیێ دا، و ب ئامادەبوونا د. لوقمان هادی، هاریکارێ سەرۆکێ زانکۆیێ بۆ کاروبارێن زانستی و د. محەمەد عەزیز راگرێ کولیژا زانست ل زانکۆیا دهۆک و راگرێ کولیژا زانستێن مرۆڤایەتی، پێشانگەهەکا پۆستەرێن زانستی د بوارێ کیمیایێ دا هاتە ڤەکرن. د ڤێ پێشانگەهێ دا نویترین پێشکەڤتنێن جیهانی د بوارێ زانستێ کیمیایێ دا هاتنە نیشاندان، دگەل نیشاندانا دوو کەڤالێن شێوەکاری یێن فیمینیستی.

د. لوقمان هادی، هاریکارێ سەرۆکێ زانکۆیێ لدۆر ڤێ چالاکیێ ئاماژە ب رۆلێ رێکخەرا ڤێ چالاکیێ د. سوهاد عەبدولرەحمان دا و هەروەسا ساخکرنا ڤان هەلکەڤتا و گۆت: "د بوارێ زانستێن خوری دا، ساخکرنا ڤان هەلکەڤتا گەلەک گرنگە، رێکخەرێن ڤێ چالاکیێ ژی های ژ هویرکاریێن ڤان هەلکەڤتان هەنە و گرنگیا وان ل جیهانا پێشکەڤتی، لەورا ب ناڤێ سەرۆکاتیا زانکۆیا دهۆک دەستخۆشیێ لێدکەین".

ژ لایێ خۆ ڤە، د. سوهاد عەبدولرەحمان، رێکخەرا ڤێ چالاکیێ گۆت: "ئەڤ چالاکیە جیهانیە و سالانە ل سەدان وەلاتێن جیهانی دهێتە ساخکرن، ئەم ژی ب گرنگ دبینین ببینە پشکەک ژ خێزانا نیڤدەولەتیا ئەکادیمیایێ د بوارێ زانستێن خوری دا".

راگرێ کولیژا زانست ل زانکۆیا دهۆک ئاماژە ب درویشمێ ئەڤسالە یێ ڤێ چالاکیێ دا و گۆت: "ئەڤە جارا دووێ یە کولیژا زانست ڤێ هەلکەڤتێ ساخدکەت، کو ئەڤسالە درویشمێ ڤێ هەلکەڤتێ پشتەڤانیا فرەرەگەزی و هەمەجۆریێ د زانستی دا بوو. ئەڤە ژی وێ واتایێ دگەهینیت کو هەر رەگەز و پێکهاتە دشێت رۆلێ خۆ د زانستی دا بگێریت".