نڤیسینگەها ڕاگەهاندنا زانکۆیێ –
زانکۆیا دهۆک (UOD) خۆشحاڵە ب ڕاگەهاندنا بانگەوازا پێشکێشکرنا داخوازان بۆ پرۆگرامێ ئيراسموس پلاس (Erasmus+) بۆ ستافێ زانکۆیێ (بۆ مەبەستێن ڕاهێنانێ یان وانەگۆتنێ) ل زانکۆیا گرانادا (UGR) ل وەلاتێ ئسپانیا، د چارچۆڤێ پرۆگرامێ Erasmus+ دا.

ئارمانج ژ ڤێ دەلیڤا گەشتا ناڤدەولەتی پشتەڤانیکرنا ئالۆگۆڕیا ئەکادیمی، پێشڤەبرنا پیشەیی، و هەڤکاریا كەلتوری یە د ناڤبەرا زانکۆیا دهۆک و هەڤپشکێن وێ یێن ئەوروپی دا.

مەرجێن پێشکێشکرنێ

ئەڤ دەلیڤە بۆ هەردوو ستافێن ئەکادیمی و کارگێری بەردەستە یێن حەز هەبیت پشکداریێ د چالاکیێن وانەگۆتنێ یان ڕاهێنانێ دا ل زانکۆیا گرانادا بکەن. پێدڤیە پێشکێشکار شارەزاییا تەمام د زمانێ ئینگلیزی دا هەبیت و مەرجێن پێدڤی یێن ل خوارێ دیارکری تێدا هەبن.

ماوێ پرۆگرامى

٥ ڕۆژێن کاری، زێدەبارى ٢ ڕۆژێن گەشتكرنێ

پێدڤیێن پێشکێشکرنێ

• ناما پالنەر (Motivation Letter)
• سیڤیەکا نوویکری (CV)

جورێن گەشتێ (Mobility)

أ) گەشت بۆ مەبەستا ڕاهێنانێ
ئەڤ جۆرە پشتەڤانیا پێشڤەبرنا پیشەیی یا ستافێ ئەکادیمی یان کارگێری دکەت ب ڕێکا پشکداریکرنێ د چالاکیێن ڕاهێنانێ دا ل دەرڤەی وەلاتى (کۆنفرانسان بخۆڤە ناگریت). ڕاهێنان دشێت ل پشک و یەكەیێن زانکۆیا گرانادا بهێتە کرن، یان د دەمێ ئێک ژ هەفتیێن ستافێ ناڤدەولەتی دا کو ژلایێ زانکۆیا گرانادا ڤە دهێتە ڕێکخستن.

ب) گەشت بۆ مەبەستا وانەگۆتنێ
ئەڤ دەلیڤە بۆ ستافێ وانەگۆتنێ ڤەکریە یێن حەز بکەن وانە یان سەمیناران (کێمتر نەبیت ژ ٨ دەمژمێران) ل زانکۆیا گرانادا پێشکێش بکەن. پێدڤیە پێشکێشکار ناما قەبوولکرنا دەستپێکی ژ پشکەکا پەیوەندیدار ل زانکۆیا گرانادا ب دەستڤە بینیت.

پرۆسەیا پێشکێشکرنێ

پێدڤیە پێشكێشكار هەمی پێدڤیێن خۆ ب ڕێکا ڤێ فۆڕما ئۆنلاین یا ل خوارێ پێشکێش بکەن:

https://forms.gle/jFTNKuEa2hwoUcBu6

دوماهیك ژڤان بۆ پێشكێشكرنێ: ٢٠ـی چریا دووێ، ٢٠٢٥

نڤیسینگەها راگەهاندنا زانکۆیێ