ب ئامادەبوونا سەرۆکێ زانکۆیا دهۆک و هاریکارێ سەرۆکێ زانکۆیێ بۆ کاروبارێن کارگێری و دارایی، ئەڤرۆ شاندەکێ بسپۆر ژ وەزارەتا خواندنا بلند و ڤەکۆلینێن زانستی روینشتنەک دگەل ستافێ کارگێریێ زانکۆیا دهۆک سازکر، ب مەرەما دەستبکاربوونێ د قوناغا دووێ یا پرۆژێ زانکۆیا ئەلکترۆنی دا.

دهێتە زانین کو ل دویماهیا سالا 2017ێ، ئێکەم قوناغ ژ ئەلکترۆنیکرنا کاروبارێن کارگێری ل حکوومەتا هەرێمێ دەستپێکربوو.

د ڤێ پێنگاڤێ دا، هەموو کاروبارێن کارگێری و دیسان ژێدەرێن مرۆڤی (HR) دێ هێنە ئەلکترۆنیکرن، هەروەسا بەرهەڤی بۆ قوناغا سێیێ ددەنە دیارکرن کو زانکۆ ب شێوازەکێ ئەلکترۆنی دشێت هەموو کاروبارێن خۆیێن کارگێری برێڤەببن، زانکۆیا دهۆک ژی ئامادەیە پشکدارەیەکا ئەکتیڤ د حکوومەتا ئەلکترۆنی دا بکەت.

د ڤێ روینشتنێ دا، سەرۆکێ زانکۆیا دهۆک د. داوود سلێمان ئەترووشی د پەیڤەکێ دا بۆ ستافێ کارگێریێ زانکۆیێ لدۆر گرنگیا ڤێ پرۆسێسا ئەلکترۆنیکرنا کاروبارێن کارگێری گۆت: "پێدڤیە ستافێ کارگێری ل زانکۆیا دهۆک گرنگیەکا مەزن ب پرۆسێسا ئەلکترۆنیکرنا کاروبارێن کارگێری بدەت، پێخەمەت پشتەڤانیکرنا ڤێ پلانا حکوومەتا هەرێما کوردستانێ بۆ ئاسانکرنا برێڤەچوونا کاروبارێن کارگێری. هەلبەت دێ کوسپە و پرسگرێک هەبن، لێ مە باوەری ب ستافێ خۆ یێ کارگێری هەیە و هەمی رێکا دێ بکارئینین بۆ سەرئێخستنا ڤی پرۆژەی".

دیسان هاریکارێ سەرۆکێ زانکۆیێ بو کارۆبارێن کارگێری و دارایی د. ئەحمەد محەمەد سالح تەکەس لسەر وێ یەکێ کر کو "ستاڤێ کارگێریێ ل زانکۆیا دهۆک دێ هەمی شیانان بۆ سەرئێخستنا ڤی پرۆژەی تەرخانکەت".

شاندێ وەزارەتی ژی دوپاتی لسەر هندێ کر کو ئەلکترۆنیکرنا زانکۆیێ دێ پرۆسێسا گارگێری بۆ زانکۆیێ و هەروەسا بۆ وەلاتیان ب گشتی ئاسانتر لێکەت.

ل دویماهیێ، ستافێ کارگێریێ زانکۆیێ پرسیار و تێبینی ئاراستەی سەرۆکێ زانکۆیێ و شاندێ وەزارەتێ کرن و دانوستاندن لدۆر هویرکاریێن ڤێ پرۆسێسێ هاتنە کرن.