ئەڤرۆ رێكەڤتی 9/2/2022 سەرۆكێ زانكۆیا دهۆك د. داوود سلێمان ئەترووشی سەرەدانا كولیژا پزیشكیا ددانان كر. د روینشتنەکێ دا و ب ئامادەبوونا راگرا كولیژێ و هژمارەكا مامۆستایان، باس ل رەوشا پرۆگرامێن خواندنێ‌ هاتەكرن.
سەرۆکێ زانکۆیا دهۆک دیاركر کو ئارمانجا زانكۆیێ‌ ئەوە پرۆگرامێن خواندنێ ب بەردەوامی بهێنە پێشڤەبرن و رێكێن وانەگۆتنێ ژی پتر بەر ب مۆدێرنکرنێ ڤە بچن داکو دگەل تێگەهشتنا قوتابیێن ڤی سەردەمی بگونجن.

پاشی سەرۆكێ زانكۆیێ گەریانەك د ناڤ كلینیكین كولیژا پزیشكیا ددانان دا كر و ژ نێزیك هایداری رەوشا چارەسەریا نەخۆشان بوو و ئەو خزمەتێن ئەڤ كلینیكە پێشكیشی خەلكێ‌ دهۆكێ‌ دكەن بەرامبەر بهایەكێ‌ هێمایی. ژ لایێ خۆ ڤە د. بوهار جەعفەر، راگرا كولیژێ‌ دیاركر كو رۆژانە نێزیکی 250 نەخۆش ل كلینیكێن كولیژێ‌ دهێنە چارەسەرکرن و ئەڤ چەندەژی بوویە بارسڤكیەك لسەر كلینیكێن ددانان یێن رێڤەبەریا ساخلەمیا دهۆك.

لدویڤدا سەرۆكێ زانكۆیا دهۆك پشکداری رۆژا دووێ‌ یا وۆركشۆپا‌ لدۆر چەوانیا كونترۆلكرنا نەخۆشی و ڤایرۆسان و تافیلكرنا ئامیرێن نۆژدارێن ددانان بوو، ئەوا‌ بۆ نۆژدار و هاریكارێن نۆژدارا هاتیە ئەنجامدان، بۆ پتر بەلاڤكرنا هشیاریا خۆپاراستنێ و هەروەسا پاراستنا ساخلەمیا خەلكێ سەرەدانا كلینیكێن وان دكەن.