ل روژا 10/11/2019 گەنگەشێن نامێن ماستەرێ یێن 25 قوتابیێن پەیمانگەها چارەسەریا دەروونی و چارەسەریا تراومایێ ل زانكۆیا دهۆك دەست پێكرن و بۆ دەمێ چار رۆژان دێ یا بەردەوام بیت.
كو ئەڤ پەیمانگەهە ل سالا 2017 ل زانكۆیا دهۆك و ب هەڤكاری ل گەل زانكۆیا (تـوبیگـن) ل ویلایەتا (بادن ڤـورتـمبێرگ) یا ئەلمانی بۆ چارەسەریا دەروونی و چارەسەریا تراومایێ ل دهۆكێ هاتیە ڤەكرن كو بۆ جارا ئێكێ یە پەیمانگەهەكا ژ ڤی رەنگی ل كوردستانێ و عیراقێ دهێتە دامەزراندن.
جێگرێ هاریكارێ راگرێ پەیمانگەهێ ئیبراهیم خەلیل بۆ مالپەرێ زانكۆیێ گۆت بەرنامێ ماستەرێ قوتابی سێ سالان دخوینیت سالا ئیكێ ئامادەكاری نە و سالێن دووێ و سیێ بسپوریێ دخوینن، دیار ژی كر كو ڤان قوتابیان دگەل دامەزراندنا پەیمانگەهێ دەست پێ كریە و ئەڤ سالە ماستەرا خۆ تەمام كریە و گەنگەشێن وان دەستپێكرینە بۆ ماوێ چار رۆژان دێ ڤەكێشن كو 25 قوتابی دێ گەنگەشا ماستەرا خۆ كەن.
ئیبراهیم خەلیل هەروەسا گۆت ئەو قوتابیێن دەردچن دێ باوەرناما خویا ماستەرێ ل هەیڤا نیسانا بهێت وەرگرن، ئەوێن نەدەرچن ل دووماهیا هەیڤا ئادارێ گەنگەشەكا دی كەن و لژنە ژ پێنچ كەسان پێك دهات دوو ژ وان ژ ئەلمانیا نە.