قوتابیێن پلاندانانێ ل زانكۆیا دهۆك مەشقا هاڤینێ ل وەلاتێ ئەلمانیا ئەنجام ددەن
Sept. 23, 2021, 11:58 a.m.

ل دویف رێككەفتنا د ناڤبەرا كۆلیژا پلاندانانێ ل زانكۆیا دهۆك و كۆلیژا پلاندانانێ ل زانكۆیا دورتمۆند یا ئەلمانی ل رۆژا 20/9/2021 مەشقا هاڤینێ یا قوتابیێن قووناغا دووماهیێ یا كۆلیژا پلاندانانێ ل وەلاتێ ئەلمانیا ب پشكداریا 31 قوتابیان دەستپێكر.


راگرێ‌ كۆلیژا پلاندانانێ ل زانكۆیا دهۆك د. دلشاد عبدالجبار حلیم دیاركر كو ل دەمێ‌ گەهشتنا ڤان قوتابیان د رێورەسمەكی دا پرۆگرامێ‌ مەشقێ‌ بۆ هاتە دیاركرن كو هاریكارا سەرۆكێ زانكۆیا دورتمۆند و راگر و سەروكێ پشكا پلاندانانێ ل زانكۆیا دورتمۆند ئامادە ببوون و پەیڤێن خۆ پێشكێش قوتابیان كرن، ژلایێ خۆڤە هاریكارێ راگرێ كۆلیژا پلاندانانێ م. سمیر هاشم محی الدین ب نوینەریا زانكۆیا دهۆك و كۆلیژا پلاندانانێ پەیڤەك پێشكێش كر و جەخت ل سەر پالپشتیا سەرۆكێ زانكۆیێ بۆ پێشڤەبرن و بەردەوامی دان ب هەڤكاریا هەردوو كۆلیژان كر و هیڤی خاست كو د پاشەروژێ دا بشێن رێكەفتنەكی ل سەر پرۆگرامێ ماستەرێ یێ هەڤپشك ئیمزا بكەن، ل دووماهیێ ژی هیڤی خواست كو ئەڤ پرۆگرامە ببیتە دەلیڤكا باش بۆ پێشڤەبرنا ئاستێ زانستی یێ قوتابیان.


هەژی گۆتنێ‌ یە پشكا پلاندانانێ‌ ل زانكۆیا دهۆك ل سالا 2012 هاتیە دامەزراندن، و ئەڤە گەرا پێنجێ‌ یە قوتابی ژ ڤێ‌ پشكێ‌ دەردچن، و گەرا پێنجێ‌ یە قوتابیێن ڤێ‌ پشكێ‌ مەشقا هاڤینێ‌ ل وەلاتێ‌ ئەلمانیا ئەنجام ددەن وەكو بەشەك ژ پێدڤیا خاندنا وان و هەر جارێ‌ بۆ ماوێ‌ هەشت حەفتیان د میننە ل وی وەلاتی.