College of Humanities
بناڤێ خودێ مەزن و دلوڤان
پەیاما سالا نوى یا خاندنێ:
هاتنا سالا نوی یا خاندنێ ل هەمى ماموستایێن قەدرگران، فەرمانبەرێن خوشتڤى و قوتابیێن زێدە عەزیز پیروز دکەین. هەرچەندە ئەڤە بۆ ماوەیەکێ درێژە هەرێما کوردستانێ کەفتیە د بارەدوخەکێ نالەبارێ سیاسی، ئابورى و عەسکەرى کو قەیرانەکا مەزنا ئابورى و شەرێ دژى تیروریستان بەروکا کوردستانێ گرتیە و ب شێوەکێ راستەوخو کارتێکرن ل ئاستێ ژیان و ژیارا خەلکێ کوردستانێ بگشتى و ماموستاو فەرمانبەران و هەمى تەخ و چینێن ولاتێ مە کریە، هەتا رادەیەکێ مەزنژى کارتێکرن ل سەر ئاستێ زانست و پەروەردێ کریە بەلێ هەست ب بەرپرسیارەتیکرن ل ئاست بەرەنگاربونا ڤان قەیرانان دکەڤیتە ستویێ مە هەمیان،چونکى ئەو پێشمەرگێن قەهرەمان ئەوێن دناڤ چەپەراندا، دەمێ بەرهەڤ بن جان و خوینا خو بکەنە گورى بۆ هندێ داکو ئەم ب سەربەرزى و سەربلندى بەردەوامیێ بدەینە کاروانێ زانست و فێربوونێ، پێدڤیە ئەم ب دلسوزى و گیانەکێ ئێکگرتى سەرەدەریەکا گونجایی دگەل ڤی بارەدوخی بکەین،هەتا کو ولاتێ مە ل ڤێ رەوشا نالەبار دەرباز دبیت. ژبەر هندێ ئەم ماموستا و فەرمانبەر و قوتابی و خێزانێن وان دڤێت ب تێگەهشتنەکا کویر و سەردەمیانە، ئەڤان کوسپ و نەخوشیان د ناڤ پروسێسا پەروەردە و فێرکرنێدا کێم بکەین بۆ هندێ دا د ئایەندەیەکا نێزیکدا ب ئاناهیا خودێ و ب چەکەکێ زانست و خەبات و ب پشتگیریکرنا جەنابێ سەروک بارزانى کار بکەین بۆ دامەزراندنا سەربەخویا کوردستانێ و پتر خزمەتکرنا ئەڤی وەلاتى بۆ داهاتییەکا گەشتر و روناکتر.
ماموستا و قوتابیێن بەرێز:
بلا دەسپێکا سالا نوی یا خویندنێ بکەینە دەسپێکەک بۆ درێژەدان ب خەباتەکا گەرم وگورتر بۆ بدەستڤەئینانا چەکێ زانستێ کو ئەوژی ب هیمەت و هەول و تێکوشانا هه وەیێن بەرێز دێ مسوگەر بیت کوبهەڤرا و ب ئێکرەنگ هەست ب بەرپرسیارەتیێ بکەین بەرامبەر پروسێسا خویندنێ و ئەرکێن ل سەر ملێن مە هەتا پروسێسا خویندنێ ب دروستى برێڤە ببەین و هەولێن جدی بدەین بۆ رێکخستنا پلان و رێک و بەرنامێن خویندنێ بۆ بدەستڤەهینانا وێ پەیام و ئارمانجا کو ئەم هەمی بۆ کاردکەین. بێگومان پێشکەفتنا زانستى کلیلا پێشکەفتنا هەمی لایێن ژیانێیە، لەورا داخازێ ژ هەمى ماموستا و فەرمانبەر و قوتابیێن کولیژێ دکەین ب هزر و پەیامەکا نوی سالا نویا خویندنێ بکەنە سالا تێکوشان و بەشداریکرنێ د پێشڤەبرنا ئاستێ زانستى و هەڤکاریکرنا حکومەتا هەرێمێ بۆ دابینکرنا نیاز و خاستێن خەلکێ کوردستانێ، هەرچەندە زانکو نابیت بەرامبەر خاستێن کومەلگەهێ و کاروبارێن حکومەتێ یا بێدەنگ بیت لێ دڤێت ئەڤ کاودانێن نازک و مەترسیدار ل بەرچاڤ بهێنە وەرگرتن بۆ گەهشتنە ب ئارمانجێن مەزنتر سەرەرایێ هندێ کو زانکویێ بەرپرسیارەتیا هەی بەرامبەر دابینکرنا زانست و پەروەردێ، پێدڤیە وەک سەنتەرێ بیرکرنێ و هزرەکا رەخنەگرانە رولێ خو بگێریت د پێشڤەبرنا کومەلگەهێدا، لەورا داخازێ ل گشت ماموستا و فەرمانبەر و قوتابیێن هێژا دکەین ب گیانەکێ برایانە و پری دلسوزى و خوشەویستى و ب دلەکێ پرى هەڤکارى دەستێ خۆ بکەنە دناڤ دەستێت هەڤ بۆ سەرخستنا پروسێسا پەروەردە و فێرکرنێ و ئارمانجێن پیروز. هەلبەت هەر سال دەسپێکا خویندنێ ب جوش و خروشەکا نوى و هێزەکا دیتر سەبارەت پێشڤەبرنا خویندنێ دەسپێدکەت، هیڤیدارین ب درێژاهیا سالا خاندنێ قوتابیێن خوشتڤی پالپشت ب هێز و شیانێن خو و ب مفا وەرگرتن ل زانست و زانیاریێن ماموستایێن خو گوڕ و تینەکا گەرمتر بدەنە رێرەوا پێشکەفتنا کاروانێ زانست و خەباتێ و کارتێکرنا خویا راستەقینە د بوارێ زانستى و رەوشەنبیریا جڤاکیدا بسەپینن هەروەسا هیڤى دکەین ماموستا و فەرمانبەرێن هێژا و قەدرگرانێن کولیژێ وەک سالێن دەربازبویی بوارێن گونجایی بۆ پێشکێشکرنا هەمی هەڤکاریان ب مەرەما پێشخستنا بوارێن پەروەردەیی و زانستى بۆ قوتابیێن خوشتڤى برەخسینن. چونکى پێشکەفتن و خوشگوزەرانیا هەر وەلاتەکێ یابەندە ب پێشکەفتنا زانستى د ئاستێ زانکویاندا، کو ئەڤەژى ب هیمەت و تێکوشانا قوتابیێن عەزیز و ماموستایێن قەدرگران دهێتە بەرهەم، لێ بۆ ڤێ مەرەمێ ژى پێدڤیە زانکویێن مە ب یاسا و رێسایێن زانستى و سەردەمیانە بهێنە چەکدارکرن ب شێوەیەکێ وەسا کو ب ئازادى ڤەکولین،هزرکرن،رەخنەگرتن و داهێنان جهێ خو تێدا بکەن. ل دوماهیکێ ژى دبێژین هەرچەندە هاتنا وەرزێ پاییزێ دەسپێکا راوەستانا ژیانا سروشت یە، بەلێ بۆ مە وەک زانکو هێمایا بوهارا زانستى و جوش و خروشا قوتابیێن زێدە عەزیز و ماموستایێن هەلگرێ مەشخەلێ زانست و پەروەردێیە کو ب گرنگترین سامانێ کومەلگەهێ دهێنە هژمارتن. جارەکادیتر دەسپێکا سالا نوى ل هەمی زانکوییان پیروز دکەین و بۆ ئێک ب ئێکا هەمى عەزیزان ساخى و سلامەتى و سەرکەفتنێ ژ خودیێ مەزن دخازین.
راگریا کولیژا زانستێن مرۆڤایەتى